ཐང་སྟོང་རྒྱལ་པོ
རྗེ་གྲུབ་ཐོབ་ཆེན་པོ་ལྕགས་ཟམ་པ་ཐང་སྟོང་རྒྱལ་པོ [1361?-1485]
འབྲེལ་གཏུགས
[ཞུན་དག]ཆོས་སྐད
[ཞུན་དག]- མཛད་པ་པོ: ཤེས་རབ་དཔལ་ལྡན; མིང: རྗེ་གྲུབ་ཐོབ་ཆེན་པོ་ལྕགས་ཟམ་པའི་རྣམ་པར་ཐར་པ་ངོ་ཚར་རྒྱ་མཚོ།
- མཛད་པ་པོ: ལོ་ཆེན་འགྱུར་མེད་བདེ་ཆེན [1540-1615] ; མིང: གྲུབ་པའི་དབང་ཕྱུག་ཆེན་པོ་ལྕགས་ཟམ་པ་ཐང་སྟོན་རྒྱལ་པོའི་རྣམ་ཐར་ཀུན་གསལ་ནོར་བུའི་མེ་ལོང་གསར་པ། TBRC W23929
- གྲུབ་ཆེན་ཐང་སྟོང་རྒྱལ་པོའི་རྣམ་ཐར་བཞུགས་སོ། ། བདུད་དཔུང་འཇོམ་པའི་སྨུག་ནག་ཁྲོ་བའི་སྐུ། །ལྟ་བའི་བདུད་འདུལ་བརྟུལ་ཞུགས་སྤྱོད་པ་ཅན། །སྦས་པའི་རྣལ་འབྱོར་འགྲོ་བ་ཡོངས་ཀྱི་མགོན། །ཨོ་རྒྱན་ལུང་བསྟན་སྐྱེས་མཆོག་སྤྲུལ་པའི་སྐུ། །ཐང་སྟོང་རྒྱལ་པོའི་ཞབས་ལ་ཕྱག་འཚལ་ལོ།། དེ་ཡང་སྤྱིར་འཛམ་བུ་གླིང་དང་བྱེ་བྲག་རྒྱ་བོད་འབྲུག་གསུམ་གྱི་བསོད་ནམས་ཀྱི་བགོ་སྐལ་ མཚན་ཉིན་ཟླ་བཟུམ་སྦེ་འཇིག་རྟེན་གྱི་ཕྱོགས་ཀུན་ལུ་གྲགས་ཡོད་པའི་གྲུབ་པའི་དབང་ཕྱུག་ཆེན་པོ་ཐང་སྟོང་རྒྱཪ་པོ་ གྲུབ་ཐོབ་ལྕགས་ཟམ་པ་ཟེར་ཡོངས་སུ་གྲགས་ཡོད་མི་འདི་ ནང་ལྟར་དུ་སྙིང་རྗེའི་རང་གཟུགས་འཕགས་པ་སྤྱན་རས་གཟིགས་དང་དཔལ་རྟ་ མགྲིན་ཟུང་དུ་འཇུག་པའི་རྣམ་འཕྲུལ་ ཕྱི་ལྟར་དུ་འཇིག་རྟེན་ཕལ་པའི་མཐོང་སྣང་ལུ་ནོར་རྫིཔ་དང་ལྷ་བྲིསཔ་ མགརཝ་དང་མཚན་རིགས་ལ་སོགས་པའི་ཚུལ་སྟོན་ ངོ་མཚར་བའི་ཡོན་ཏན་སྣ་ཚོགས་ཀྱི་ཐོག་ལས་སེམས་ཅན་གྱི་དོན་མཛད་བཞུགས་མི་ཅིག་ཨིན་པས། གྲུ་ཐོབ་ཁོ་རང་མཁས་ཞིང་གྲུབ་པའི་སྐྱེས་བུ་དམ་པ་ཅིག་ཨིན་པའི་རྟགས་མཚན་ལུ་ ཁོ་རའི་ཡུམ་གྱི་ལྷུམས་སུ་བཞུགས་པའི་དུས་འདི་ལས་འགོ་བཟུང༌ ལུང་བསྟན་ལས། ནང་རྟགས་རྨི་ལམ་མཚན་ལྟས་བྱུང༌། །ཟེར་གསུངས་དོ་བཟུམ་སྦེ་ ཡུམ་གྱི་རྨི་ལམ་ནང་ལུ་ལྗོན་ཤིང་ལོ་འདབ་རྒྱས་ འབྲས་བུ་དང་མེ་ཏོག་སྣ་ཚོགས་ཀྱིས་རྒྱན་འདི་ ག་ནི་ཝ་ ལེགས་པའི་ནགས་ཚལ་གྱི་སྦུག་ན་ལས་ རིན་པོ་ཆའི་འཁྲི་ཡངས་ཤིང་རྒྱ་ཆེ་བ་གཅིག་གུ་ སངས་རྒྱས་སྣང་བ་མཐའ་ཡས་མཚན་བཟང་པོ་སུམ་ཅུ་རྩ་གཉིས་དང་དཔེ་བྱེད་བཟང་པོ་བརྒྱད་ཅུ་གིས་བརྒྱན་པ་ཅིག་བཞུགས་ སངས་རྒྱས་དེའི་ཐུགས་ཀ་ལས་འོད་ཟེར་འཕྲོས་ འདི་ཡུམ་ལུ་ཕོག་ བཀྲ་ཤིས་པ་དང་ཕུན་སུམ་ཚོགས་པའི་ཚིགས་འདི་ཚུ་བརྗོད་འདི་ཡུམ་ལུ་མེ་ཏོག་གཏོར་བའི་རྨི་ལམ་མཐོང་ནི་དང༌ དེ་བཟུམ་སྦེ་ར་ཡུམ་མོ་ར་ལྷ་སའི་གཙུག་ལག་ཁང་ནང་ལུ་བྱོན་པའི་རྨི་ལམ་མཐོང༌ ལྷ་སའི་གཙུག་ལག་ཁང་ནང་ལུ་ལྷོདཔ་ད་མོ་རའི་སྐུ་གཟུགས་ལས་ཉིན་ཟླ་ཤར་ དུང་དཀར་གྱི་སྒྲ་ལན་གསུམ་བྱུང་ སྤྱི་བོར་ལུ་རྒྱལ་མཚན་གྱིས་བརྒྱན་ ཡུམ་གྱི་གཡས་ཁ་ཐུག་ལུ་དར་འཕྱར་ གཡོན་ཁ་ཐུག་ལས་འཇའ་མཚོན་སྤུབ་ གདོང་ཁ་ལས་རྔ་དང་དུང་ལ་སོགས་པའི་སྒྲ་བྱུང་ རྒྱབ་ལས་ཆོས་བཤད་པའི་སྒྲ་འདི་ཚུ་བྱུང་བའི་རྨི་ལམ་དེ་སྦེ་མཐོང་ནུག། དེ་ལས་གྲུབ་ཐོབ་ཆེན་པོ་ཡུམ་གྱི་ལྷུམས་སུ་ཟླ་ངོ་བཅུ་གཉིས་བཞུགས་ཚར་འདི་ཤུལ་ལུ་ རབ་བྱུང་དྲུག་པའི་ལྕགས་མོ་གླང་ལོ་ སྤྱི་ལོ་ ༡༣༦༡ ཆོས་འཕྲུལ་ཟླ་བའི་ཚེས་བཅུ་ལུ་ བོད་ཀྱི་རྒྱལ་ཁབ་གཙང་འོལ་བ་ལྷ་རྩེ་ཟེར་ས་ལུ་ མཁའ་འགྲོ་མའི་མཚན་རྟགས་དང་ལྡན་པའི་ཡུམ་རྒྱ་གར་ལྷ་མོ་དང་ཡབ་རྡོ་རྗེ་རྒྱལ་མཚན་གྱི་སྲས་འབད་ གུང་ལས་ཉི་མ་ཤར་ནི་དང་འཁྲིལ་འདི་ ཞལ་ལས་ༀ་མ་ཎ་པདྨེ་ཧཱུྃ་ ཟེར་བའི་སྒྲ་སྒྲོག ལུས་རྣམ་སྣང་གི་ཆོས་བདུན་ལུ་བསྐྱལ་འདི་སྐུ་འཁྲུངས་ནུག། དེ་ལས་ཁོ་རའི་ཡབ་ཀྱིས་དེ་བཟུམ་གྱི་མཛད་རྒྱ་ལུ་བལྟ་ཡ་མཚན་ཆེ་ ངོ་མཚར་འདི་ཡུམ་ལུ་ག་དེ་སྦེ་གསུངས་ནུག་ཟེར་བ་ཅིན་ རྒྱ་གར་ལྷ་མོ་ ཁོ་ལྷུམས་སུ་བཞུགས་པའི་དུས་འདི་ལས་འགོ་བཟུང་ཁྱོད་ལུ་རྨི་ལམ་བཟང་ངན་ལེགས་ཤ་ཅིག་ར་མཐོང་ ཨ་ལོ་གཞན་དང་མ་འདྲཝ་འབད་མངལ་ལུ་ཡང་ཟླ་ངོ་ ༡༢ སྡོད་ ད་སྐྱེཝ་ད་ཡང་གཞན་དང་མ་འདྲ་བའི་སྤྱོད་པ་ལེགས་ཤ་ཅིག་ར་སྟོན་ནི་འདུག་ འདི་ག་ཅི་གི་རྟགས་མཚན་ཨིན་ན་སྨོ་ཟེར་ དེ་འབད་གསུངམ་ད། དེའི་ལན་ལུ་གྲུབ་ཐོབ་ཀྱིས་ག་ཅི་གསུངས་ནུག་ཟེར་བ་ཅན། ཁ་སང་ཟླ་བ་སྔ་མ་ཡི། །རྨི་ལམ་མཚན་རྟགས་དེ་རྣམས་ལ། །ཡབ་ཡུམ་མི་དགའ་བྱ་མི་དགོས། །བརྡ་འགྲོལ་འམ་བུས་བཤད་ཀྱིས་ཉོན། །ང་ལྷུམས་སུ་བཞུགས་པའི་སྐབས་ཀྱི་རྟགས་དང་མཚན་མ་འདི་ཚུ་ལུ་ཡབ་དང་ཡུམ་གཉིས་དགའཝ་དང་མ་དགའཝ་ག་ནི་ཡང་བསྐྱེད་མི་དགོས་ འདི་ཚུ་ག་ཅི་གི་རྟགས་མཚན་ཨིན་ན་ང་གིས་བཤད་གེ་ཟེར་གསུངས་བཞིནམ་ལས་ ཡབ་ཡུམ་ལུ་ལན་ག་དེ་སྦེ་གསུངས་ནུག་ཟེར་བ་ཅིན་ གཙུག་ལག་སྟེང་དུ་ཕྱིན་པ་དེ། །ས་ལམ་རིམ་པར་བགྲོད་པའི་རྟགས། །ལུས་ལ་ཉིན་ཟླ་ཤར་བ་དེ། །མ་རིག་མུན་པ་སེལ་བའི་རྟགས། །དུང་དཀར་ལན་གསུམ་འབུད་པ་དེ། །འགྲོ་དོན་སྙན་གྲགས་བྱུང་བའི་རྟགས། །སྤྱི་གཙུག་རྒྱལ་མཚན་བཙུགས་པ་དེ། །བསྟན་པའི་རྒྱལ་མཚན་འཛིན་པའི་རྟགས། །ཡུམ་གྱིས་ལྷ་ས་གི་གཙུག་ལག་ཁང་ནང་འགྱོ་བའི་རྨི་ལམ་མཐོང་མི་འདི་ ངེད་ཀྱི་རྒྱུད་ལུ་ས་ལམ་གྱི་རྣམ་བཞག་འདི་ཚུ་ཡར་ངོའི་ཟླཝ་བཟུམ་སྦེ་གོང་འཕེལ་འགྱོ་ནིའི་རྟགས་མཚན་ཨིན། ཡུམ་གྱི་སྐུ་གཟུགས་ལུ་ཉིན་ཟླ་ཤར་བའི་རྨི་ལམ་མཐོང་མི་འདི་ ང་གིས་སེམས་ཅན་གྱི་རྒྱུད་ཀྱི་མ་རིག་པའི་མུན་པ་སེལ་ནིའི་རྟགས་མཚན་ཨིན། དུང་དཀར་གྱི་སྒྲ་ཚར་གསུམ་བྱུང་མི་འདི་ངེད་ཀྱི་འགྲོ་དོན་དང་འཕྲིན་ལས་འདི་འཇིག་རྟེན་གྱི་ཁམས་ནང་སྙན་གྲགས་འགྱོ་ནིའི་རྟགས་ཨིན། སྤྱི་གཙུག་ལུ་རྒྱལ་མཚན་གྱིས་བརྒྱན་མི་དེ་ ང་གིས་སངས་རྒྱས་བསྟན་པའི་རྒྱལ་མཚན་འཛིན་ནིའི་རྟགས་མཚན་ཨིན་པས་ཟེར་ ཡུམ་གྱི་རྨི་ལམ་དང་འཁྲིལ་དེ་རྟགས་མཚན་འདི་ཚུ་རིམ་པ་བཞིན་བཤད་དེ་ ལན་འདི་ཚུ་ཡ་མཚན་ཆེ་ཏོག་ཏོ་འབད་གསུངས་གནང་ནུག། ཡབ་རྡོ་རྗེ་རྒྱལ་མཚན་དང་ཡུམ་རྒྱ་གར་ལྷ་མོ་གཉིས་ལུ་རིགས་ཀྱི་མྱུ་གུ་ སེ་རོ་དཔལ་ལྡན་ སློབ་དཔོན་དཔལ་ཚུལ་ འཕན་པོ་ སྔ་དར་ ཁྲོ་བོ་དཔལ་ལྡན་ ལྕམ་མོ་དཔལ་འཛིན་རྡོ་རྗེ་མ་ཟེར་སྤུན་ཆ་དྲུག་ཡོད་ས་ལས་ ཁྲོ་བོ་དཔལ་འཛིན་ཟེར་མི་འདི་དུས་ཤུལ་མ་གྲུབ་ཆེན་ཐང་སྟོང་རྒྱལ་པོ་ཟེར་བའི་མཚན་ཡོངས་སུ་གྲགས་ཡོད་མི་དེ་ཨིན་པས། འདི་བཟུམ་གྱི་སྐྱེས་ཆེན་དམ་པ་དེ་ ང་བཅས་ར་གིས་མཇལཝ་ད་ག་དེ་འབད་མཇལ་ནི་ཡོདཔ་མོ་ཟེར་བ་ཅིན་ འཕྲལ་འཕྲལ་ཁྲོ་བོ་སྦེ་མཇལ་དོ་བཟུམ་དང་ འཕྲལ་འཕྲལ་ཞི་བ་སྦེ་མཇལ་དོ་བཟུམ་ དེ་བཟུམ་སྦེ་ར་ཁྲེལ་ཁྲེལ་ཞི་བ་དང་ཁྲོ་བོ་གཉིས་ཆ་ར་ཨིན་དོ་བཟུམ་སྦེ་མཇལ་ནི་ཡོདཔ་ཨིན། དེ་འབད་མཇལ་ནི་ཡོད་མི་འདི་ཡང་ཨྱོན་གུ་རུ་རིན་པོ་ཆེའི་ཟབ་ཆོས་ཐུགས་ཀྱི་གཏེར་ལས་ ཞི་བ་ཐུགས་རྗེ་ཆེན་པོ་དང༌། །དྲག་པོ་ཁྲོ་བོ་དབང་ཆེན་གཉིས། །དབྱེར་མེད་གཅིག་ཏུ་སྦྲུལ་པ་ལས། །སྐུའི་ཆ་ལུགས་ཞི་མ་ཁྲོ། ། ཟེར་གསུངས་དོ་བཟུམ་སྦེ་ གྲུབ་ཐོབ་རིན་པོ་ཆེ་མཆོག་ཞི་བ་ཐུགས་རྗེ་ཆེན་པོ་འཕགས་པ་སྤྱན་རས་གཟིགས་དང་ ཁྲོ་བོ་དབང་ཆེན་རོལ་པ་དཔལ་རྟ་མགྲིན་གཉིས་ཟུང་དུ་འཇུག་པའི་རྣམ་སྤྲུལ་འབད་ནི་འདི་གི་འཕྲལ་འཕྲལ་ཁྲོ་བོ་དང་ འཕྲལ་འཕྲལ་ཞི་བ་འབད་མཇལ་ནི་ཡོད་མི་འདི་ འདི་ལས་བརྟེན་འདི་ཨིན།ཁོ་རང་སྐུ་ཟླ་ཆུང་ཀུ་བསྒང་ལས་ཐབས་ལུ་མཁས་པ་དང་ རིག་པ་གཞན་དང་མ་འདྲཝ་སྦེ་ཡོད་ནི་འདི་གིས་ ཁོ་རའི་ཡབ་ཡུམ་གཉིས་ཀྱིས་དགོན་པ་བྱང་སྡིངས་ཟེར་ས་ལུ་སློབ་དཔོན་ཆོས་སྐྱོང་དཔལ་ལས་སྒྲ་རིག་པའི་གཞུང་རིག་གནས་འདི་ཚུ་སློབ་སྦྱོང་འབད་ཝ་ བསྐྱལཝ་ད། ཁོ་ཐབས་ཤེས་འགྲན་ཟླ་དང་བྲལ་བ་ཅིག་འབད་ནི་འདི་གིས་ དུས་ཡུན་ཐུང་ཀུ་ཅིག་ནང་བོད་ཡིག་ལཉྩ་དང་ཝརྟུ་ སྒྲ་རིག་པའི་གཞུང་འདི་ཚུ་ལུ་མཁས་པ་མཐོན་ནུག།དེ་ལས་གྲུབ་ཐོབ་ཁོ་རའི་ཡུམ་གྱི་རེ་བ་དང་འཁྲིལ་དེ་ དགོན་པ་བྱང་སྡིངས་ཟེར་ཟ་ལུ་བླམ་ཉི་མ་སེངྒེའི་སྐུ་མདུན་ལུ་རབ་ཏུ་བྱུང་ སྤང་བླང་གི་ཡོན་ཏན་འདི་ཚུ་སྦྱངས་ དེ་བཟུམ་སྦེ་ར་བླམ་དཔལ་འབྱོར་ཤེས་རབ་ལས་མངོན་རྫོགས་ཀྱི་སྡོམ་པ་ཞུ་སྦེ་མཚན་ཡང་བརྩོན་འགྲུས་བཟང་པོ་ཟེར་བཏགས་གནང་ནུག། དེ་ལས་གྲུབ་ཐོབ་ཀྱིས་ལྷ་གདོང་པ་བསོད་ནམས་མཆོག་དང་ཀུན་སྤངས་རིན་ཆེན་རྒྱལ་མཚན་ རེད་མདའ་བ་གཞོན་ནུ་བློ་གྲོས་ལ་སོགས་པའི་དགེ་བའི་གཤེས་གཉེན་ལྔ་བརྒྱ་དེ་ཅིག་སྟོན་ དབང་ལུང་ཁྲིད་གསུམ་དང་གདམས་ངག་བཟང་པོ་འདི་ཚུ་གསན་བཞིནམ་ལས་ ཕྱི་ནང་གསང་གསུམ་གྱི་ཡོན་ཏན་ག་ཅི་གི་ཐད་ལས་འབད་རུང་མཁས་པ་མཐོན་ནུག། གྲུབ་ཐོབ་རིན་པོ་ཆེ་མཆོག་གིས་ཆོ་འཕྲུལ་ཟླ་བའི་ཚེས་བརྒྱད་ཀྱི་དྲོ་པ་ ནམ་མ་ལངསམ་ཅིག་གི་དུས་ཚོད་ནང་ མདུན་གྱི་ནམ་མཁའ་ལུ་འཕགས་པ་སྤྱན་རས་གཟིགས་ཞལ་གཅིག་ཕྱག་བཞི་པ་དང་ བཅུ་གཅིག་ཞལ་ཕྱག་སྟོང་སྤྱན་སྟོང་ལ་སོགས་པའི་ཡི་དམ་དཀྱིལ་འཁོར་གྱི་ལྷ་ཚོགས་འདི་ཚུ་གིས་གཙོས་པའི་སངས་རྒྱས་དང་བྱང་ཆུབ་སེམས་པ་བསམ་གྱིས་མི་ཁྱབ་ཅིག་བསྐོར་འདི་བཞུགས་ས་གཟིགས་འདི་ སྙིགས་མ་ལྔའི་སེམས་ཅན་འདི་ཚུ་ལུ་ཐུགས་བརྩེ་བ་ཆེན་པོའི་སྒོ་ལས་གཟིགས་སུ་གསོལ་ཟེར་བའི་སྨོན་ལམ་དང་བཅསཔ་སྦེ་ དངོས་སུ་འབྱོར་བ་དང་ཡིད་ཀྱིས་སྤྲུལ་པའི་མཆོད་པ་འདི་ཚུ་འཕུལཝ་ད་ འཕགས་པ་སྤྱན་རས་གཟིགས་ཀྱིས་ག་ཅི་གསུངས་ནུག་ཟེར་བ་ཅིན་ ཁ་བ་ཅན་གྱི་ཆུ་ཀླུང་ཆེ་རྣམས་ལ། །གྲུ་དང་རིན་ཆེན་ལྕགས་ཟམ་བརྟན་པོར་ཚུགས། །རྒྱལ་བའི་སྐུ་གསུང་ཐུགས་ཀྱི་རྟེན་བཞེངས་ནས། །སྙིགས་མའི་སེམས་ཅན་བསོད་ནམས་འཕེལ་བར་མཛོད། །ཟེར་གསུངས་པའི་ལུང་བརྟན་དང་འཁྲིལ་འདི་ སྤྱིར་གྱི་འཛམ་བུ་གླིང་དང་བྱེ་བྲག་རྒྱ་བོད་འབྲུག་གསུམ་གྱི་རྒྱལ་ཁབ་ཀྱི་ཞི་བདེ་ལུ་དམིགས་བཞིནམ་ལས་ ལྕགས་ཟམ་ལྔ་བཅུ་ང་བརྒྱད་ ཤིང་ཟམ་དྲུག་ཅུ་ཐམ་པ་ གྲུ་བརྒྱ་དང་བཅོ་བརྒྱད་ སྐུའི་རྟེན་ཆེ་བ་སུམ་ཅུ་སོ་བརྒྱད་ ཆུང་བ་རིན་པོ་ཆེ་སེར་དང་དངུལ་ལ་སོགས་པ་ལས་གྲུབ་པ་བརྒྱ་ལྷགཔ་ཅིག་ དེ་བཟུམ་སྦེ་ར་རྒྱུ་འཇིམ་ལས་གྲུབ་པའི་སྐུ་སྟོང་ཕྲག་ལྔ་དང་ གཙུག་ལག་ཁང་བརྒྱ་དང་ཉི་ཤུ་དེ་ཅིག་བཞེངས་གནང་ནུག། འདི་གི་ཡང་མ་བརྩི་བ་གསུང་གི་རྟེན་བཀའ་འགྱུར་བཅོ་བརྒྱད་ བསྟན་འགྱུར་བཅོ་ལྔ་ རིན་པོ་ཆེའི་མཆོན་རྟེན་བརྒྱ་དང་བཅུ་གཅིག་དེ་ཅིག་གི་བརྩི་བཞེངས་གནང་ནུག། དེ་སྦེ་སྐུ་གསུང་ཐུགས་ཀྱི་རྟེན་དང་གཙུག་ལག་ཁང་མ་རབ་ཅིག་བཞེངས་ཡོད་ས་ལས་ ང་བཅས་རའི་འབྲུག་རྒྱལ་ཁབ་ནང་ལུ་ཕྱག་བཏབ་གནང་ཡོད་མི་འདི་ག་ཅི་ར་སྨོ་ཟེར་བ་ཅིན་ གསེར་ལུང་དགོན་པའི་ལྷ་ཁང་ སྤ་རོ་རྟ་མཆོག་ལྷ་ཁང་ སྤ་རོ་ཟླུམ་བརྩིགས་ལྷ་ཁང་ དབང་འདུས་ཕོ་བྲང་ལུ་ཡོད་པའི་ཤར་ཕྱི་ཐོག་ཁའི་ལྷ་ཁང་འདི་ཚུ་ཨིན། འདི་གི་ཡང་མ་བརྩི་པ་ཆུ་མཛོམ་ལས་སྤ་རོའི་ཕྱོགས་ཁ་ཐུག་ལུ་མཆོད་རྟེན་གཅིག་ སྤ་རོ་སྟག་ཚང་ལུ་མཆོད་རྟེན་གཅིག་དང་སྤ་རོ་རྟ་མཆོག་ལྷ་ཁང་གི་གདོང་ཕྱོགས་ལུ་ཡོད་པའི་ལྕགས་ཟམ་འདི་ཚུགས་གྲུབ་ཐོབ་རིན་པོ་ཆེ་མཆོག་གིས་གསར་བཞེངས་མཛད་གནང་ནུག། སྐུ་གསུང་ཐུགས་ཀྱི་རྟེན་དང་ལྕགས་ཟམ་འདི་ཚུ་བཞེངས་གནངམ་ད་ མི་མང་རབ་ཅིག་ལུ་དཀའ་ངལ་འདི་ཚུ་བྱུང་ མགརཝ་ལ་ལུ་གཅིག་ཆུ་གིས་འབག་འདི་ཤི་རྐྱེན་བྱུང་ འདི་བཟུམ་གྱི་རྐྱེན་ལེགས་ཤ་ར་བྱུངམ་ད་གྲུབ་ཐོབ་ཁོ་རའི་སློབ་མ་འདི་ཚུ་གིས་ཟམ་རྐྱབ་ནིའི་ལཱ་འདི་ལུ་སུན་ ཉམས་འཚེར་འདི་ཁོང་གི་ལཱ་འདི་མི་འབད་ནིའི་མནོ་བསམ་བཏང་སྡོདཔ་ད་ གྲུབ་ཐོབ་རིན་པོ་ཆེ་གིས་དེ་སྦེ་གསུངས་གནང་ནུག རང་གཞན་ཕན་བདེ་སྒྲུབ་དུས་སུ། །སྐྱོ་སུན་གྱིད་ལུགས་བར་ཆད་ཡིན། །སྨྲ་བ་མཁས་ཀྱང་གླུ་ལེན་ཡིན། །རི་ལ་བསྡད་ཀྱང་རི་དྭགས་ཡིན། །གཞན་དོན་གྱི་བྱ་བ་རླབས་ཆེན་པོ་འདི་བཟུམ་ཅིག་སྒྲུབ་ད་སུན་ནི་དང་ཉམས་འཚེར་ནི་འདི་ཚུ་བྱུངམ་འདྲཝ་ཅིག་འབད་བ་ཅིན་ འདི་གཞན་དོན་བསྒྲུབ་པའི་བར་ཆད་ཨིན་ གལ་སྲིད་གཞན་དོན་སྒྲུབ་པའི་སྐབས་ཉམས་འཚེར་སྡོདཔ་འདྲཝ་ཅི་འབད་ཝ་ཅིན་ ཁ་ལས་བསླབ་ནི་ནང་ལུ་ག་དེམ་ཅི་རང་མཁས་རུང་ཞབས་ཁྲ་འཐེན་པའི་སྣང་བ་ཅིག་དང་ སྡོད་ས་རི་ཁྲོད་གངས་ཁྲོད་ལུ་ཨིན་འདི་འབད་རུང་རི་དྭགས་ཀྱི་སྣང་བ་ལས་གཞན་ག་ནི་ཡང་མེད་ འདི་འབད་ནི་འདི་གི་རང་ལུ་ལྟོ་དང་གོས་ག་ཡོད་པའི་འཚོ་བ་ལུ་བརྟེན་བཞིནམ་ལས་རང་གཞན་ག་ར་གྱི་ལུས་དང་སེམས་ལུ་བདེ་བ་སྤྲོད་ཚུགས་པའི་ལཱ་ལུ་བརྩོད་ད་ཟེར་གསུངམ་ད། ཁོ་རའི་སློབ་མ་འདི་ཚུགས་ཡང་མི་ཕྱེད་པའི་དད་པ་དང་ ཡིད་ཆས་ཀྱི་བསམ་པ་ཀུན་ནས་བླངས་བཞིནམ་ལས་ སྟོན་པ་དང་སེམས་ཅན་གྱི་འགྲོ་དོན་ལུ་སྔར་བ་ལྷགཔ་སྦེ་བརྩོན་གནང་ནུག། དེ་སྦེ་བསྟན་པ་དང་སེམས་ཅན་གྱི་འགྲོ་དོན་མ་རབས་ཅི་བྱུང་ཚར་བའི་ཤུལ་མ་ དུས་ནམ་ཅིག་གི་ཚེ་གྲུབ་ཐོབ་ཆེན་པོ་ བོད་ཀྱི་རྒྱལ་ཁབ་གཙང་རྒྱས་སྡེའི་ཐང་ཟེར་མི་ནང་གཟིགས་སྐོར་ན་བྱོནམ་ད་ མདུན་གྱི་ནམ་མཁའ་ལས་གཙོ་མོ་ཡཻས་ཀྱི་མཁའ་འགྲོ་མ་ དབུས་ཕྱོགས་བུདྡ་རིགས་ཀྱི་མཁའ་འགྲོ་མ་ ཤར་རྡོ་རྗེ་རིགས་ཀྱི་མཁའ་འགྲོ་ ལྷོ་རིན་ཆེན་རིགས་ཀྱི་མཁའ་འགྲོ་ ནུབ་པདྨ་རིགས་ཀྱི་མཁའ་འགྲོ་ བྱང་ཀརྨ་རིགས་ཀྱི་མཁའ་འགྲོ་ལ་སོགས་པའི་རིགས་ལྔའི་མཁའ་འགྲོ་མ་ སྐུ་གཟུགས་ལུ་རིན་པོ་ཆེའི་རྒྱན་ཆ་སྣ་ཚོགས་ཀྱིས་བརྒྱན་ དཀཪ་སེཪ་དམར་ལྗང་ལ་སོགས་པའི་འོད་སྣ་ཚོགས་འཕྲོས་བཞིནམ་ལས་ སྙན་པའི་དབྱངས་དང་ བཅས་འདི་གྲུབ་ཐོབ་རིན་པོ་ཆེ་ལུ་དེ་སྦེ་ཞུ་ནུག རྒྱས་སྡེ་ཐང་ན་བཞུགས་པ་ཡི། །ཡ་མཚན་ཆེ་བའི་མི་འདི་ལ། །འདིར་ཚོགས་བུ་མོ་རྣམ་ལྔ་ཡིས། །དོན་དང་མཐུན་པའི་མིང་རེ་འདོགས། །ཟེར་གསུངས་འདི་ རིགས་ལྔའི་མཁའ་འགྲོ་མ་ལྔ་གིས་གྲུབ་ཐོབ་ཆེན་པོའི་སྤྱོད་པ་དང་མཐུན་པའི་མིང་ལྔ་གསོལ་གནང་ནུག། དེ་སྦེ་བཏགས་གནང་ས་ལས་ཐང་སྟོང་རྒྱལ་པོ་ཟེར་བའི་མཚན་དེ་ཡང་དེའི་སྐབས་མཁའ་འགྲོ་མ་ལྔ་གིས་ ཁྱབ་བརྡལ་ཆེན་པོའི་ཐང་ཆེན་ན། །སྟོང་ཉིད་རྟོགས་པའི་རྣལ་འབྱོར་པ། །འཇིགས་མེད་རྒྱལ་པོ་ལྟ་བུར་བཞུགས། །དེ་ཕྱིར་ཐང་སྟོང་རྒྱལ་པོར་ཐོགས། །ཟེར་བའི་ལུང་བསྟན་དང་བཅསཔ་སྦེ་བཏགས་གནང་ནུག། དེ་ལས་བདག་ཅག་གི་སྟོན་པ་སངས་རྒྱས་ཤཀྱ་ཐུབ་པ་མཆོག་ འཆི་བདག་གི་བདུད་བཅོམ་ཚར་བའི་སྐྱེས་བུ་ཅིག་འབད་ནི་འདི་གིས་ ཤི་མ་ཤི་གི་རྣམ་བཞག་མེད་འདི་འབད་རུང༌ འདུལ་བྱ་སེམས་ཅན་རྣམས་ལུ་ཚེ་རྟག་འཛིན་གྱི་ལོག་རྟོག་སེལ་ནིའི་ཆེད་དུ་ མཛད་པ་ཐ་མ་སྐུ་མྱ་ངན་ལས་འདས་པའི་ཚུལ་སྟོན་གནང་དོ་བཟུམ་སྦེ་ གྲུབ་ཐོབ་ཆེན་པོ་ཡང་སྐུ་ མི་འགྱུར་བ་རྡོ་རྗེ་ཚེའི་དངོས་གྲུབ་ཐོབ་ཚར་བའི་སྐྱེས་བུ་ཅིག་འབད་ནི་འདི་གི་ སྐུ་ཚེ་འབུམ་ཕྲག་ལས་འབུམ་ཕྲག་སྦེ་བཞུགས་དགོ་རུ་ཡང་བཞུགས་ཚུགས་པའི་སྐྱེས་བུ་ཅིག་ཨིན་པས། ཨིན་རུང་འདུལ་བྱའི་སེམས་ཅན་ཚུ་ལུ་འདུས་བྱས་ཀྱི་ཆོས་ཐམས་ཅད་མི་རྟག་པ་ཨིན་ཟེར་བའི་དོན་དང༌ སྐྱེས་ཚར་བའི་དུས་འདི་ལས་འགོ་བཟུང་དུས་ནམ་ཅིག་གི་ཚེ་འཆི་བ་མི་རྟག་པ་ཟེར་མི་འདི་ལུ་ཐུག་དགོཔ་ངེས་ཏིག་ཨིན་ཟེར་བའི་ དོན་སྟོན་གནང་ནིའི་དོན་ལུ་སྐུ་མྱ་ངན་ལས་འདས་པའི་ཚུལ་སྟོན་འདི་ ཤིང་མོ་སྦྲུལ་ལོ་ སྤྱི་ལོ་ ༡༤༨༥ ཆོ་འཕྲུལ་ཟླ་བའི་ཚེས་ ༤ ལུ་ཞིང་ལུ་གཤེགས་གནང་ནུག[༡] སྐུ་ཡི་རྣམ་འགྱུར་མཚན་སྙན་ཙམ་གྱིས་ཀྱང༌། །སྲིད་ཞིའི་གུད་སེལ་ཡེ་ཤེས་མཆོག་སྟེར་ནུས། །མཚུངས་མེད་གྲུབ་ཐོབ་ཆེན་པོའི་རྣམ་ཐར་བཞིན། །རྟེན་འདིར་མཐོང་བའི་ཆོས་ལ་མངོན་གྱུར་ཤོག །སྤྱི་ཚེས་ ༠༢/༠༨/༢༠༢༤ ལུ་ཡོངས་འབྲེལ་གྱི་ཐོག་ལུ་བཀྲམ་སྤེལ་འབད་ཡོད།
དབྱིན་སྐད
[ཞུན་དག]- མཛད་པ་པོ: Gerner, Manfred; མིང: Chakzampa Thangtong Gyalpo [ISBN 99936-14-39-4] - དཔལ་འབྲུག་ཞིབ་འཇུག་ལྟེ་བ
- མཛད་པ་པོ: Stearns, Cyrus; མིང: King of The Empty Plan: The Tibetan Iron Bridge Builder Tangtong Gyalpo [ISBN 978-1-55939-275-4]
འབྲེལ་མཐུད
[ཞུན་དག]- TBRC P2778 ཐང་སྟོང་རྒྱལ་པོ - ནང་བསྟན་དཔེ་ཚོཊ་ལྟེ་གནས
- ཐང་སྟོང་རྒྱལ་པོ - རང་འབྱུང་ཡེ་ཤེས་ཝི་ཀི
- ཐང་སྟོང་རྒྱལ་པོ - རིག་པ་ཝི་ཀི
- བླ་མ་ཐང་སྟོང་རྒྱལ་པོ - ཧི་མ་ལ་ཡན་གྱི་ ལག་རྩལ་འབྱུང་ཁུངས