Unión Progreso y Democracia

Logu.

Unión, Progreso y Democracia (Unión, Progressu i Democracia en estremeñu) hue un partiu políticu español, hundau en 2007 i disueltu en 2020. Ideológicamenti se declarava comu no nacionalista, transversal, laicu, progresista i defensol d'un moelu federalista en España i en Uropa. Angunus meius de comunicación i grupus políticus assitiaus ena derecha i ena esquerda tradicional española, definin a UPyD comu un partiu centralista, por querel arrecuperal angunas competencias pal gobiernu central comu sanidá o educación,^[1] i lo califican de sel nacionalista español^[2] o españolista,^[3][4] por proponel eliminal de la Constitución Española las referencias a las nacionalidais estóricas d'España.

Enas elecionis municipalis de 2011 se conviltió en el 5º partiu mas votau (el 4º entri los partius d'ámbitu nacional), estandu a consiguil 152 concejalis. Enas elecionis generalis de 2011 UPyD se conviltió ena quarta huerça política por númeru de votus i la sesta por númeru de diputaus con 5 representantis, endispués de consiguil mas d'un millón de votus. Posteriormenti perdió representación, acabandu pol disolvel-si en 2020.

En Estremaúra el partiu no á consigíu representación. Respectu a la lengua estremeña, el partiu se posicionó en contra la salia la Güiquipedia en 2008, debiu a que, sigún ellus, essa luenga era un enventu i que el estremeñu namás era una manera particulal de pronuncial el castellanu. Defendiendu que en Estremaúra namás ain una lengua, el castellanu, i un dialetu, a fala.^[5]

Referencias

1. http://www.europapress.es/nacional/noticia-zapatero-replica-diez-centralismo-provocado-desigualdad-espana-20090513130942.html
2. Feijóo dice que votar a UPyD en Galicia es "votar nacionalismo y socialismo", Libertad Digital, 25 eneru de 2009.
3. El adalid del españolismo, Público, 15 noviembri de 2009.
4. UPD, partido nuevo, viejos tópicos, El País, 23 outubri de 2007.
5. http://www.extremaduradehoy.com/modulos/mod_periodico/pub/mostrar_noticia.php?id=75299