Byron Looper
|
C'l artìcul chè 'l è scrit in
Miranduléś |
Byron (Low Tax) Looper, nâ Byron Anthony Looper (Cookeville, 15 ad Setémbar dal 1964 - Wartburg, 26 ad Śugn dal 2013) 'l è stâ 'n pulìtic americàṅ dal partî republicàṅ. In dal 1996 al s éra cambiâ 'l nóm davànti a la léǵ sarnénd “Tasi Basi” a 'l pòst 'd “Anthony”.
In d'l Utóbar dal 1998 'l à masâ 'l senadōr demucràtic Tommy Burks ch'al cuncurìva in di elesiòṅ sèg p'r un séǵ a 'l senàt di Stat Unî p'r al stat dal Tennessee. 'L è stâ cundanâ a 'l ergàstul.
Biugrafìa
Uriginàri dal Tennessee, Byron al crés in Geòrgia in du sò pàd'r Aaron al fava 'l suvrintendènt sculàstic. Custrét a mulàr na caréra in dl'acadèmia militàra p'r un prubléma a 'n śnòć, Byron al s iscrìv a l'università e pò 'l próa a far-as strada in pulìtica laurànd p'r Al Gore da 'l 1988 a 'l 1992. In séguit al pasa a i republicàṅ e 'l vîṅ elèt asesōr dal tasi in dla cuntèa 'd Putnam, faghénd na campàggna eleturàla dimóndi péśa a livèl persunàł cónt'r al sò rivàł, in carga da quatórd'ś an.
Rivâ a 'l putēr, “Tasi Basi” al taca a 'mprufitàr-'s-an dmandànd a dla gint ad dar-ag di bèsi in càmbi 'd 'n arbasamènt dal tasi su 'l valōr dal sò cà. A òṅ ch'al s éra rifiutâ 'd ślungàr-ag di bèsi par la sò campàggna eleturàla, Byron al gh'à alvâ 'l tasi finénd acsè in di guàj cun la giustìsia anc se lò al dava la cólpa a i demucràtic ch'i cuntrulàv'n al cungrès dla cuntèa e ch'i gh dàv'n adòs par di mutìṿ pulìtig. Anc la sò èx muróśa, fata sèmpar pasàr par sò mujér par far bèla figùra c'n i sò eletōr, la 'l à denunsiâ p'r èsar stada mulestàda sesualmènt da lò e ès'r armàśa insìnta 'd un putèṅ.
In d'l Agóst dal 1998 al próa a ciapàr la candidadùra dal GOP in dal sèst distrét cungresuàł dal Tennessee e anc p'r un séǵ a 'l Senàt, cavànd-'g-la chè parchè a n gh'éra ninsòṅ àtar republicàṅ a 'l balutàǵ. Al sò rivàł 'l è 'l senadōr dixiecrat Tommy Burks, un demucràtic dal sud ch'l iva vins tut gl'elesiòṅ in dla cuntèa 'd Putnam da vint-i-òt an a 'sta banda e, esénd acsè pupulàr là, tut i sundàǵ i dgìvan ch'l arév vins fàcil anc 'sta vòlta.
“Tasi Basi” 'l iva però strulgâ 'n piàṅ par vìnsar listés in tut al manéri, dasfrutànd un buś dla léǵ eleturàla dal Tennessee ch'la dgiva ch'un candidâ mòrt prima dgl'elesiòṅ al gh'iva da èsar scanślâ da la cursa e ch'al n psiva gnanc èsar rimpiasâ da 'n àtar s'i gh calàvan trénta dè o anc manc da la data fisàda. Byron, dòp avēr cupâ Burks sparànd-ag, al pinsàva 'd avēr-ag la strada spianàda mo invéci la védva dal senadōr in carga, la Charlotte, la gh l'à cavàda listés a candidàr-as vinsénd pò gl'elesiòṅ ciapànd 30.252 vōt cónt'r i 1.531 ad Looper.
Prucesâ p'r umisìdi in dal 2000, “Tasi Basi” 'l è stâ cundanâ a 'l ergàstul parchè di testimòni i 'l ìvan vdû in dal camp in du Burks 'l éra stâ masâ. Byron 'l è pò mòrt par 'n infàrt in parśòṅ quànd al n gh'iva gnanc sinquànt'an.
La sò stòria l'è stada cuntàda in dal prugràma Peccati mortali.