Rabo de Peixe

Rabo de Peixe
	freguesia
	Irudi gehiago
Administrazioa
Estatu burujabe	Portugal
Portugalgo eskualde autonomoa	Azoreak
Portugalgo udalerria	Ribeira Grande
Posta kodea	9600-124
Geografia
Koordenatuak	37°48′36″N 25°35′08″W / 37.81°N 25.5856°W
Azalera	16,98 km²
Demografia
Biztanleria	8.801 (2021)
Dentsitatea	518 bizt/km²
Informazio gehigarria
Telefono aurrizkia	292
	jf-rabodepeixe.pt

Artikulu hau Azoreetako herriari buruzkoa da; bertan oinarritutako telesailari gaitzat duena beste hau da: «Rabo de Peixe (telesaila)»

Rabo de Peixe Azoreetako (Portugal) herri bat da, Ribeira Grande udalerriari dagokiona. 16,98 km²-ko azalera du eta 2021eko erroldaren arabera 8.801 biztanle^[1]. Arrantzale eta nekazal herria da.

Izena

Rabo de Peixe izenak "arrain-buztana" esan nahi du. XVI. mendeko Gaspar Frutuoso apaizak dio badiaren inguruan lurraldeak duen itxura topografikoari egiten diola erreferentzia^[2]. Bestalde kondaira bat bada antzina arrain handi ezezagun baten buztana aurkitu zela herrian eta horregatik jarri ziotela Rabo de Peixe izena.^[2]

Historia

Ez da ezagutzen noiz sortu zen herria, baina XV. mendean flandriarrek zein mairuek ingurua kolonizatu zutela uste da^[2]. XV. mende bereko agiri batean Rabo de Peixe eta Ribeira Grande freguesia bihurtu zirela esaten da.

XVIII. mendean Senhor Bom Jesus eliza eraiki zen uharteetako estilo barroko tipikoan.^[2]

Bigarren Mundu Gerran Santana izeneko lautada handia hegazkin militarren aerodromo bihurtu zen eta 1946an São Miguel uharteko aireportu zibil bihurtu zen. 1995ean Ponta Delgadan dagoen Joan Paulo II.a aireportuak ordezkatu zuen.

2001ean gertaera bitxi bat jazo zen. Sun Kiss 47 belaontzia Rabo de Peixeko kostaldean urperatu zen 500 kilogramo kokaina puru askatuz. Rabo de peixetarrek kokaina frogatzea erabaki zuten eta alde batetik haren purutasunak (%80tik gorakoa) eta bestetik hura kontsumitzeko ohitura faltak eraginda asko ospitalizatuak izan ziren eta hildakoak ere izan ziren^[3]. Gertaera hura oinarri hartuta 2023an Rabo de Peixe izeneko telesaila egin zen.^[4]

2004ko apirilaren 25ean freguesia izatetik herri izatera pasa zen, betiere Ribeira Grande udalerriaren barnean.^[5]

2012an Azoresetako Carlos César presidenteak itsas-portuaren berrizte eta handitze lanak iragarri zituen.^[6]

Demografia

Populazio gaztea du, biztanleriaren %23,74 15 urtez beherakoak dira eta 65 urtetik gorakoak %6,74 baino ez dira.

1864ko erroldan 3.727 biztanle zituen, 1900erakjo lau mila biztanleren langa gainditu zuen eta 1960tik aurrera 7 mila eta 8 mila artean mantendu da.^[1]

Kultura

Urtean zehar jaialdi ugari egiten dira herrian, gehienak erlijiosoak; Festa do Senhor Bom Jesus (urteberri egunean), Divino Espírito Santo (Aste Santuan), Festas da Beneficência, Festas da Caridade... Jaialdi aipagarriena A Festa da Bandeiras da. Guzti hauetan prozesioak egiten dira herrian zehar. Bi banda filarmoniko daude herrian, biak ala biak XIX. mendean sortuak: Sociedade Filarmónica Lira do Norte (1867) eta Filarmónica Progresso do Norte (1888).

1996an A Gaivota elkartea sortu zen herriko tradizioak gordetzeko. Antzinako janzkerak, bizimoduak eta dantzak erakusten dituzte. Vozes do Mar do Norte abesbatza 2007an sortu zen. Clube Naval de Rabo de Peixe (CNRP) elkarteak itsas-kirolak dinamizatzen ditu herrian.

2023ean Rabo de Peixe izeneko telesaila estreinatu zen, bertako gertakari historiko batean oinarritua.