Jane Naana Opoku-Agyemang

Jane Naana Opoku-Agyemang (22 November 1951) ^[1] nye Ghanatɔ agbalẽnyala kple dunyahela si le dɔ wɔm fifia abe Ghana ƒe dukplɔla ƒe kpeɖeŋutɔ enyilia le Dukplɔla John Mahama ƒe kpɔkplɔ te tso January 7, 2025 dzi^[1]^[2]. Tsã la, enye Sukudede ƒe Nyawo dzikpɔla tso February 2013 va ɖo January 2017 le Dukplɔla Mahama ƒe dziɖuɖu gbãtɔ te^[3]. Enye nufialagã, eye wònye nyɔnu gbãtɔ si nye dziɖuɖumegã ƒe kpeɖeŋutɔ le dukɔa ƒe yunivɛsiti aɖe me le Ghana esime wòxɔ dɔ abe Cape Coast Yunivɛsiti ƒe dziɖuɖumegã ƒe kpeɖeŋutɔ ene^[1]. Ewɔ dɔ abe Nyɔnuwo ƒe Yunivɛsiti si le Afrika le Zimbabwe ƒe kplɔla ene vaseɖe esime wòɖe asi le dɔ ŋu le August 2024^[3]^[4].

Le December 2020 ƒe Ghana dukplɔla ƒe tiatia me la, Opoku-Agyemang nye amesi John Mahama tia be wòanye eƒe kpeɖeŋutɔ le NDC ƒe akpaa ƒe tikiti dzi^[5]^[6]^[7]. Wogatiae ake be wòanye Mahama ƒe duɖimekeke zɔhɛ le ƒe 2024 me eye wòɖu dzi, eye wòzu nyɔnu dukplɔla ƒe kpeɖeŋutɔ gbãtɔ^[2]. Woɖua azã na Opoku-Agyemang le esi wògbã mɔxenuwo eye wòɖo ŋutinya me nu veviwo gbɔ le Ghana ƒe agbalẽnyalawo kple dunyahehe me ta^[8]^[9]^[10].

Ðevimenɔɣi kple Sukudede

Wodzi Opoku-Agyemang le 22 November 1951 le Cape Coast, Ghana be Jane Naana Sam. Ede Anglikan Nyɔnuviwo ƒe Suku le Koforidua kple Aburi Presby Nyɔnuviwo ƒe Suku. Emegbe exɔ eƒe sekɛndrisuku le Wesley Nyɔnuviwo ƒe Sekɛndrisuku le Cape Coast tso ƒe 1964 va ɖo ƒe 1971. Ewu B.Ed. (Hons) nu le Eŋlisigbe kple Fransegbe me le Cape Coast Yunivɛsiti le ƒe 1977 me. Exɔ Diploma le Fransegbe me Nusɔsrɔ̃ Deŋgɔwo me le Dakar Yunivɛsiti eye wòxɔ eƒe master ƒe ɖaseɖigbalẽ kple Ðɔkta ƒe ɖaseɖigbalẽ le York Yunivɛsiti le Toronto, Ontario, Canada le ƒe 1980 kple 1986 me^[1].

Dᴐwᴐna

Sukudede ƒe dɔwɔwɔ

Opoku-Agyemang fia nu eye wòwɔ dɔ le Cape Coast Yunivɛsiti, tso ƒe 1986 me. Ewɔ dɔ vovovowo le sukudede me siwo dometɔ aɖewoe nye: Eŋlisigbe ƒe Dɔwɔƒe ƒe Tatɔ, Aɖaŋudɔwo ƒe Dɔwɔƒe ƒe Tatɔ, Adehye Hall ƒe Dzɔla, Valco Trust Fund Post-Graduate Hostel, kple Sukunuwuwu Nusɔsrɔ̃ kple Numekuku ƒe Suku ƒe Tatɔ Gɔmeɖola^[11]. Tso ƒe 1997 me la, exɔ Dukɔwo Dome Hehenasuku le Afrikatɔ siwo le duta ƒe Ŋutinya kple Dekɔnuwo me ƒe Sukudede ƒe Dɔdzikpɔla ƒe ɖoƒe. Tso ƒe 2008 va ɖo ƒe 2012 me la, enye yunivɛsitia ƒe Dukplɔla ƒe kpeɖeŋutɔ. Edze dɔ gɔme le October 1, 2008 dzi, eye wòxɔ ɖe Emmanuel Addow-Obeng teƒe .

Le March 2007 me la, enye agbalẽnyala atɔ̃ siwo wotia be woaƒo nuƒo le Kluvinyenye Ðeɖeɖa ƒe Ƒe 200 lia ɖuɖu me le Dukɔ Ƒoƒuawo ƒe Dɔwɔƒegã le New York City la dometɔ ɖeka^[12].

