No, il caso è felicemente risolto
|
C'l artìcul chè 'l è scrit in
Miranduléś |
 No, il caso è felicemente risolto
| ||
 Cerusico e Cucciolla in na figùra dal film | ||
| Nò, al caś al s è risòlt bèṅ 1973 | ||
|---|---|---|
| Regìa: Vittorio Salerno | ||
| Scritōr: Vittorio Salerno • Augusto Finocchi | ||
| Atōr: Enzo Cerusico • Riccardo Cucciolla Martine Brochard • Umberto Raho • Enzo Garinei Enrico Maria Salerno • Loredana Martínez | ||
| Müsica: Riz Ortolani | ||
| Léngua: Itagliàṅ | ||
| Dürä dal film: 98 minüt | ||
| Nasiōṅ: Itàglia | ||
No, il caso è felicemente risolto (Nò, al caś al s è risòlt bèṅ) 'l è 'n film dramàtic dal 1973 ad Vittorio Salerno, chè a 'l sò debùt da par lò a la regìa.
'L è stâ girâ in dal Lasi e a 'l èstar 'l è cgnusû cuma “No, the Case Is Happily Resolved” in di Stat Unî, cuma “Considerons l'affaire comme terminée” in Frància e cuma “Betrachten wir die Angelegenheit als abgeschlossen” in Germâgna.
Par cal film chè Augusto Daolio di Nòmad 'l à cantâ 'l braṅ Mamma Giustizia mént'r in dla part dal giurnalìsta ch'l in sà da piò dla pulisìa a gh'è sò fradèl Enrico Maria Salerno.
Sunt
Méntar 'l è a pés in dal “lâg ad Grasciàṅ” in un dòpmeśdè 'd fèsta, 'l impiegâ dal Feruvìii dal Stat Fabio Santamaria (Enzo Cerusico) al sènt na dóna sigàr da 'n camp lè davśèṅ. Al s léva sù p'r andàr a védar cuś è sucès e al cata 'n óm ch'l à péna masâ a stangàdi na putàna, l’Olga Poddu (Loredana Martínez), màd'r ad dū fiōi ch'i staṅ in culéǵ. Al pescadōr al scapa via cun la sò màchina griśa e al s férma in dla campàggna rumàna par lavàr-as la ghigna e par dmandàr a 'n cuntadèṅ (Riziero Pauselli) in du 'l pōl catàr la pulisìa. Fabio, turnâ a cà da sò mujér Cinzia (Martine Brochard) e da sò fiōla Simona (Sandra Locci), al decìd però 'd a n dir gnint par paùra 'd lasàr al sò nóm e 'd armàgnar-'g insaplâ.
A surpéśa tri óri dòp al sasèṅ, un prufesōr universitàri ad nóm Eduardo Ranieri (Riccardo Cucciolla), al gh và lò da i carabinēr par dir-ag ch'l à vdû 'n óm c'n i bafi cupàr na dóna e pò al fà la descrisiòṅ ad quàl là. Quànd la sò stòria la finìs in si giurnài, Fabio al capìs 'd ès'r-ag dènt'r in fiṅ a 'l còl parchè la pulisìa la créd ch'al sia stâ lò, i aṅ catâ là anc i sò uciài. 'L óm prima al śbat via in dal rusc i sò vistî ad cal dè là pò cun na scuśa a s fà tajàr i bafi da 'l sò barbēr Aldo (Giangiacomo Elia), p'r ùltim al dmanda a 'l carusēr Augusto (Nazzareno Natale) ad varniśàr ad blù la sò Mini Morris.
In cal mént'r un giurnalìsta napulitàṅ, Giuseppe Ferdinando Giannoli (Enrico Maria Salerno), al fà da tut par scrìv'r al pès dla sò vita e al và a pascàr al prufesōr ch'l iva vdû insém a i pulisiòt in dal camp in du i aṅ catâ 'l còrp dla scaja. Acsè al riva in du 'l stà par dascórar sèg e al s fà l'idéa ch'al pòs' èsar stâ anc lò. Fabio, su cunsìli ad don Giulio (Umberto Raho), al và cuntàr la véra a 'l cumisàri 'd pulisìa Pace (Michele Malaspina) ma acsè al finìs in dla mèrda parchè ninsòṅ a gh créd e 'l sò didàdi i èṅ cumpàgni a qvéli catàdi in si uciài da sōl ch'l iva lasâ in dal camp c'l atra dméndga. Giannoli al và a dascórar c'n al maresiàl Basile (Gualtiero Rispoli) parchè al sènt pusa 'd bruśâ, ma a lò a n gh'è gnanc indivìś, pò al fà àtar tant cun l’Annalena (Giovanna Mainardi), na putàna amìga dl’Olga, ch'la gh diś che cal dè là la l'à vdùda muntàr sù su na sentvìnt-quàtar biànca, la màchina dal prufesōr, ma la n vōl mia andàr a testimuniàr parchè la n è minga mata, la gh'à bèla abû a che far cun cla gint là.
I giùdas i èṅ sicûr, par lōr Fabio 'l è culpévul, ch'al vaga pur a marsìr in parśòṅ par vint-quàt'r an. Ma prima d'l apèl Ranieri al s tōś la vita lasànd scrit su 'n fujét la véra e mandànd acsè lìbar Santamaria.