Eestin ommaq Riigikogo valimisõq, paigapäälitside umavalitsuisi volikokõ valimisõq, Õuruupa Parlamendi valimisõq ja Vabariigi Presidendi valimisõq.
Riigikogo valivaq Eesti Vabariigi helüõigusliguq kuakundlasõq neläs aastagas. Kandidiirmisõigus om Eesti kuakundlasõl, kiä om kandidaatõ registriirmise viimätses pääväs saanuq 21 aastakka vanas.
Neläs aastagas valõtas voliniguq ka paigapäälitsihe umavalitsuisi volikokkõhe. Volikogo valimispäiv om valimisaastaga rehekuu kolmas pühäpäiv. Helüandmisõigus om Eesti kuakundlasõl ja Õuruupa Liido kuakundlasõl, kiä om valimispääväs saanuq 16 aastakka vanas ja kink elokotus, tuu om kotus, mink aadrõssiandmõq ommaq kannõduq Eesti rahvastiguregistrihe om säälsaman vallan vai liinan. Helüandmisõigus om välämaalasõl, kiä eläs Eestin elämislubagaq ja om valimispääväs elänüq säädüsligult viimädseq viis aastakka sääl vallan vai liinan. Kandidiirmisõigus om egäl helüõigusligul Eesti kuakundlasõl ja Õuruupa Liido kuakundlasõl, kink elokotus om valimisaastaga 1. põimukuu pääväl sääl vallan vai liinan.