Fausto Brizzi
|
C'l artìcul chè 'l è scrit in
Miranduléś |
Fausto Brizzi (Róma, 15 ad Nuvémbar dal 1968) 'l è 'n regìsta, senegiadōr e prudutōr itagliàṅ. In dla sò caréra 'l à vins un Dàvid ad Dunatèl e dū Nàstar 'd Argìnt.
'L è spuśâ cun l'atōra fiurintìna Claudia Zanella ch'la gh'à dâ na fiōla in dal 2016, la Penelope Nina.
Biugrafìa
Fiōl 'd 'n avucàt cun di urìgini pugléśi, Fausto al s diplòma in regìa a 'l Sèntar Sperimentàł 'd Cinematugrafìa 'd Róma in dal Luj dal 1994. Dòp soquànt lavōr a teàt'r e soquànt curtumetràǵ, da 'l 1994 al taca a scrìvar dal senegiadùri p'r al cìnema par Neri Parenti (cuma Tifosi, Bodyguards - Guardie del corpo, Merry Christmas, Natale sul Nilo) e par dal fiction televiśìvi (Tutti gli uomini sono uguali, Valeria medico legale e Sei forte, maestro).
In dal 2006 al gira 'l sò prim film, Notte prima degli esami, cun Nicolas Vaporidis, Giorgio Faletti e la Cristiana Capotondi, e 'l è subìt un sucès tant ch'la pelìcula la vîṅ candidàda a ùndas Dàvid ad Dunatèl (lò al ciàpa 'l premi p'r al regìsta eśurdiènt) e tri Nàstar 'd Argìnt. Brizzi al gira in séguit dimóndi atri cumèdi ch'i faṅ sù sèmpar dimóndi bèsi cuma Maschi contro femmine (film cun prutagunìsta Fabio De Luigi e la Paola Cortellesi) e Poveri ma ricchi cun Christian De Sica, Enrico Brignano e l'Anna Mazzamauro.
Filmugrafìa
- 2006 - Notte prima degli esami
- 2007 - Notte prima degli esami - Oggi
- 2009 - Ex
- 2010 - Maschi contro femmine
- 2011 - Femmine contro maschi
- 2012 - Com'è bello far l'amore
- 2013 - Pazze di me
- 2013 - Indovina chi viene a Natale?
- 2016 - Forever Young
- 2016 - Poveri ma ricchi
- 2017 - Poveri ma ricchissimi