Il bacio della morte (film 1947)
|
C'l artìcul chè 'l è scrit in
Miranduléś |
 Kiss of Death
| ||
| Il bacio della morte | ||
.png) Victor Mature in na figùra dal film | ||
| Al baś dla mòrt 1947 | ||
|---|---|---|
| Regìa: Henry Hathaway | ||
| Scritōr: Ben Hecht • Charles Lederer Eleazar Lipsky • Philip Dunne | ||
| Atōr: Victor Mature • Brian Donlevy • Coleen Gray Richard Widmark • Taylor Holmes • Karl Malden Howard Smith • Anthony Ross • Robert Adler Rollin Bauer • Harry Bellaver • Susan Cabot | ||
| Müsica: David Buttolph | ||
| Léngua: Ingléś | ||
| Dürä dal film: 99 minüt | ||
| Nasiōṅ: Stat Unî | ||
Il bacio della morte (Al baś dla mòrt) 'l è 'n film dramàtic americàṅ dal 1947 'd Henry Hathaway.
'L è stâ numinâ, sénsa vìnsar, par dū Prèmi Òscar ma almànc la pelìcula l'è stada premiàda a 'l Fèstival ad Lucàrn par 'l adatamènt p'r al cìnema 'd Ben Hecht e 'd Charles Lederer e a i Golden Globes par 'l atōr masć più prumetènt, Richard Widmark. In dal 1995 al regìsta Barbet Schroeder 'l gh'à fat 'n arfacimènt c'n al stés nóm cun Nicolas Cage.
Sunt
Finî incóra in parśòṅ dòp un furt, Nick Bianco (Victor Mature) al decìd 'd armàgnar sit c'n al vice-prucuradōr Louie DeAngelo (Brian Donlevy) par prutèś'r i cò cumpâr, Pete Rizzo par prim, ch'invéci i l'ìvan fata franca. Chi lò al gh'iva prumìs ch'l arév tgnû adrē a sò mujér e a 'l sò dū putìni pìculi. P'r a n avēr minga testimuniâ cónt'r i mémbar dla sò banda 'd criminài, Bianco al s bèca vint an.
Tri an dòp, méntar 'l è in parśòṅ a Sing Sing insém a 'n àtar boss, Tommy Udo (Richard Widmark), Nick al vîṅ a savēr da i giurnài e da la dóna di fat dla sò famìja, la Nettie Cavallo (Coleen Gray), ch'in cal méntar sò mujér, ch'la s éra misa cun Rizzo, la s éra tòlta la vita dòp èsar finìda in miśèria e ch'al sò dū putìni i éran finìdi in urfanutròfi. A cal punt lè Nick al decìd ad vudàr al sac e 'd testimuniàr cóntar Rizzo e Udo ch'l éra stâ lasàr andàr dòp ésar dvintâ sò amìg da drē da 'l śbari. Par prèmi i giùdas i gh dàn'n al cundòṅ lasànd-al lìbar.
Bianco al s arfà na vita spuśànd la Nettie e, druànd al cugnóm ad sò mujér, al pòrta a cà anc al sò baghéti. Al ròbi i s métan mâł par la sò famìja quànd Udo al vîṅ asòlt da i giùdas a 'l prucès. Chi lò 'l è fàcil ch'adès al vója vindicàr-as dal sò vèć amìg ch'al gh séra mis cóntar. 'D atra part al 'l à bèla fat masànd la màdar 'd Rizzo (Mildred Dunnock), butàda śò p'r al scali sénsa pità su la sò scrana a rudèli soquànt tèmp prima.