Antía Jácome

Antía Jácome

(2023)
Biografía
Nacemento	22 de novembro de 1999 (25 anos) Pontevedra, España
Actividade
Ocupación	piragüista
Deporte	piragüismo
Disciplina deportiva	Piragüismo en augas tranquilas
Participou en
8 de agosto de 2024	Canoagem nos Jogos Olímpicos de Verão de 2024 - C-1 200 m feminino ^(pt) (4ª)
agosto de 2021	Canoagem nos Jogos Olímpicos de Verão de 2020 - C-1 200 m feminino ^(pt) (5ª)
	Canoagem nos Jogos Olímpicos de Verão de 2020 - C-2 500 m feminino ^(pt) (6ª)

Antía Jácome Couto, nada en Pontevedra o 22 de novembro de 1999,^[1] é unha piragüista galega. Compite na modalidade de augas tranquilas, na que foi tres veces campioa europea e catro veces subcampioa do mundo. Competiu en dous Xogos Olímpicos (Toquio 2020 e París 2024), conseguindo tres diplomas olímpicos.

Traxectoria

Comezou a practicar piragüismo aos 12 anos na Escola de Piragüismo Cidade de Pontevedra, da súa cidade natal, e pouco despois xa destacaba nas diferentes competicións nas que participaba.^[2] No 2017 foi subcampioa do mundo júnior no campionato celebrado na cidade romanesa de Pitești, na que competiu xunto a María Pérez no C2 200 metros.^[3]

En 2018 competiu no Campionato Europeo de Piragüismo en Augas Tranquilas, celebrado en Belgrado, no C2 nas distancias 200 e 500 metros, finalizando en sexto e noveno lugar, respectivamente. Formou parella en ambas probas con Patricia Coco.^[4] Ese mesmo ano participou tamén no Campionato Mundial de Piragüismo en Augas Tranquilas, en Montemor-o-Velho, quedando sétima con María Pérez no C2 200 m e non logrando meterse na final do C1 200.^[5]

En 2019 gañou tres medallas de ouro e unha de prata na Copa de España de Piragüismo.^[6] No Campionato Mundial, en Szeged competiu con Patricia Coco no C2 500, buscando un pase aos Xogos Olímpicos de 2020, pero non o lograron, quedando fóra da final.^[7][8] Con todo, tralo adiamento dos Xogos ao 2021, logrou unha praza para a cita olímpica do C1 200m, ao superar á madrileña María Corbera no selectivo celebrado en Verducido.^[9]

Xa en Toquio, logrou meterse na final despois de conseguir un terceiro posto na primeira serie, o primeiro lugar nos cuartos de final e un cuarto nas semifinais.^[10] Na final acadou o quinto posto, quedando a dúas décimas das medallas e regresando cun diploma olímpico.^[11] Un mes e medio despois proclamouse por primeira vez subcampioa do mundo de C1 200 m, no certame celebrado en Copenhague, onde quedou segunda por detrás da canadense Katie Vincent e por diante da polaca Dorota Borowska.^[12]

Nos Campionatos de Europa de 2022 en Múnic, conseguiu o ouro na proba de C1 200 metros e a prata no C2 da mesma distancia, onde competiu xunto a María Corbera.^[13] En 2023 participou nos Xogos Europeos en Cracovia, que no referente ao piragüismo funcionaron como un Campionato Europeo. Conseguiu o ouro na proba de C2 200 m mixto,, na que participou xunto ao cangués Pablo Graña, e a prata no C2 500 m, con Corbera como compañeira.^[14]

Ese mesmo ano disputou unha nova edición do Campionato Mundial, na cidade alemá de Duisburgo, onde sumou tres novas medallas de prata. A primeira delas chegou na final do C1 200, onde foi superada só pola cubana Yarisleidis Cirilo e na que quedou por diante da chinesa Lin Wenjun, resultado co que conseguiu praza para os Xogos Olímpicos de 2024.^[15] Unha hora máis tarde quedou de novo segunda na final do C2 200, xunto a María Corbera, só por detrás da parella chinesa formada por Lin Wenjun e Shuai Changwen.^[15] Ao día seguinte a parella Jácome-Corbera sumou a prata tamén no C2 500, así como outro billete olímpico.^[16]

