Acetobacteráceas

Non confundir con Acetobacterium ou Azotobacteráceas.

Acetic acid bacteria
Clasificación científica
Dominio: Bacteria Filo: Proteobacteria Clase: Alphaproteobacteria Orde: Rhodospirillales Familia: Acetobacteraceae
Xéneros
Acetobacter Acidicaldus Acidiphilium Acidisphaera Acidocella Acidomonas Asaia Belnapia Craurococcus Gluconacetobacter Gluconobacter Granulibacter Kozakia Leahibacter Muricoccus Neoasaia Oleomonas Paracraurococcus Rhodopila Roseococcus Rubritepida Saccharibacter Stella Swaminathania Teichococcus Zavarzinia

As acetobacteráceas (Acetobacteraceae), tamén chamadas bacterias do ácido acético, son unha familia de bacterias que realizan unha oxidación incompleta de alcohois a ácidos orgánicos; o máis característico é que obteñan a súa enerxía da oxidación do etanol a ácido acético durante as fermentacións. Son bacterias con forma de bacilo gramnegativas aeróbicas. Non se deben confundir co xénero Acetobacterium da familia Eubacteriaceae, o cal está formado por especies anaerobias que poden reducir o dióxido de carbono para producir ácido acético.^[1]

As Acetobacteraceae son bacterias ubicuas. Están presentes nos ambientes nos que se forma etanol como resultado da fermentación dos azucres. Poden illarse do néctar das plantas e das froitas estragadas, e tamén da sidra fresca e da cervexa sen pasteurizar nin filtrar. As moscas da froita ou do vinagre Drosophilidae ou as Turbatrix aceti considéranse os vectores comúns para propagar as Acetobacteraceae^[2] na natureza.

Algúns xéneros como Acetobacter, poden finalmente oxidar o ácido acético que producen a dióxido de carbono e auga usando encimas do ciclo de Krebs. Outros xéneros como Gluconobacter, non oxidan o ácido acético.

Algunhas bacterias do ácido acético como Acetobacter xylinum poden sintetizar celulosa,^[3] o cal normalmente é característico dos vexetais.

Dado que estas bacterias producen ácidos, normalmente son tolerantes á acidez, e crecen mellor por debaixo do pH 5,0, aínda que o seuu pH óptimo para o crecemento é de entre 5,4 e 6,3.

As bacterias do ácido acético son móbiles con flaxelación peritrica ou polar. Os organismos con flaxelación polar están relacionados coas Pseudomonas, das que difiren principalmente pola súa tolerancia ao ácido e pola súa incapacidade de oxidar completamente os alcohois. Estes organismos son os que actualmente foron incluídos no xéneo Gluconobacter. O xénero Acetobacter comprende os organismos con flaxelación peritrica.^[4]

Na produción industrial de vinagre empréganse cultivos de bacterias do ácido acético. O acetato producido por estas e polos homoacetóxenos tamén se usa (en forma de sal de calcio) para fundir o xeo das estradas en inverno.

Notas

1. Balch, William E.; Schoberth, S.; Tanner, Ralph S.; Wolfe, R.S. "Acetobacterium, a new genus of hydrogen-o" (PDF) 27: 355–361. 
2. Vinegars of the World. Arquivado 25 de setembro de 2019 en Wayback Machine. Chapter 5. ISBN 978-88-470-0865-6
3. Formation of cellulose by certain species of Acetobacter Biochem J. 1951 May; 48(5): 618–621
4. Madigan M; Martinko J (editors). (2005). Brock Biology of Microorganisms (11th ed. edición). Prentice Hall. ISBN 0-13-144329-1.

Véxase tamén

Bibliografía

• Ecological occurrence of Gluconacetobacter diazotrophicus and nitrogen-fixing Acetobacteraceae members: their possible role in plant growth promotion 2008. Microb Ecol. 55(1):130-40.
• Genera and species in acetic acid bacteria, 2008 Int. J. Food Microbiol. Volume 125, Issue 1, Pages 15–24.
• Polyphasic taxonomy of acetic acid bacteria: An overview of the currently applied methodology, 2008 Int. J. Food Microbiol. Volume 125, Issue 1, Pages 2–14
• Biotechnological applications of acetic acid bacteria, 2008, Critical Reviews in Biotechnology, Volume 28, Issue 2, 101-124

Ligazóns externas

• Conferencia internacional sonre as bacterias do ácido acético

Wikispecies posúe unha páxina sobre:  Acetobacteráceas