Ulpan

Tekst üüb Fering

En Ulpan (üüb Hebreews: אולפן, muartaal: אולפנים Ulpanim) as en intensiif hebreewskurs, diaruun det neimuudis Hebreewsk spriik onerrachtet wurt an uk at skuul, wat deheer kurs uunbat. At wurd Ulpan bedüüdet 'onerracht', 'uunwising' of 'toonstuudio'. Det as för't miast faan neiiinwaanerers, diar iin uun det israelisk seelskap integriaret wel. A kurs hee uk en Kibutsprogram, huar lidj för fiiw muuner Hebreews liar, lewe an werke üüb en Kibuts. At idee faan de Ulpan kurs wurd uun det ääder 20. juarhunert ütjtoocht an kurt efter det 1948 grünjleien faan a stoot Israel iinfeerd. Do iinwaanerers tu't lun snaaket Jidisk, Ladino, Ingels, Tjiisk, Araabsk asw. an hed uu so ünlik kultüüren. A kurs holep jo en gemian identiteet tu bagin.

Dön Ulpanim spele noch en wichtig rol för neiiinwaanerers. Det wurd föl kursen uunbeeden: faan det Jewish Agency, ferwaltingen uun a steeden, kibutsen an a uniwersiteeten. At jaft uk Ulpanim för turisten, ütjluns jüüds studenten, asülbewerebers an ei jüüds werkimigrante. För neiiinwaanerers as a kurs kostenluas.

At idee faan a Ulpan wurd faan öler lunen auernimen, huar lidj ferschük, hör aanj ufnemen of ferleesen spriiken welertubelewen. Wales, Skotlun an Noorweegen haa detheer model för a mamenspriikonerracht brükt.