Dermatòbia hóminis

C'l artìcul chè 'l è scrit in Miranduléś Emiliàn

La mósca Dermatòbia hóminis
La larva magna-carna
Al sò bgòṅ cunfruntâ c'n un dî
Intervènt par tiràr via un bgòṅ


La Dermatòbia hóminis (nóm sientìfic “Dermatobia hominis”, cgnusû anc cuma “Tòrsal”) l'è 'n insèt dla famìja di Oestridae ch'in dla sò fórma ad larva 'l è 'n parasìta d'l óm e dal simi. La viṿ in dl'Amèrica sentràla e in dl'Amèrica dal sud dònca i turìsta ch'i pàsan da 'd là i la pōlan ciapàr anc lōr [1].

I óṿ dla Dermatòbia i finìsan p'r èsar inculâ da 'l insèt atàc a dal sinsàli o dal móschi dòp ch'al gh'è saltâ adòs. Quànd chelōr i s pògian in sla pèl 'd 'l óm par ciuciàr-ag via 'l sangṿ a sucéd ch'al cald dal còrp umàṅ al disfa la còla e i óṿ i càscan śò vrénd-as. Al larvi, ch'i sumìlian dimóndi a i bègatèṅ, i śbuśìsan la pèl c'n i dènt dla bóca e i s insfìlsan dèntar par catàr da magnàr.

In dal gir 'd òt stmani i sa śvilùpan dvintànd di bgòṅ par pò lasàr-as crudàr par tèra dòp èsar vgnû fóra da par lōr. Dòp na stmana i sàltan fóra da par tèra cuma di insèt adûlt.

Tiràr via al bgòṅ, ch'al fà dimóndi spiùra sót-pèl parchè al magna dimóndi, a n è mia fàcil parchè lò al dróa di unsèṅ par tgnir-as stric a la carna. Da 'l mumènt ch'al gh'à biśógn 'd ària par vìvar, a s pōl pruàr a tiràr-ag via 'l fiâ srand la frida cun dal nàst'r adeśìṿ o dal śmalt p'r ungi. Quànd la larva la próa a vgnir fóra 'n pôc par càtar d'l usigèn, a s pōl ciapàr-la cun na pinséta par cavàr via i pēi.

Culegamènt estéran

Nòti

  1. ↑ La sintìva spiùra in cô ma subìt dòp sò marè 'l à tirâ fóra un quèl sénsa sèns! Pandapazzo.com, 22 ad Śugn dal 2015

Àtar prugèt