Kensonenn dre fic'hal

Doareoù distagañ
	Dre serriñ
	Klikoù
	Tarzhañ
	Strakal
	Entarzhañ
	Fic'hal
	Ruzennoù
	C'hwibanennoù
	Dassonennoù
	Fri
	Stlakat
	Froumal
	Tostaat
	Linkus
	Vogalennoù
	Hantervogalennoù
	Kostezennoù

Er yezhoniezh e vez implijet an termen kensonenn dre fic'hal (saoz.: affricate consonant) war dachenn ar fonetik hag ar fonologiezh evit komz eus ur gensonenn ma krog evel ur gensonenn dre serriñ (peurliesañ ur gensonenn kevig pe ur gensonenn dent) met pa vez distignet e vez lakaet an aer da fichal evel ma reer gant ur gensonenn dre daravat (da skouer [s, z]) pe raloc'h achuet gant ur gensonenn dre froumal.

Peurliesañ e vez treuzskrivet ar c'hensonennoù dre fic'hal oc'h implijout div arouezenn: an hini gentañ o tiskwel penaos e krog ar gensonenn dre serriñ hag eben evit diskwel penaos e achu dre daravat, da skouer [kx]. Seul wezh mar bez ezhomm avat, evit diskwel ez eus un unanenn fonemek anezhi kentoc'h evit daou fonem stag an eil ouzh eben e c'heller unaniñ an div arouezenn gant ur c'hombodig-stagañ, da skouer [k͡x]. A-hend all ez eus ereadurioù ispsial a c'hell bezañ implijet evit treuzskrivañ ar c'hensonennoù dre fic'hal implijet an aliesañ pa vez fonemoù anezhe e-lec'h rankout ober gant ar c'hombodig-stagañ-se: [ʦ], [ʣ], [ʧ], [ʤ], [ʨ], [ʥ]

Setu ur roll klok a-walc'h eus ar c'hensonennoù dre fic'hal implijet gant ar yezhoù dre ar bed gant bep o arouezenn hervez reolennoù treuzskrivañ al lizherenneg fonetikel etrebroadel:

[ts] kensonenn kevig dre fic'hal divouezh, d.s. it. grazie [ˈgrat͡sje]; "trugarez")

[dz] kensonenn kevig dre fic'hal mouezhiet, d.s. it. zero ([ˈdzɛro]; "mann")

[tʃ] kensonenn dent dre fic'hal divouezh, d.s. gwenedeg uhel ket

[dʒ] kensonenn dent dre fic'hal mouezhiet, d.s. gwenedeg uhel Gwened

[t̠ʃ] kensonenn kevig dre fic'hal divouezh, d.s. saoz. choose ("dibab")

[d̠ʒ] kensonenn kevig dre fic'hal mouezhiet, d.s. saoz. joke ("farsadenn")

[t̠ɕ] kensonenn drekkevig dre fic'hal divouezh, d.s. pol. Ć

[d̠ʑ] kensonenn drekkevig dre fic'hal mouezhiet, d.s. mak. Ѓ

[ʈʂ] kensonenn tro-gin dre fic'hal divouezh, d.s. pol. czas ([tʂas]; "amzer")

[ɖʐ] kensonenn tro-gin dre fic'hal mouezhiet, d.s. pol. dżdżownica ([dʐːɔvɲʲiʦa]; "buzhugenn")

[pf] kensonenn gweuz-dent dre fic'hal divouezh, d.s. al. Pferd ("marc'h")

[bv] kensonenn gweuz-dent dre fic'hal mouezhiet, d.s. sañset e tekeg