Kristina Háfoss

Kristina Háfoss
er eitt menniskja
Fødd(ur) 26. jun 1975 í/á Keypmannahavn
Alma mater Københavns Universitet
Starv løgfrøðingur, búskaparfrøðingur, politikari, civil servant
Politiskur flokkur Tjóðveldi
Dátuheiti
Commons Kristina Háfoss

Kristina Háfoss (fødd Danielsen, 26. juni 1975, uppvaksin á Argjum)[1] er ein føroyskur økonomur, løgfrøðingur, politikari og fyrrverandi svimjari. Hon var fyrstu ferð vald inn á Føroya Løgting í 2002 fyri Tjóðveldi, í 2008 var hon mentamálaráðharri í eitt hálvt ár, í 2015 varð hon vald til fíggjarmálaráðharra, sum onnur kvinnan í føroysku politisku søguni, tann fyrsta var Jóngerð Purkhús.

Bakgrund og yrkisleið

[rætta | rætta wikitekst]

Kristina er útbúgvin cand.jur. og cand.polit. frá Københavns Universitet í ávikavist 2002 og 2003. Hon var sett í starv í tað danska Uttanríkisráðið 1998–1999, í danska Fíggjarmálaráðnum 1999–2000 og á Løgmansskrivstovuni sumrini 1999 og 2000. [2] Harumframt var hon fíggjarligur ráðgevi undir arbeiðnum við at skriva eitt útoyggjaálit 2000–2001, økonomur í Landsbanka Føroya 2004–2005 og verkætlanarleiðari og íløguráðgevi í Føroya Banka í 2006. Síðan 2007 hevur hon verið deildarleiðari í Tryggingarfelagnum Føroyar.

Av hennara nevndar- og formanssessum kunnu nevnast: Forkvinna í Meginfelag Føroyskra Studenta (MFS) 1999–2000, forkvinna í Búskapar- og Løgfrøðingafelag Føroya (BLF) 2005–2006, stýrislimur í P/F Smyril Line síðan 2011 og stýrislimur í tveimum av dótturfeløgunum hjá Tryggingarfelagnum Føroyar síðan 2011.

Sum ung svam hon fyri Havnar Svimjifelag og Føroyar, hon gavst at svimja meðan hon gekk í Hoydølum, og fór í staðin at spæla flogbólt. Kristina er abbadóttir Louis Zachariasen.[3]

Politiskt arbeiði

[rætta | rætta wikitekst]

Kristina Háfoss var næstformaður í Suðurstreymoyar Tjóðveldisfelag 2001–2002, vald inn á Ting í Suðurstreymoyar valdømi 2002–2004 og limur í starvsnevnd Tjóðveldisflokksins 2004–2005.[4] Í februar 2008 gjørdist hon landsstýriskvinna í mentamálum í aðru stjórn Jóannesar Eidesgaard, men segði sessin frá sær aftur av persónligum ávum í august sama ár. Á løgtingsvalinum 2011 var hon vald inn í Løgtingið, har flokkur hennara kom at sita í andstøðu. Á løgtingsvalinum 2015 varð hon afturvald og Tjóðveldi gjørdist partur av stjórnini hjá Aksel V. Johannesen. Hin 15. september 2015 varð Kristina útnevnd fíggjarmálaráðharri.[5]

Keldur

[rætta | rætta wikitekst]
  1. ↑ in.fo - Svimjingin knýtti Kristinu og Anniku saman Archived 2016-02-08 at the Wayback Machine, skrivað hevur Heri Simonsen, 7. feb. 2016
  2. ↑ Logting.elektron.fo
  3. ↑ Samrøða í Kringvarpi Føroya, útvarpinum, Sending um móður og dóttir.
  4. ↑ "Tjodveldi.fo, Kristina Háfoss". Talgilda eintakið, gjørt eftir tí talgilda frumeintakinum , varð goymt í skjalasavni á netinum tann 2012-06-08. https://web.archive.org/web/20120608203847/http://tjodveldi.fo/kristina_h%C3%A1foss/um_meg.aspx. Heintað 2012-08-22. 
  5. ↑ "in.fo - Hetta er nýggja landsstýrið". Talgilda eintakið, gjørt eftir tí talgilda frumeintakinum , varð goymt í skjalasavni á netinum tann 2015-10-22. https://web.archive.org/web/20151022044701/http://www.in.fo/news-detail/news/hetta-er-nyggja-landsstyrid-1/. Heintað 2015-09-15. 

Slóðir úteftir

[rætta | rætta wikitekst]