Le October 2009 me la, wotiae be woanye Ghana teƒenɔla le Dukɔ Ƒoƒuawo ƒe Sukudede, Dzɔdzɔmeŋutinunya kple Dekɔnuwo Habɔbɔ (UNESCO) ƒe dɔdzikpɔha me^[13].

Le October 26, 2018 dzi la, eva zu Nyɔnuwo ƒe Yunivɛsiti le Afrika si le Zimbabwe ƒe kplɔla^[4]^[14].

Nuŋlɔla

Opoku-Agyemang nye agbalẽŋlɔla. Nusiwo dzi wòléa ŋku ɖo dometɔ aɖewoe nye Agbalẽŋɔŋlɔ si me wòléa fɔ ɖe Nyɔnu siwo tso Ghana ŋu, Nuƒoƒo ƒe agbalẽwo le Ghana kple Afrika, Kadodo ƒe ŋutetewo kple Nyawo le Afrikatɔwo ƒe Dutadukɔwo me. Abe agbalẽnyala ene la, eŋlɔ nu eye wòtae ɖe agbalẽnyalagãwo ƒe magazinewo me eye wògblɔ nyatiwo le takpekpe vovovowo me siwo dometɔ aɖewoe nye le Kluvinyenye Ðeɖeɖa ƒe Ƒe 200 lia me le Dukɔ Ƒoƒuawo ƒe Dɔwɔƒegã le New York City ^[12].

Eƒe Agbenɔnɔ

Opoku Agyemang nye Kristotɔ si subɔna kple Methodist hamea^[15]^[16].

Eɖe ehati agbalẽnyala, Edmund Opoku-Agyemang eye wo ame evea dzi vi etɔ̃, Kweku Opoku-Agyemang^[17], Kwabena Opoku-Agyemang kple Maame Adwoa Opoku-Agyemang^[18].

References

[:0-1] 1.0 ^1.1 ^1.2 ^1.3 https://www.ghanaweb.com/person/Naana-Jane-Opoku-Agyemang-2917

[:1-2] 2.0 ^2.1 https://3news.com/news/prof-jane-naana-opoku-agyemang-is-now-ghanas-first-female-vice-president/

[:2-3] 3.0 ^3.1 https://live.worldbank.org/en/experts/j/jane-naana-opoku-agyeman

[:3-4] 4.0 ^4.1 https://100women.avancemedia.org/janenaanaopokuagyemang/

[5] ttps://citinewsroom.com/2020/07/mahama-picks-jane-naana-opoku-agyemang-as-running-mate-for-2020-polls/

[6] ttps://www.graphic.com.gh/news/politics/official-mahama-selects-prof-naana-opoku-agyemang-as-running-mate.html

[7] ttps://www.bbc.com/pidgin/tori-53314540

[8] ttps://www.ghanaweb.com/GhanaHomePage/features/Let-s-celebrate-Professor-Jane-Naana-Opoku-Agyemang-as-first-female-vice-president-of-Ghana-1966887

[9] ttps://starrfm.com.gh/2025/01/actionaid-ghana-celebrates-prof-naana-jane-opoku-agyeman-as-ghanas-first-female-vice-president/

[10] ttps://www.ghanaweb.com/blogs/historicaccount/Celebrating-Professor-Jane-Naana-Opoku-Agyemang-A-Trailblazer-for-Women-s-Leadership-in-Ghana-Fred-Sebi-Doku-Goodman-writes-7361

[11] ttps://citinewsroom.com/2024/03/profile-of-prof-naana-jane-opoku-agyemang/

[:4-12] 12.0 ^12.1 https://www.un.org/press/en/2007/note6071.doc.htm

[13] ttps://www.worldsofeducation.org/en/detail/2112/ghana-nagrat-supporter-appointed-as-education-minister

[14] ttps://www.graphic.com.gh/news/general-news/prof-naana-opoku-agyemang-appointed-chancellor-of-women-s-university-in-africa.html

[15] ttps://starrfm.com.gh/2024/03/profile-of-professor-jane-naana-opoku-agyemang/

[16] ttps://www.modernghana.com/news/1020762/thanksgiving-service-held-for-prof-naana-jane.html

[17] ttps://www.kwekuopokuagyemang.com/biography/

[18] ttps://web.archive.org/web/20230604003606/https://www.ghgossip.com/here-are-all-the-children-of-prof-jane-naana-opoku-agyeman-who-are-all-doctorate-degree-holders/

[1]

[2]

[3]

[4]

[5]

[6]

[7]

[8]

[9]

[10]

[11]

[12]

[13]

[14]

[15]

[16]

[17]

[18]