Raidió Rí-Rá
| Enghraifft o'r canlynol | gorsaf radio, Radio rhyngrwyd  |
|---|---|
| Dechrau/Sefydlu | 2008 |
| Pencadlys | Dulyn |
| Gwladwriaeth | Gweriniaeth Iwerddon |
| Gwefan | http://www.raidiorira.ie/ |
Sefydlwyd Raidió Rí-Rá (Radio Helynt) yn 2008 gan fudiad iaith Wyddeleg, Conradh na Gaeilge. Gorsaf 24 awr y dydd sy'n chwarae cerddoriaeth bop y Siartiau Saesneg a hefyd peth Gwyddeleg yw hi. Anelir yr orsaf ar gyfer pobl yn eu harddegau ac ugeiniau. Bychan iawn o siarad sydd ar yr orsaf ond mae hynny o siarad yn yr iaith Wyddeleg.
Lansiwyd yr orsaf yn wreiddiol fel rhan o ddathliadau Seachtain na Gaeilge (Wythnos y Wyddeleg) y 2008. Enw wreiddiol yr orsaf oedd Radió X ond newidiwyd i Radió Rí-Rá yn dilyn cystadleuaeth.
Darlledu
[golygu | golygu cod]Darlledir yr orsaf ar wefan yr orsaf. Amcangyfrifir fod y wefan yn derbyn 35,0000 ymweliad y mis.
Caiff yr orsaf hefyd ei darlledu ar wasanaeth radio digidol DAB yn ardal Dulyn a Loch Garman (Wexford).
Am fis y flwyddyn adeg Seachtain na Gaeilge a gynhelir ym mis Mawrth darlledir yr orsaf ar donfedd FM yn ardaloedd Dulyn, Corc a Gallimh (Galway) a chyn 2011, yn Limeric hefyd.
Gobaith y rheolwyr yw y caiff yr orsaf ei darlledu ar wasanaeth digidol daearol Gweriniaeth Iwerddon, Soarview, yn y dyfodol. Mae Soarview yn cynnwys ac yn darlledu gorsafoedd cynhenid Iwerddon gan gynnwys sianeli teledu a radio y gwasanaeth wladwriaethol, RTÉ. Mae 9 gorsaf radio RTÉ bellach ar Soarview, gan gynnwys yr orsaf Wyddeleg ei hiaith genedlaethol, sef RTÉ Raidió na Gaeltachta.
CDs Ceol
[golygu | golygu cod]Ers 2005 fel rhan o ddathliadau Seatchain na Gaeilge cynhyrchwyd CD o ganeuon pop gan grwpiau Gwyddelig poplogaidd wedi eu cyfieithu i'r Wyddelig. Cynhoeddir y CDs yma o dan enw 'Ceol' ('cerddoriaeth'). Defnyddir a hyrwyddir y CDs yma gan Raidió Rí-Rá. Caiff y CDs yma eu rhoi am ddim ac yn 2011 fe'i cynhwysir o fewn cyhoeddiad o'r papur dyddiol yr Irish Daily Star. Mae'r CDs yn cynnwys fersiynau Gwyddeleg o ganeuon gan grwpiau megis The Corrs.
Gweler hefyd
[golygu | golygu cod]- Raidió Fáilte radio gymunedol Wyddeleg Belffast
- RTÉ Raidió na Gaeltachta - gorsaf Wyddeleg genedlaethol