Asia Muhammad
|
C'l artìcul chè 'l è scrit in
Miranduléś |
L’Asia Muhammad (Long Beach, 4 'd Avrìl dal 1991) l'è na tenìsta americàna prufesiunìsta da 'l 2007, surèla dal śugadōr ad basket Shabazz Muhammad.
L'è élta 173 cm, la dróa al bras dèstar e la tira 'l arvèrs a dū maṅ. La stà a Las Vegas.
In dla sò caréra l'è rivàda a èsar la nùmar duśènt-quaràntatri dal mónd al 22 ad Setémbar dal 2014 e l'à vins dū turnèo ITF in singulàr e ùnd'ś in dópi.
Caréra
In dal 2007 la Muhammad la vins a séd'ś an 'l ITF da déś-mila dòlar ad Houston. In dal 2008 la śōga al sò prim turnèo a Las Vegas in Mars e la riva subìt in finàł. Dòp avér mandâ a cà la Madison Brengle la pèrd però da la Camille Pin par 4-6 1-6. In Avrìl la s qualìfica par 'l ITF ad Dothan baténd in dū set la Melanie Oudin andànd pò fóra in di utùṿ cun la Bethanie Mattek-Sands. In dal 2009 la próa a qualificàr-as par gl'US Open ma la n gh la cava briśa pardénd da l'Anastasija Rodionova. A la fiṅ d'l an la riva in di quàrt a Las Vegas in dua la céd par 3-6 2-6 a la rusa Regina Kulikova.
In dal 2010 la riva in di quàrt in d'l ITF da sinquànta-mila dòlar ad Carson e ad Lexington. 'L an dòp la fà àtar tant a Raleigh e a Boston. In Setémbar, baténd la Mónica Puig par 3-6 6-4 6-1, la s qualìfica p'r al turnèo 'd Albuquerque par pò pèrd'r in di utùṿ da la Lauren Davis par 1-6 5-7.
In dal 2012 la pōl cuntàr su i quàrt a Sacramento (6-1 4-6 1-6 da la Samantha Crawford) e a Albuquerque in dua la bat in dū set la Madison Brengle ma minga l'Alison Riske. A Las Vegas la và fóra in di utàṿ da la Lauren Davis par 3-6 3-6.
In dal Maǵ dal 2013 la vins al sò secónd tìtul ITF a Raleigh e pò in Setémbar la bat la Taylor Townsend a Las Vegas faghénd gl'utùṿ. Al méś dòp la manda a cà la María Irigoyen e la Nicole Gibbs a Rock Hill farmànd-as sōl in semifinàł cun l'Anna Tatishvili par 2-6 3-6. Chi lē la la bat pò anc in dal turnèo a vgnir ad Florence, sèmp'r in semifinàł, par 6-3 6-3.
In dal 2014 la cata incóra l'Anna Tatishvili in di utàṿ a Daytona Beach e incóra na vòlta la gh'à da pigàr la tèsta sèg. In Maǵ la và fóra a 'l secónd tùr'n ad Grâd in Itàglia da la parmśàna Alberta Brianti ch'la vins 6-3 6-1. In Istâ in d'l ITF da sènt-mila dòlar ad Vancouver, al nùmar dū, la bat l'Urszula Radwańska e la Julija Putinceva prima 'd andàr fóra in semifinàł cun la Lesja Curenko par 4-6 3-6. In Setémbar finalmènt la tōś part a 'l sò prim turnèo WTA a Quebec City e la riva anc a 'l secónd tùran in dua la s férma cun la Shelby Rogers ch'la la bat a fadìga par 6-7 7-6 7-6. In Utóbar l'è bòna ad vìnsar cun la nùmar ssanta-tri dal mónd, la Mirjana Lučić-Baroni.