I Diabolici

C'l artìcul chè 'l è scrit in Miranduléś Emiliàn

Les diaboliques
I Diabolici

La Clouzot e la Signoret in na figùra dal film
I Diabòlic
1955
Regìa: Henri-Georges Clouzot
Scritōr: Pierre Boileau • Thomas Narcejac
Atōr: Simone Signoret • Georges Chamarat
Véra Clouzot • Michel Serrault • Thérèse Dorny
Jean Brochard • Charles Vanel • Robert Dalban
Paul Meurisse • Jean Lefebvre • Zappy Max
Müsica: Georges Van Parys
Léngua: Francéś • Ingléś
Dürä dal film: 114 minüt
Nasiōṅ: Frància


«
Ne soyez pas DIABOLIQUES! Ne détruisez pas l'intéret que pourraient prendre vos amis à ce film. Ne leur racontez pas ce que vous avez vu. Merci pour eux.»
(FR)(Mesàǵ ch'al cumparìs in fónd a 'l film)
«
Minga èsar DIABÒLIC! Mia ruinàr 'l interès ch'i vòst'r amìg i prév'n avér par cal film chè. Briśa cuntàr-ag quél ch'a î vdû. A v ringrasiém par lōr.»
(MUD)


I Diabolici (I Diabòlic) 'l è 'n film thriller in biànc e négar dal 1955 dal francéś Henri-Georges Clouzot trat da 'l rumànś Celle qui n'était plus (Quél ch'a n gh'éra piò, distribuî in Itâglia cuma I Diabolici) ad Pierre Boileau e Thomas Narcejac.

Sunt

In un culéǵ par baghét in di dintóran ad Parì, la diretōra Christina Delassalle (Véra Clouzot), malàda ad cōr, l'è misa sóta ad cuntìnuṿ e tgnuda schisa da sò marè Michel (Paul Meurisse) ch'al gh mét anc i còran e ch'al l'iva spuśàda òt an prima sōl p'r interès. L'amìga e mistra Nicole Horner (Simone Signoret), amànt d'l óm e piciàda da spés anca lē, la la cunvìns che l'ùnica manéra par tar-'g un taj e catàr la libertà, par tuti e dū, la sarés quéla ad cupàr-al e lē la gh'à bèla in mènt un piàṅ parfèt. Durànt un lung fiṅ ad stmana, quànd al culéǵ al sarà sarâ dal tut, al dū dóni i andaràṅ in dla sità in du l'è nada la Nicole, Niort, a déś óri ad màchina da la capitàla francéśa, e pò i faràṅ rivàr lè anc Michel par andgàr-al e purtàr-al pò indrē mòrt, faghénd-al catàr dèntar la pisìna dla scóla. Al piàṅ al vèṅ acsè purtâ a cumpimènt ma quànd pò i tórnan in culéǵ i tàcan a sucédar di quèi straṅ e spavintóś. Al cadàvar al sparìs sénsa che ninsòṅ al al vdis, òṅ di sò vistî al finìs in lavandarìa, e la Christina, pina ad sèns ad cólpa, la s cata acsè in un stravènt ad scarésa.

Quèi curiōś

  • Al film 'l è cgnusû cuma òṅ di prim thriller dla stòria, òpra ad quél ch'l è stâ batśâ cuma 'l Alfred Hitchcock francéś. A far crésar incóra da piò la tensiòṅ a cuntribuìs al fat che in dal film i n gh'ènan minga dal mùśichi. La culóna sunóra, scrita par Georges Van Parys, la cata difàti spasi sōl par 2 minùt e 21 secónd (1:57 in di tìtui ad tèsta e 0:24 a la fiṅ).
  • La pelìcula l'à ciapâ al prèmi Louis-Delluc dal 1954, al prèmi cuma film furastér fat méj a i New York Film Critics Circle Awards dal 1955 e a i Edgar Allan Poe Awards dal 1956.
  • In dal 1996 i americàṅ i aṅ arfàt al film cun al tìtul Diabolique cun la Sharon Stone, Chazz Palminteri, l'Isabelle Adjani e la Kathy Bates.

Culegamènt estéran