Jovette Marchessault

Jovette Marchessault
Bizitza
Jaiotza	Montreal, 1938ko otsailaren 9a
Herrialdea	Kanada
Heriotza	Estrie, 2012ko abenduaren 31 (74 urte)
Hezkuntza
Hizkuntzak	frantsesa
Jarduerak
Jarduerak	poeta, idazlea, eleberrigilea, margolaria, antzerkigilea eta eskultorea
Jasotako sariak	ikusi Governor General's Literary Awards  (1990) Companion of the Ordre des arts et des lettres du Québec  (2015)

Jovette Marchessault (Montreal, 1938ko otsailaren 9a - 2012ko abenduaren 31) margolari, eskultore, eleberrigile eta antzerkigilea izan zen.

Bizitza

Hamahiru urte zituela ikasketak bertan behera utzi behar izan zituen, eta ehungintza-lantegi batean hasi zen lanean. Lesbiana erradikaltzat aitortu zuen bere burua, eta originaltasun handiko obrak sortu ohi zituen, Jainkoaren eta gizakiaren boterea emakumearen esku dagoen unibertso bat sortuz bere lanekin. Margolari eta eskultore gisa, erakusketak egin zituen Quebec, Ontario, Paris, Brusela eta New Yorken.

1976. urtean Prix France-Québec saria irabazi zuen Comme une enfant de la terre (1975, Bertako haur bat bezala) eleberri autobiografikoarekin. Eleberri aipagarriak ditu, orobat, La mère des herbes (1980, Belarren ama) eta Tryptique lesbien (1980, Triptiko lesbianoa), zeinak jasotzen baitu, besteren artean, Les Vaches de nuit bakarrizketa, Pol Pelletierrek antzerkirako egokituriko testua. Antzerkigintzaren alorrean azpimarratzekoak ditu La saga des poules mouillées (1981, Oilo bustien saga), Quebeceko Laure Conan, Germaine Guèvremont, Gabrielle Roy eta Anne Hébert idazleen bizitzaren kontakizuna, eta La terre est trop courte, Violette Leduc (1982, Lurra laburregia da, Violette Leduc), Violette Leduc frantses idazlearen bizitzari buruzkoa. Marchessaultenak dira, orobat, Alice et Gertrude, Nathalie et Renée et ce cher Ernest (1984, Alice eta Gertrude, Nathalie eta Renée eta Ernest maitea) eta Anaïs dans la queue de la comète (Anaïs kometaren isatsean).

Erreferentziak

• Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/26 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.