Analadur

Evit ar bevien skeventek (loened en aer) e rank bezañ diforc'hiet an analadur hag a c'hoarvez er c'helligoù hag ar gwenteradur hag a c'hoarvez er skevent. Analadur ar c'helligoù a zo ur reaktadenn deus ar vetabolegezh hag a brodu an energiezh ret evit mont-en-dro ar c'helligoù.

Rankout a ra bezañ :

• ur sustañs organek : Glukoz o vezañ an nutriant pennañ.
• ur gaz, an dioksigen : Gant ar bronneged eo tennet deus an aer dre ar gwenteradur ha kaset betek holl gelligoù ar c'horf dre red ar gwad dre hemoglobin ar globulennoù ruz.

Produiñ a ra :

• energiezh
• dioksid karbon
• dour .

Ar reaktadenn hollek a zo : C₆H₁₂O₆ + 6O₂ → 6CO₂ + 6H₂O + energiezh.