I, a Man
|
C'l artìcul chè 'l è scrit in
Miranduléś |
 I, a Man
| ||
| I, a Man | ||
 La Valerie Solanas e Baker in na figùra dal film | ||
| Mè, 'n óm 1967 | ||
|---|---|---|
| Regìa: Andy Warhol • Paul Morrissey | ||
| Scritōr: Andy Warhol | ||
| Atōr: Tom Baker • Nico • Valerie Solanas Ingrid Superstar • Ultra Violet • Bettina Coffin Cynthia May • Stephanie Graves • Ivy Nicholson | ||
| Müsica: / | ||
| Léngua: Ingléś • Francéś | ||
| Dürä dal film: 99 minüt | ||
| Nasiōṅ: Stat Unî | ||
I, a Man (Mè, 'n óm) 'l è 'n film dramàtic americàṅ dal 1967 girâ p'r Andy Warhol e par Paul Morrissey.
La pelìcula, ch'l'è stada giràda a New York, l'è la rispòsta 'd Warhol a 'n film eròtic śvedéś dal 1965, I, a Woman. Una dgl'òt dóni ch'al s pòrta a lèt Tom Baker l'è la Valerie Solanas, la femnìsta ch'in dal 1968 la spararà a Warhol. Par cla part chè, ch'la gh'éra stada data cuma cumpensasiòṅ parchè 'l regìsta 'l iva pardû na sò senegiadùra ciamàda „Up Your Ass“, la Solanas l'iva ciapâ in alóra vint-sinc dòlar.
Al prutagunìsta dal film al gh'iva da èsar Jim Morrison di The Doors, Warhol 'l éra in paròla sèg, ma pò 'l cantànt al s è tirâ indrē par dar la part a 'l sò amìg Tom Baker.
Sunt
Tom (Tom Baker) 'l è a lèt a cà dna dóna (Cynthia May) dòp ch'i aṅ fat sès insém. Chi lē la vrév che lò 'l andìs via parchè i sò genitōr i èṅ drē rivàr ma lò al gh'à són e alóra al gh admànda 'd far un cafè ma pò 'l càmbia idèa e 'l gh śibìs invéci 'd far na ciualadìna sóta 'l lèt. A la fiṅ al s sóla 'l braghi e 'l và via.
Na nòt, a na fèsta, Tom al cgnós na ragàsa (Stephanie Graves) ch'la gh'à 'n bèl culét e ch'la fà la scaja 'd mistēr. I fànan sès su 'l divàṅ, da lē. 'L apartamènt in du la viṿ al gh al paga 'n sò cliènt ma a Tom a n gh piàś minga tant la cuśìna parchè l'è piculìna, anc se pò i bagn i èṅ dū.
Tom al dascór a 'n tàvul cun na mudèla ad vint-i-òṅ an (Ingrid Superstar) parchè al vrév far-ag dal foto p'r un servìsi. Al gh diś ch'a sarév méj s'la pardìs un quàlch chilo e ch'la s tgnis adrē da piò, pò al la batéśa la „Regìna di cûi“ dgénd-ag ch'la pâr na befàna. Dòp avér-la fata sténdar su 'l tàvul e avér-la fata dascórar 'd Abraham Lincoln, al gh diś ch'la gh'avév da pagàr-al p'r al tèmp ch'la gh'à fat pèrdar, lò a 'rmàgnar lè cun na dóna ch'la và cun di àt'r óm.
Na ragàsa biónda (Nico) la dascór cun Tom dgénd-ag che sò màdar l'è andàda a star cun di hippies a Ibìśa e ch'la gh'à da far n'uperasiòṅ a 'l sarvèl. 'L óm al gh diś ch'a gh piàś ciacaràr sèg ma pò al gh śibìs ad mét'r-as còmad ma lē la preferìs armàgn'r in pē. I dū i tàc'n a brasàr-as.
Tom al dascór cun na dóna (Ultra Violet) culgàda par tèra di castròṅ di turēr ch'in Spaggna cal dóni i càtan sèxy. Chi lē la gh diś ch'al gh'à di bèi òć e ch'la gh'à sèmpar fréd i pē. I dū i s bàśan dand-as la léngua.
Tom 'l è in na cambra da lèt insém a na ragàsa francéśa, l’Alice (Ivy Nicholson), cun dal sangṿ móngul, tut dū in patàja. Adès l'è matìna e Tom al gh'à da lauràr dònca lē la gh'à da tōr-as sù e andàr via, al gh śibìs anc òṅ di sò calsét acsè la fà prima.
Tom al taca a dascórar p'r al scali 'd un palàs cun na dóna (Valerie Solanas) c'n un capèl da óm in cô ch'la gh diś ch'al gh'à 'l cûl fiàp dòp ch'la gh 'l à tastâ. Lò al diś che s'la vōl far-ag di sfrēg l'è méj andàr dèntar da lē. La dóna la gh rispónd ch'a n s pōl briśa parchè la viṿ cun na ragàsa ma lò al diś ch'i farévan piàṅ e pò al gh śibìs 'd andàr sù e far-as tut dū la sò amìga. Ma la dóna la sa stufa e la và via.
Tom 'l è a lèt cun na dòna spuśàda ad vint-quàt'r an e bèla màdar ch'la vrév far l'atōra ch'la s ciàma Tina (Bettina Coffin). Chi lē la n s arcòrda minga quànd la 'l à cgnusû e gnanc lò e 'l è 'n quèl ch'l al fà incasàr. Pò lē la gh cònta ch'in cà sò marè al n vōl briśa ch'la dróa i spray cónt'r i scaravàś par via d'l udōr. Lò al gh admànda parchè la n pulìs mia bèṅ la cà, s'la 'l flis chi brut insèt lè i n gh sarévan minga, pò a gh dà da far al culōr dal sò mudàndi e 'l fat ch'a vint an l'àppia aburtî.