Renato Pozzetto

C'l artìcul chè 'l è scrit in Miranduléś Emiliàn


«
E la vita, la vita, e la vita l'è bela, l'è bela, basta avere l'ombrela, l'ombrela, ti ripara la testa, sembra un giorno di festa.»
(LMO)/(IT)(E la vita, la vita, 1975)
«
E la vita, la vita, la vita l'è bèla, l'è bèla, basta avér-ag l'umbrèla, l'umbrèla, la t quàcia la tèsta, a par un dè 'd fèsta.»
(MUD)


Renato Pozzetto (Lavèṅ Mumbèl, 14 ad luj dal 1940) 'l è 'n atōr, regìsta, còmic ad cabarè e senegiadōr itagliàṅ uriginàri dal vareśòt. 'L è cgnusû par la sò fórma 'd umurìśum cundìda 'd un spric ad surealìśum.

Biugrafìa

Pozzetto tòlt śò in dal 1988

Nâ in na famìja ad lavuradōr, al pasa la sò giuinésa a Gemòni. Dòp avér studiâ da geòmetra, al fà al sò primi surtìdi in d'l ambiènt dal cabarè milanéś. In dal 1964 al s mét insém a Cochi Ponzoni par dar vita a 'n duo còmic. Al debùt al vèṅ a l'Ustarìa dl'Oca. In séguit i métan sù al Gruppo Motore insém a Enzo Jannacci, Felice Andreasi, Bruno Lauzi e Lino Toffolo, śibénd-as a 'l Cab 64 d'l amìg Tinin Mantegazza (ciapànd 3.500 franc a sira ma sōl s'i gh la cavàvan a far sù déś spetadōr almànc) e pò a 'l Derby ad Milàṅ. Da 'd lè in avànti Pozzetto e Ponzoni i tàcan a far-as ciamàr Cochi e Renato.

Chi dū lè i càtan al sucès in présia, tacànd a far di lavōr da prutagunìsta anc in RAI cuma in dal traśmisiòṅ Quelli della domenica dal 1968, Il buono e il cattivo dal 1972, Il poeta e il contadino - l'incontro che non doveva avvenire dal 1973 e Canzonissima dal 1974. In cal mèntar i càntan anc soquànt canti ad sucès, cun 'l ajùt d'l amìg Enzo Jannacci, cuma La gallina (La galìna), Canzone intelligente (Cansòṅ inteligìnta) e, in sima a tut, E la vita, la vita (id.), cgnusùda da tut.

A partìr da 'l 1974 cun Per amare Ofelia, Pozzetto al taca anc a recitàr da par lò in soquànt film cuma Gran bollito (Gran Bujî dal 1977, ch'al dascór dla dóna ad Curéś ch'la fava i savòṅ cun di cadàvar), La patata bollente (La patàca bujénta dal 1979, in dua al s pòrta a lèt al fnòć piciâ da di naśìsta Massimo Ranieri), Mia moglie è una strega (Mè mujér l'è na stria dal 1980, insém a l'Eleonora Giorgi), Ricchi, ricchissimi... praticamente in mutande (Ric, ric sfundâ... praticamènt in mudàndi dal 1982, cun l'Edwige Fenech), 7 chili in 7 giorni (7 chilo in 7 dè dal 1986, in dua al fà śmagrìr di budlòṅ insém a Carlo Verdone) e Le comiche (Al còmichi dal 1990, insém a Paolo Villaggio).

Da 'l 2000 'l è turnâ insém a Cochi Ponzoni in televiśiòṅ cun di spetàcui cuma Nebbia in Val Padana, Zelig Circus e Stiamo lavorando per noi. In n màncan gnanc di spetàcui a teàtar: Nonostantelastagione, Nuotando con le lacrime agli occhi - Canzoni e ragionamenti, Una coppia infedele.

In dal 2009 al gira dal reclàm cónt'r 'l fum p'r al Guèran dal tìtul "Fumare uccide: difenditi!" (Fumàr a masa: difénd-at!). A la fiṅ d'l an al patìs la mòrt ad sò mujér Brunella Gubler.

Filmugrafìa

Culegamènt estéran