El gerundivu [hɛɾʊn̪ˈdiβu] (del latín gerundivum [gjɛrʊn̪ˈdiːwʊm]) es una holma nominal el verbu, gastau nangunas luengas.
El gerundivu latinu morfologicamenti es un aljetivu verbal (particípiu huturu passivu), con basi el tema presenti, vocal atijanti, sufiju -nd- i telminacionis -us, -a, -um própia los aljetivus tres telminacionis. Una holma comu amandus se compón duna raís am-, vocal atijanti -a-, sufiju -nd- i desinéncia -us el nominativu. Comu aljetivu que es, se declina en tolos casus, enos dos númirus i enos tres génirus, del siguienti mó:
| CASU\GÉNIRU | MASCULINU | FEMININU | NEUTRU |
| s/p | s/p | s/p | |
| nominativu | amandus/amandī | amanda/amandae | amandum/amanda |
| acusativu | amandum/amandōs | amandam/amandās | amandum/amanda |
| genitivu | amandī/amandōrum | amandae/amandārum | amandī/amandōrum |
| dativu | amandō/amandīs | amandae/amandīs | amandō/amandīs |
| ablativu | amandō/amandīs | amandā/amandīs | amandō/amandīs |
En huendu un aljetivu, tien que concordal en géniru, númiru i casu con el nombri que le rigi. Participa ena nombrá “costruición gerundial”, lo mesmu qu’el gerúndiu, con el qual no se tien que conhundil: el gerundivu es un aljetivu verbal que concuerda con el núcliu el sintama, mentris que el gerúndiu es un sustantivu verbal, núcliu sintama i que comu verbu puei lleval comprementus. V. gr.: cupidus pilae emendae “deseosu de que la pelota seya mercá” (costrución gerundial con gerundivu). A la escontra, esta mesma oración con gerúndiu sedria cupidus pilam emendi “deseosu de mercal la pelota”.