Zecchino d'Oro
|
C'l artìcul chè 'l è scrit in
Miranduléś |
Al Zecchino d'Oro 'l è 'n fèstival internasiunàł dla cansòṅ p'r i putèṅ ch'al s tîṅ tut i an da 'l 1959. Al primi dū edisiòṅ i èṅ stadi fati a Milàṅ, pò la manifestasiòṅ la s è spustàda a 'l Antuniàṅ 'd Bulógna. A la televiśiòṅ 'l è traśmìs par la Rai Uno e in dal 2008 'l à ciapâ 'n arcgnusimènt da 'l UNESCO.
'L è stâ ideâ par Cino Tortorella, ch'al 'l à anc preśentâ par 51 vòlti (in fiṅ a 'l 1972 visténd i pagn dal Mâg Zurlì), mént'r a far la diretōra dal côr par trént'an, prima 'd murìr p'r un càncar a 'l téti, a gh'è stada la Mariele Ventre. Da 'l 1996 a 'l sò pòst a gh'è la Sabrina Simoni.
Fra 'l canti più famóśi preśentàdi chè a 'rcurdém Il coccodrillo come fa?, Il valzer del moscerino (cantâ par la Cristina D'Avena), Quarantaquattro gatti, Le tagliatelle di nonna Pina, Volevo un gatto nero, Fammi crescere i denti davanti, Popoff, Torero Camomillo, Il pulcino ballerino e Il caffè della Peppina.
Fra gl'aṿtōr di pès dal fèstival a gh'è di cantànt famóś dal panuràma itagliàṅ cuma Memo Remigi, Sandro Giacobbe, Biagio Antonacci, Dodi Battaglia, Roby Facchinetti, Tony Renis, Edoardo Bennato, Fred Bongusto, Fabio Concato, Mino Reitano, Toto Cutugno, Daniele Fossati, Mario Lavezzi, Lucio Dalla, Bruno Lauzi, Riccardo Fogli, Pupo, Renato Zero, Pino Daniele, Enrico Ruggeri, Amedeo Minghi e Bobby Solo.
In dal 1997 na putìna giapunéśa ciamàda Yumiko Ashikawa l'à cantâ 'n braṅ scrit tut da lē, La pioggia.