The Sisters (film 2005)
|
C'l artìcul chè 'l è scrit in
Miranduléś |
 The Sisters
| ||
.png) Eric McCormack in na figùra dal film | ||
| Al surèli 2005 | ||
|---|---|---|
| Regìa: Arthur Allan Seidelman | ||
| Scritōr: Richard Alfieri • Anton Pavlovič Čechov | ||
| Atōr: Erika Christensen • Mary Stuart Masterson Maria Bello • Elizabeth Banks • Eric McCormack Rip Torn • Chris O'Donnell • Alessandro Nivola Tony Goldwyn • Steven Culp • Greg Foote | ||
| Müsica: Thomas Morse | ||
| Léngua: Ingléś | ||
| Dürä dal film: 113 minüt | ||
| Nasiōṅ: Stat Unî | ||
The Sisters (Al surèli), cgnusû anc c'n al tìtul ad The Sisters - Ogni famiglia ha i suoi segreti, 'l è 'n film dramàtic americàṅ dal 2005 ad Arthur Allan Seidelman, scrit par Richard Alfieri e ispirâ a 'l drama teatràł dal 1900 „Al tri surèli“ 'd Anton Pavlovič Čechov.
La pelìcula l'è stada giràda a Eugene e a Cottage Grove in Òregun.
Sunt
Dòp la mòrt ad sò pàdar August Prior (Greg Foote), al sò tri fiōli e c'l àtar fiōl masć i èṅ andâ via da la cà in du i vivìv'n a Charlotte p'r andàr a star a New York. L’Olga (Mary Stuart-Masterson) l'è la più granda, l'è puta, fórsi lèśbica e l'à fat caréra in àmbit universitàri esénd dvintàda retōra. La Marcia (Maria Bello) l'è qvéla 'd mèś, l'è la più bèla dal tri e la s è spuśàda c'n al psicòlug Harry Glass (Steven Culp) anc s'adès al sò matrimòni 'l è in criśi. L’Irene (Erika Christensen) l'è la più pìcula ma l'è stufa 'd èsar tratàda cuma na putìna. Pò a gh'è 'l masć, Andrew (Alessandro Nivola), ch'al s è mis cun na śbraga-maròṅ patintàda, la Nancy Pecket (Elizabeth Banks), ma fórsi a sarà stâ 'l destîṅ parchè 'l sò surèli i dìśan ch'al gh'à minga i cajòṅ.
Adès i Prior i dànan na fèsta p'r al cumpleàn dl’Irene, na fèsta a surpréśa cuma tut i an. Fra i òspit a gh'è anc al dutōr Chebrin (Rip Torn), ch'al lèś sèmp'r i murtòri su 'l giurnàł e i fat ad crònaca négra, al prufesōr narvōś mat e sarcàstic Gary Sokol (Eric McCormack), un vèć amìg spuśâ 'd Baltimòra ad quànd i éran pìculi, Vincent Antonelli (Tony Goldwyn), e David Turzin (Chris O'Donnell), inamurâ in segrét dl’Irene acsè cuma Gary.
La fèsta la finìs dimóndi mâł parchè tut i partesipànt i gh'aṅ di caràtar minga tant gustóś e dal léngui da bisi. I s dìśan dal cativèri 'l un cun c'l àtar e batùdi ch'i fànan mâł. Turnàda a cà l’Irene la tōś dal metanfetamìni cum la fà 'd sòlit e la finìs a 'l uśdàł. Quànd la s armét, la spóśa David méntar la Nancy l'armàgn gravda e la Marcia la próa a tacàr na stòria cun Vincent. Ch'i prubléma fra lōr i sìan finî a n è però minga véra, specialmènt quànd Andrew al diś a 'l sò surèli ch'l à vindû la cà 'd famìja in Carulìna dal Nòrd, ch'a gh vliva andàr a star l’Irene.