Simul stabunt simul cadent
|
C'l artìcul chè 'l è scrit in
Miranduléś |
Simul stabunt simul cadent o Simul stabunt vel simul cadent (literalmènt insém i staràṅ o sinò insém i cascaràṅ) l'è na manéra 'd dir latìna ch'a s dróa in dal dirìt p'r indicàr che quànd na situasiòṅ la n gh'è piò la s tira adrē 'n àtar quèl ch'al n pōl minga armàgnar sù da par lò, faghénd dònca crudàr incòśa.
Al prim uś difùś su i mèdia al gh'è stâ a i tèmp dal fasìśum quànd al Papa Pio XI 'l à tirâ fóra cla fraś chè par mét'r in guàrdia 'l guèr'n itagliàṅ che s'l is mis maṅ a l' Cuncurdâ, firmâ da pôc tèmp, alóra a sarév vgnû śò tut, anc i Pat Lateranéns e la Questiòṅ Rumàna.
'N eśèmpi mudèr'n ad cal dit chè al s cata in dla léǵ su l'elesiòṅ dal presidènt dla regiòṅ. Se p'r un quàlc mutìṿ chi lò al gh'is da vgnir méno (par mòrt, destitusiòṅ, impedimènt o dimisiòṅ) alóra la sò Giùnta e 'l Cunsìli regiunàł i farévan na fiṅ cumpàgna. Un quèl dal gènar 'l è sucès in dal 2014 quànd al presidènt dla regiòṅ Emìglia-Rumàgna Vasco Errani al s è dimìs parchè cundanâ in prim grâd a 'n prucès (pò asòlt in apèl). Vgnénd méno al presidènt a s è dònca andâ diretamènt a gl'elesiòṅ in dal Nuvémbar dal stés an.