Jasper, Texas - La città dell'odio
|
C'l artìcul chè 'l è scrit in
Miranduléś |
 Jasper, Texas
| ||
| Jasper, Texas - La città dell'odio | ||
 Na figùra dal film | ||
| Jasper, Tèxas - La sità d'l òdi 2003 | ||
|---|---|---|
| Regìa: Jeffrey W. Byrd | ||
| Scritōr: Jonathan Estrin | ||
| Atōr: Jon Voight • Louis Gossett Jr. • Joe Morton Bokeem Woodbine • Eugene Clark • Ron White Demore Barnes • Kedar Brown • Roy T. Anderson Toby Proctor • Jeff Topping • Michael McLachlan | ||
| Müsica: Asche & Spencer • Richard Werbowenko | ||
| Léngua: Ingléś | ||
| Dürä dal film: 114 minüt | ||
Jasper, Texas - La città dell'odio (Jasper, Tèxas - La sità d'l òdi) 'l è 'n film dramàtic e biugràfic dal 2003, fat par la televiśiòṅ, ad Jeffrey W. Byrd. Al cònta di fat sucès dabòṅ a Jasper (Tèxas) in dua in dal 1998 tri biànc i aṅ masâ 'l négar James Byrd Jr. traśànd al sò còrp su 'l asfàlt par dū chilómet'r e mèś ligâ cun dal cadéni a 'n pick-up.
'L è stâ girâ in Cànada.
Sunt
In dla sitadìna 'd Jasper (Tèxas) al sierìf Billy Rowles (Jon Voight) al cata lung la via 'l cadàva'r ad James Byrd, Jr. (Roy T. Anderson), un négar c'n al còrp tut squanternâ p'r èsar stâ traśa lung 'l asfàlt par di chilómetar. P'r al fat ch'la pulisìa l'à catâ 'l sò sangṿ su 'l pick-up 'd un śōvan ciamâ Sean Berry (Toby Proctor), chi lò al finìs tut spauróś sóta interugatòri e 'l vōda 'l sac subìt. Na nòt lò e i sò amìg, Russell Brewer (Jeff Topping) e Bill King (Michael McLachlan), i gh aṅ dâ 'n pasàǵ par pò pistàr-'l e ligàr-al cun dal cadéni a 'l furgunsèṅ parchè i vlìvan divertìr-as c'n un négar dand-ag na lesiòṅ.
Billy, ch'al lavóra insém a 'l sìndig R.C. Horn (Louis Gossett Jr.) par far giustìsia, al fà rivàr 'l agìnt d'l FBI Don Clark (Eugene Clark) parchè par lò a s trata 'd 'n umisìdi a sfónd rasiàł. Anc Walter Diggles (Joe Morton), mémbar dal cunsìli dal guèran dal Tèxas, e 'l prucuradōr Guy James Gray (Ron White) i èṅ dla partìda.
I giurnalìsta i tàc'n a dascórar da 'l caś e 'n grup ad Pantéri Négri, guidàdi par Khalid X (Bokeem Woodbine), al riva da Houston p'r al funeràl ad James par manifestàr c'n i sćiòp in bras. Pò 'l è 'l tùr'n ad qvéi dal Ku Klux Klan ch'i vōlan tōr part a 'l prucès e i minàs'n al sìndig e 'l sierìf ch'a n sucéda gnint a i tri ragàs o sinò pèś par lōr.