Pop Art

Ar Pop Art a zo ul luskad arzoù bet krouet e Bro-Saoz e-kreiz ar bloavezhioù 1950, diwar atiz Richard Hamilton hag Edouardo Paolozzi. Er bloavezhioù 1960 e teuas war wel ar Pop Art amerikan gant arzourien evel Andy Warhol, Roy Lichtenstein, Robert Rauschenberg pe Jasper Johns. A-drugarez d’an Amerikaned e vo brudet ar Pop Art er bed a-bezh. O fal a oa diskouez e oa deuet an oberennoù arz da vezañ ul lodenn eus ar gevredigezh beveziñ : marc’hadmat, berrbad, evel un dra a daoler kuit ur wech implijet.

Andy Warhol, 1962 Campbell Soup Cans

Termenadur

A ger Pop Art (« popular art ») a zo bet implijet evit ar wech kentañ e 1955 gant Lawrence Alloway. Buruteller arzoù saoz e oa, ezel eus an Independent Group (ur strollad tud desket a laboure war perzh an teknologiezh er gevredigezh).

Diazezet eo luskad ar Pop Art war perzh a gevredigezh beveziñ, hag ar c’hemmoù a zeu da heul en hor buhez pemdez.

Diwar ar bennaenn-se e labouras an arzourien amerikan hag e fellas dezho lakaat war wel perzh ar bruderezh, ar magazinoù, ar bannoù-treset hag ar skinwel er bed a-vremañ.

Goude- se ez eas war ledanaat ar Pop Art : savouriezh, giz pe c’hoazh design pop a zo.

Degemeret mat e voe ar Pop Art dre ma’z eo eeun ha digor. Peurliesañ ec’h implije an arzourien teknikoù nevez : livaj akrilek, serigrafiezh. Peurliesañ e veze ivez livioù flamm ha distag diouzh re a vuhez wir. Andy Warhol a vez gwelet peurliesañ evel pab ar Pop Art. Unan eus perzhioù ar Pop Art eo ivez ar fed ec’h implije an arzourien teknikoù ha ne oant ket implijet e bed an arzoù, met kentoc’h e hini an industriezh. Ar Pop Art a gemmas ivez sell an dud war an arzoù, dreist-holl war dibarded an oberennoù. Andy Warhol a adtaolenne e re dizehan : kantadoù, pe miliadoù a skouerennoù a rae. Kemend-se a oa kontrol d’an mennozhioù stag ouzh an arz klasel : talvoudus eo un oberenn ma n’eus nemet ur skouerenn anezhi. Diazezet eo ivez ar Pop Art war skeudennoù ar vuhez pemdez : ar skeudennoù-se a weler adalek hor bugaleaj er skinwel, er c’hazetennoù, hag e verkont ac’hanomp, memes ma n’omp ket emskiant eus an dra-se. Kemend-se a ziskouez ivez ur c’hemm, rak seurt skeudennoù a veze disprizet gant ar re desket war an arzoù. Gant ar Pop Art e teuas Mickey Mouse, Marilyn Monroe pe c’hoazh Mick Jagger da vezañ perzh pennañ an oberennoù.