John Wayne Gacy

C'l artìcul chè 'l è scrit in Miranduléś Emiliàn

Gacy in dal 1977 insém a la Rosalynn Carter


John Wayne Gacy (Chicago, 17 ad Mars dal 1942 - Crest Hill, 10 ad Maǵ dal 1994) 'l è stâ 'n masadōr seriàł americàṅ.

'L è cgnusû c'n al scutmàj ad „Killer Clown“ (Pajàs Sasèṅ) p'r avēr rapî, turturâ, inculâ e masâ trénta-tri vitmi, tut ragasōi masć, vint-i-òt saplî sóta la sò cà o muciâ sù in cantìna, in di an da 'l 1972 in fiṅ a 'l 1978 quànd 'l è stâ ciapâ. Al nóm ch'a gh'è stâ dâ al daśvîṅ da 'l fat ch'al fava divertìr i putèṅ durànt al fèsti vistî da pajàs faghénd-as ciamàr Pogo al Clown.

Pòchi parsòni i cardìvan ch'al psis èsar bisesuàł in segrét parchè 'l éra spuśâ, inóltar 'l éra anc un tisi gustóś e dònca ninsòṅ a pinsàva mâł 'd lò. A la fiṅ dal prucès 'l è stâ cundanâ a mòrt e giustisiâ cun na puntùra 'd vlèṅ in dal 1994.

Un sò diségn ad Pogo

Al perìsi di psicòlug fati su 'd lò i dimustràvan ch'al gh'iva n'inteligénsa dimóndi élta (cuma da spés a sucéd a i serial killer “urganiśâ”). Al gh'iva anc di distùrub dla persunalità ligâ a 'l sadìśum e misciâ cun 'l umufubìa tgnuda dèntar.

A la sò mòrt dimóndi di sò diségn cun dal figùri 'd pajàs i èṅ stâ vindû a di sugèt privâ e i bèsi catâ sù i èṅ stâ dâ in beneficénsa. Àtri sò òpri i èṅ invéci stadi bruśàdi.

La stòria ad cal sasèṅ chè l'à cuntribuî a far crés'r in dla gint la paùra di pajàs e l'à dâ vita a 'n film biugràfic da 'l tìtul Gacy prudót in dal 2003. 'L èx tasterìsta ad Marilyn Manson, Madonna Wayne Gacy, 'l à tòlt al nóm da lò e da la cantànta Madonna.

Culegamènt estéran

Àtar prugèt