Dal college con furore
|
C'l artìcul chè 'l è scrit in
Miranduléś |
 Fraternity Vacation
| ||
| Dal college con furore | ||
 Cameron Dye e Tim Robbins in na figùra dal film | ||
| Da 'l culéǵ cun furōr 1985 | ||
|---|---|---|
| Regìa: James Frawley | ||
| Scritōr: Lindsay Harrison | ||
| Atōr: Stephen Geoffreys • Sheree J. Wilson Tim Robbins • Cameron Dye • Leigh McCloskey | ||
| Müsica: Brad Fiedel | ||
| Léngua: Ingléś | ||
| Dürä dal film: 94 minüt | ||
| Nasiōṅ: Stat Unî | ||
Dal college con furore (Da 'l culéǵ cun furōr) 'l è na cumèdia americàna dal 1985 ad James Frawley.
In dla culòna sunóra dal film i s càtan tri pès dal Bananarama: Shy Boy, Cruel Summer e Doctor Love.
Sunt
Wendell Tvedt (Stephen Geoffreys) 'l è 'n seciòṅ sfigâ studènt nóṿ 'd un culéǵ d'l Iowa. C'n i bèsi di suo, ch'i gh'aṅ anc 'n apartamènt in Califòrgna, un dè ch'a néva che Dio al la manda al partìs in vacànsa insém a Joe Gillespie (Cameron Dye) e a Larry Tucker dit “màdar” (Tim Robbins), dū mémbar dla cunfratèrnida Theta Pi Gamma ch'i vànan sèg sōl par gusàr-as na quàlc ragasōla fàcila 'd cal bandi là a Palm Spings e parchè 'l paga lò 'l viàś. P'r al fat ch'l è 'n pôc sćiancòṅ cun cal dóni, al sgnōr Tvedt (Max Wright) al dmanda a i dū amìg 'd insgnàr un quàlc truc a sò fiōl p'r andàr a fighi.
Rivâ a destinasiòṅ Larry e Joe i cgnósan la Marianne (Kathleen Kinmont) e la Chrissie (Barbara Crampton) in pisìna. Al dū ragasōli i gh tîn'n adrē subìt p'r andàr a gusàr in cambra, anc s'a gh'è 'n lèt matrimuniàł sōl par lé lōr a n è mia 'n prubléma, tut àtar. Ma l'è tuta na burla parchè al śōvni i gh'aṅ tirâ 'n schèrs, 'd acòrd c'n i mémbar dla cunfratèrnida Beta Ipsilon nemìga di Theta Pi Gamma, Charles Lawlor III dit Chas (Leigh McCloskey) e J.C. Springer (Matt McCoy).
I quàtar ragàs i decìd'n ad far na scumésa su chi 'l s purtarà a lèt par prim la bèla biónda ch'la s cata su 'l balcòṅ dal palàs ad frònt, l’Ashley Taylor (Sheree J. Wilson). Cla nòt lè Joe, Larry e Wendell i vaṅ in discutéca par cgnósar na quànc ragàsa da purtàr-'s a lèt e Wendell al cunfèsa 'd ès'r incóra vìrgin e ch'al n sà mia csa far par tacàr butòṅ, fra 'l àtar 'l à butâ 'l òć su la Nicole Ferret (Amanda Bearse), na śōvna sintàda da par lē in un cantòṅ. Chi àtar dū i gh sugerìs'n ad śibir-ag da bévar o 'd far un bal insém e séns àt'r al gh la cavarà a purtàr-'s-l' a lèt o almànc un buchèṅ in dal parchéǵ a gh pōl anc scapàr.
Wendell al và a sintàr-as darènt a lē pruànd a pagàr-'g un bicér o śibénd-ag 'd balàr ma qvéla lè la n sa squàsa gnanc guardànd da cl'atra banda. Alóra tut vilî al gh diś «A m imàgin dònca ch'un lavursèṅ ad bóca in dal parchéǵ a n s in dascór gnanc» e la Nicole finalmènt la gh rispónd parchè a gh piàś al sò sèns d'l umurìśum. I dū i vànan fóra insém e pò i finìs'n a lèt méntar gl'àtar sò amìg i vàn'n in biànc.
Joe, par vìnsar la scumésa, al próa a śugàr la carta dal cumpatimènt cun l’Ashley, al diś ch'l è stâ lasâ da na ragàsa ch'la pinsàva sōl a i bèsi e adès al gh'à 'n magòṅ dèntar ch'al vrév tōr-as la vita méntar Chas al vōl far al śburòṅ sèg butànd-as śò da 'n aparéć par paracadutàr-'s in dla pisìna in du lē la ciàpa 'l Sōl. Ma l’Ashley la i manda tut a 'l diàvul e la s mét cun Wendell ch'almànc 'l è 'n ragàs sćèt e a mōd.