Il bacio della morte (film 1995)
|
C'l artìcul chè 'l è scrit in
Miranduléś |
 Kiss of Death
| ||
| Il bacio della morte | ||
.png) Nicolas Cage in na figùra dal film | ||
| Al baś dla mòrt 1995 | ||
|---|---|---|
| Regìa: Barbet Schroeder | ||
| Scritōr: Eleazar Lipsky • Ben Hecht Charles Lederer • Richard Price | ||
| Atōr: David Caruso • Nicolas Cage • Helen Hunt Samuel L. Jackson • Kathryn Erbe • Stanley Tucci Michael Rapaport • Ving Rhames • Angel David | ||
| Müsica: Trevor Jones | ||
| Léngua: Ingléś | ||
| Dürä dal film: 101 minüt | ||
| Nasiōṅ: Stat Unî | ||
Il bacio della morte (Al baś dla mòrt) 'l è 'n thriller 'd asiòn americàṅ dal 1995 ad Barbet Schroeder, arfacimènt dla pelìcula c'n al stés nóm dal 1947.
La pelìcula l'è stada preśentàda a 'l 48śum Fèstival ad Cannes, faghénd pò sù dagnóra quìndas migliòṅ ad dòlar dòp ès'r-an custàda quarànta.
Sunt
Dòp èsar turnâ lìbar, Jimmy Kilmartin (David Caruso) al próa a rigàr drit cun la giustìsia anc parchè sò mujēr Bev (Helen Hunt) l'à da pôc dâ a la luś na putìna, la Corinna (Katie Sagona). Na sira però a cà sua a riva sò cuśèṅ Ronnie Gannon (Michael Rapaport) ch'al gh'admànda in śnòć ad jutàr-'l in un lavōr ch'al gh'à da far par cònt ad Little Junior Brown (Nicolas Cage), dit B.A.D., un malavitóś ch'al gh'à 'n night club ma ch'l è insaplâ anc in un gir ad màchini 'd cuntrabànd. Par salvàr al sò parènt da la sò arlìa, Jimmy al gh'astà e 'l và a guidàr òṅ di quàtar tir ch'i gh'aṅ da purtàr al càrag a 'l pòrt. Rivâ a destinasiòṅ, Jimmy al vîṅ farmâ da la pulisìa e arestâ da 'l agìnt Calvin Hart (Samuel L. Jackson). Par prutéśar Ronnie, Jimmy al tîṅ al bèc sarâ finénd in parśòṅ.
Soquànt an dòp, par psēr védar sò fiōla, al decìd però 'd far i nóm d'n àtar cōlp vèć a 'l prucuradōr generàł Frank Zioli (Stanley Tucci) e Little Junior Brown, ch'al créd ch'a vudàr al sac al sia stâ invéci Ronnie, al s véndica sèg masànd-'l a pugn. Jimmy, ch'l à finî la sò péna, al dvènta 'n culaburadōr 'd giustìsia par cònt ad Zioli ch'l al ricàta dgénd-ag ch'al prév ès'r incriminâ p'r i fat ch'l iva cuntâ. Par pasàr-la lisa al gh'à da incastràr, purtànd un registradōr adòs, Little Junior Brown ch'l è dvintâ 'l boss di tràfic criminài dòp la mòrt ad sò pàdar Big Junior Brown (Philip Baker Hall).