Gli occhi degli altri
|
C'l artìcul chè 'l è scrit in
Miranduléś |
 I Saw What You Did
| ||
| Gli occhi degli altri | ||
 L'Andi Garrett e la Sara Lane in na figùra dal film | ||
| Gl'òć ad chi àtar 1965 | ||
|---|---|---|
| Regìa: William Castle | ||
| Scritōr: Ursula Curtiss • William P. McGivern | ||
| Atōr: Joan Crawford • John Ireland • Leif Erickson Andi Garrett • Sara Lane • Sharyl Locke • John Archer | ||
| Müsica: Van Alexander | ||
| Léngua: Ingléś | ||
| Dürä dal film: 82 minüt | ||
| Nasiōṅ: Stat Unî | ||
Gli occhi degli altri (Gl'òć ad chi àtar) 'l è 'n thriller dal 1965 ad William Castle girâ in biànc e négar trat da 'l rumànś “Out of the Dark” dl'Ursula Curtiss. In alóra 'l à fat sù un migliòṅ ad dòlar.
In dal 1988 'l è stâ fat 'n arfacimènt par la televiśiòṅ cun David Carradine da 'l tìtul Ho visto cosa hai fatto... e so chi sei! (A-j-ò vdû qvél ch't à fat... e a sò chi 't sē!).
Sunt
Quànd Dave Mannering (Leif Erickson) e sò mujér Ellie (Patricia Breslin) i gh'aṅ da partìr p'r un viàś 'd afâr i vrévan lasàr al sò dū fiōli, la śuvnòta Libby (Andi Garrett) e la putìna Tess (Sharyl Locke), cun la babysitter ma a 'l ùltim qvésta chè la ciàma dgénd ch'la n pōl minga vgnir. I genitōr i partìsan listés anc se la màdar l'è dimóndi in pinsēr.
Durànt la sira a riva a catàr la Libby la sò amìga Kit (Sara Lane) e insém, a n saénd cuśa far, i decìdan ad far di schèrs a 'l telèfun ciamànd dla gint a caś pascànd di nùmar basta ch'a sia in s'l elènc. I partìsan ciamànd dal mujér faghénd finta 'd èsar l'amànta ad sò marè e pò i cuntìnuan bcand qvéi cun di nóm strâṅ cuma Hamburger o Ruby Net. L'ultma burla ch'i mét'n in at l'è qvéla ad dir a chi rispónd: “A-j-ò vdû qvél ch't à fat... e a sò chi 't sē!”. Par sò sfurtùna i ciàm'n òṅ ch'l à péna scurtlâ e saplî sò mujér (Joyce Meadows), Steve Marak (John Ireland). La sò vśina 'd cà, l’Amy (Joan Crawford), na puta in là c'n i an, vdénd al sangṿ in dal sò bagn e lò ch'l iva purtâ via na casabànc durànt la nòt, la capìs incòsa ma l'è cunténta parchè l'è sèmpar stada inamuràda 'd lò e adès, psénd-al ricatàr e cun cl'atra fóra da 'l bali, la pénsa 'd avér-ag camp lìbar.
In cal méntar la Libby la decìd ad purtàr avànti al schèrs andànd a catàr Steve a cà sua par védar cum 'l è fat dabòṅ anc parchè la sò vóś la gh piaśìva dimóndi. Rivàda là però la i tōś da l’Amy ch'la la batéśa cuma l'amànta dal sò óm, avénd arcgnusû la sò vóś méntar la fava 'l schèrs. Chi lē la gh pòrta anc via al librét dla màchina intestâ a sò màdar méntar la la para via dgénd-ag 'd a n far-as mai più védar da cla banda. Quànd Steve al scurtèla anc l’Amy par far fóra una ch'la saìva tròp e ch'la pritindìva 'd andàr a vìvar sèg p'r al rèst dla vita, al lèś 'l indirìs ad cà di Mannering e al tōś la màchina p'r andàr a cupàr anc la Libby.