I gotta warn you, Max don´t have sex with your ex, it will make you life complex, my Max, baby take it easy, Max don´t have sex with your ex, it will knock you off your legs, oh Max, stay cool and just relax.»
A gh'ò da métar-'t in guàrdia, Max minga far-at la tò ex, la tò vita la dvintarév cumplicàda, al mè Max, tó-la dólsa, Max minga far-at la tò ex, al t tirarév via 'l gambi, stà càl'm e pònsa 'n pôc.»
Gl’E-Rotic i èṅ stâ un grup eurodance tedésc, cgnusû principalmènt p'r al sò canti un pôc malnéti e pini ad dópi sèns. Soquànti dal cantànti fémni i aṅ sunâ anc p'r al grup Missing Heart.
Biugrafìa
A 'l inìsi (1994) al grup 'l éra fat da la Lyane Leigh e da Richard Michael Smith dit Raz-Ma-Taz, un cantànt négar, ex śugadōr ad futból americàṅ, nâ in di Stat Unî. Chi lōr i ìvan dâ vita a i braṅ più cgnusû di E-Rotic cuma Max Don't Have Sex With Your Ex (Max minga far-at la tò ex), Fred Come To Bed (Fred vîṅ a lèt), Sex On The Phone (Sès a 'l telèfun), Willy Use A Billy... Boy (Willy, dróa 'l preservatìṿ) e Help Me Dr.Dick (Jut'um Dr.Uśèl). A s trata ad sìngui tut vgnû fóra da 'l 1994 a 'l 1996 (in di prim dū àlbum Sex Affairs e The Power of Sex) ch'i aṅ vindû bèṅ in Germàgna, Finlàndia e Àustria, rivànd da spés in di prim déś pòst.
In séguit al śugàtul al sa śbraga parchè la Leigh la s litga cun al prudutōr David Brandes. 'L è al Śugn dal 1996 e al grup al cambia i cumpunènt tulénd la Jeanette Christensen e Terence d'Arby (a n gh'è briśa da cunfónd'r-al cun al più famóś Terence Trent D'Arby), anc se par cuntràt la Lyane l'à cuntinuâ a dar la sò vóś in fiṅ a 'l 1999. In cal perìud lè i vènan fóra, fra i àtar, i sìngui Fritz Love My Tits (A Fritz i gh piàś'n al mè téti) e Oh Nick Please Not so Quick (Oh Nick par piaśēr minga acsè in présia). In cal méntar chi lē, insém a Raz-Ma-Taz, la sòna da par lē, in dal grup S.E.X. Appeal. In Utóbar dal stés an pò anc d'Arby al fà al valìś esénd rimpiasâ par Ché Jouaner. In cal mèntar gl’E-Rotic i próan a sunàr a 'l Eurovision Song Contest dal 2000 p'r al sò paéś ma i n gh la càvan minga, finénd a 'l sèst pòst in dla faś dal selesiòṅ par la Germàgna.
In dal 2001 la s in và anc la Christensen e la Yasemin Baysal di Das Modul la tōś al sò pòst.
Mémbar
Lyane Leigh (1994 - 1996)
Raz-Ma-Taz (Richard Michael Smith) (1994 - 1996)
Jeanette Christensen (1996 - 2001)
Terence d'Arby (1996 - 1997)
Ché Jouaner (1997 - ?)
Yasemin Baysal (2001 - 2002) (Ex mémbra di Das Modul)