Savage Model 1907
| Savage Model 1907 | |
|---|---|
.jpg) Ur bistolenn Savage Model 1907 | |
| Kinnig | |
| Bro |  Stadoù-Unanet Amerika
|
| Doare | Pistolenn damaotomatek, un-ober |
| Mont en-dro | Tennata dre argil berr |
| Munisionoù | .32 ACP .380 ACP .45 ACP (stumm amprouiñ evit an US Army) |
| Produer | Savage Arms |
| Mare produiñ | 1907–1928 |
| Pouez ha muzulioù | |
| Mas (hep kartouchenn) | 0,540 kg |
| Hirder | 168 mm |
| Hirder ar c'hanol | 96 mm |
| Perzhioù all | |
| Tizh mont e-maez ar boledoù | 244 m/s (.32 ACP) |
| Endalc'h | Karger fiñv 10 kartouchenn (e .32 ACP) Karger fiñv 9 c'hartouchenn (e .380 ACP) Karger fiñv 8 kartouchenn (e .45 ACP) |
| Adstummoù | Model 1915 Model 1917 |
| Lezenn | |
| Rummad e Bro-C'hall | B |
Ar Savage Model 1907 zo ur bistolenn damaotomatek bihan produet gant an embregerezh Savage eus 1907 betek 1928. Soñjet e oa bet evit an arme stadunanat da gentañ, met servijout a reas en arme c'hall e-pad ar Brezel-bed Kentañ dreist-holl, ha gwerzhet e voe kalz a skouerennoù anezhe war ar marc'had sivil.
Istor
[kemmañ | kemmañ ar vammenn]Pimpatrom evit an arme
[kemmañ | kemmañ ar vammenn]E 1905 ec'h embannas an U.S. Army e c'hoant da gaout un arm-dorn standart nevez kambret e .45 ACP. Evit respont d'o galv e kinnigas an embregerezh Savage ur bistolenn ijinet gant ar major Elbert H. Searle, dezhi ur c'harger 8 kartouchenn e endalc'h hag ur blatinenn un-ober. Mont a rae en-dro gant ur sistem argil berr daleet[1] hag ur c'hanol hag a droe eus 5° evit morailhañ ar gulasenn[2]. En eil plas en em gavas pistolenn Savage en amprouennoù, a-dreñv d'ar Colt M1911, ha ne voe ket choazet evit an arme neuze. Ar 195 skouerenn e .45 ACP amprouet en arme a voe kaset da Savage en-dro ha gwerzhet. Pezhioù-dastumadeg priziet int hiziv-an-deiz[3].
Stumm sivil
[kemmañ | kemmañ ar vammenn]Pa oa ijinourien 'zo e Savage o labourat war ar bistolenn evit an arme adalek 1905, lod all a labouras war ur stumm heñvel, met kambret e .32 ACP, ur c'halibr poblek d'ar poent-se, hag uheloc'h e endalc'h (10 tenn e-lec'h 8). Un arm skañv ha bihan e oa, ha lakaet e voe en gwerzh adalek 1908. Diwar-neuze ha betek ar Brezel bras e voe ar bistolenn werzhetañ er Stadoù-Unanet, evel arm d'en em zifenn, a-drugarez da arguzennoù ha luganoù hag a roe ton d'he skañvder, d'he ment vihan ha d'he endalc'h, evel "Ma c'hall mamm-gozh dougen anezhi e c'hallez ivez"[4], "Kas a ra an aon da netra"[5] pe an hini implijetañ anezhe, (en)"Ten shots quick" ("Dek tenn prim"). Ur stumm e .380 ACP a voe gwerzhet adalek 1913[2].
Implij er brezel ha stummoù all
[kemmañ | kemmañ ar vammenn]E deroù ar Brezel-bed Kentañ e klaskas an arme c'hall kavout armoù-dorn buan, abalamour e oa re nebeut evit pourveziañ an holl soudarded. Urzhiañ a reas neuze 27.000 pistolenn Model 1907 e .32 ACP digant Savage[3], dezhe kemmoù bihan evel un anell e penn an dornell evit stagañ ul lêrenn, pe ur c'houch difiñv. Arme ar Portugal a brenas 1.200 skouerenn eus ar stumm-mañ ivez[2].
Ur stumm disheñvel, ar Model 1915, a voe gwerzhet adalek 1915, dezhañ kemmoù bihan e-keñver ar sistem surentez. Ne reas ket berzh, ha paouezet e voe e broduiñ e 1917 p'en em gavas Savage Arms e banktorr a-raok bezañ adframmet dindan an anv Savage Arms Corporation. E memes bloaz e voe kinniget ur stumm all eus an arm, ar Model 1917, dezhañ kemmoù all evel ur merker-kargañ. Paouez a reas produiñ ar Model 1907 e 1920, hag hini ar Model 1917 e 1928. War-dro 235.000 skouerenn eus an eil ha 43.000 eus eben a voe produet en holl[2].
Deskrivadur
[kemmañ | kemmañ ar vammenn]Un arm un-ober eo ar Model 1907 hag e stummoù deveret. Ne vez ket lakaet he skoer da vont en-dro dre hanterouriezh ur c'hi bennak, hag an nevezenti a-bouez degaset gant ar Model 1907 e-keñver an armoù-dorn all d'ar poent-se, reoù Colt ha Browning en o zouez, a oa endalc'h ha c'harger aozet e div golonenn[6]. N'eus biñs ebet enni ivez, ha gellet a raer divontañ anezhi hep ostilh ebet[2]. Kudennoù surentez[7] ha gwander e galibr a verzas an arm da vezañ implijet muioc'h gant armeoù er bed.
Notennoù ha daveennoù
[kemmañ | kemmañ ar vammenn]- ↑ (fr) Savage modèle 1907, Arme et Passion (lennet d'an 11/01/2025)
- ↑ 2,0 2,1 2,2 2,3 ha2,4 (en) SCARLATA Paul, Savage Model 1907 Automatic Pistol, Shooting Times, 03/01/2011 (lennet d'an 10/01/2025)
- ↑ 3,0 ha3,1 (en) HUNTINGTON Roy, The Delightful Savage 1907, Guns Magazine, 2022 (lennet d'an 11/01/2025)
- ↑ "If grandma could handle it, so can you!"
- ↑ "It banishes fear!"
- ↑ (en) JARDIM Frank, The Savage Model 1907 Pistol: Eating Colt’s Lunch, American Handgunner, 2022 (lennet d'an 11/01/2025)
- ↑ (fr) McNAB Chris, Armes à feu Encyclopédie visuelle, L'Imprévu, 2022, p. 75
| |||||||||||||||||||||||