Nos Campionatos Europeos de 2024 celebrados en Szeged conseguiu o seu terceiro ouro, no C2 200 xunto a Corbera, e levou tamén a prata do C1 200. ^[17]

Nos Xogos Olímpicos de 2024 participou en dúas modalidades: C-1 200 metros e C-2 500 metros, nesta última xunto a María Corbera. Disputou primeiro o C-2, conseguindo sen problemas o pase á final. Nesta remataron na sexta posición, a máis de tres segundos das chinesas Xu Shixiao e Sun Mengya.^[18] No C-1 200 meteuse tamén na final, despois de ser segunda da súa serie na rolda inicial e terceira nas semifinais. Xa na tirada final cruzou a meta na cuarta posición, nun apertado final con seis deportistas en menos dun segundo.^[19]

Palmarés internacional

Piragüismo en augas tranquilas

Campionato do Mundo
Ano	Lugar	Medalla	Competición
2021	Copenhague	Prata	C1 200 m
2023	Duisburgo	Prata	C1 200 m
		Prata	C2 200 m
		Prata	C2 500 m
Campionato Europeo
Ano	Lugar	Medalla	Competición
2022	Múnic	Ouro	C1 200 m
		Prata	C2 200 m
2023	Cracovia	Ouro	C2 500 m mixto
		Prata	C2 200 m
2024	Szeged	Ouro	C2 200 m
		Prata	C1 200 m

Notas

1. "Antía Jácome Couto" (en castelán). Comité Olímpico Español. Arquivado dende o orixinal o 03 de setembro de 2018. Consultado o 02 de setembro de 2018. 
2. "Antía Jácome, bronce mundial en la Copa Sprint". La Voz de Galicia (en castelán) (Pontevedra ed.). 8 de xuño de 2016. p. 9. 
3. "Pablo Graña, campión do Mundo". Galicia Confidencial. 30 de xullo de 2017. Consultado o 31 de xullo de 2021. 
4. "Resultados Belgrado 2018". CanoeResults (en inglés). Consultado o 15 de novembro de 2019. 
5. "Resultados Montemor 2018" (PDF). CanoeICF (en inglés). Consultado o 15 de novembro de 2019. 
6. "Cuatro medallas para Antía Jácome, María Corbera y Patricia Coco en Verducido" (en castelán). 19 de maio de 2019. Consultado o 15 de novembro de 2019. 
7. "Patricia Coco tendrá que buscar los Juegos en el Europeo" (en castelán). 26 de agosto de 2019. Consultado o 15 de novembro de 2019. 
8. "Resultados Szeged 2019" (PDF). CanoeICF (en inglés). Consultado o 15 de novembro de 2019. 
9. "Antia Jácome, en C1200 metros, logra la última plaza olímpica". Marca (en castelán). 1 de xullo de 2021. Consultado o 31 de xullo de 2021. 
10. Espiño, Diego (4 de agosto de 2021). "Antía Jácome avanza a semifinais na súa estrea nos Xogos Olímpicos". Pontevedra Viva. Consultado o 5 de agosto de 2021. 
11. Espiño, Diego (5 de agosto de 2021). "Diploma olímpico para Antía Jácome cun brillante quinto posto no C-1 200 metros". Pontevedra Viva. Consultado o 5 de agosto de 2021. 
12. Dapena, Almu (19 de setembro de 2021). "Medalla de prata para Antía Jácome no Campionato do Mundo Sprint de Copenhague". Pontevedra Viva. Consultado o 19 de setembro de 2021. 
13. "Adrián Sieiro y Antía Jácome, medallas de oro en los europeos de Múnich". La Voz de Galicia (en castelán). 18 de setembro de 2022. Consultado o 1 de xaneiro de 2024. 
14. Dapena, Almu (24 de xuño de 2023). "Antía Jácome y Pablo Graña, campeones de Europa en C-2 200 mixto". Pontevedra Viva (en castelán). Consultado o 1 de xaneiro de 2024. 
15. "Antía Jácome se baña en plata y sella su billete para los Juegos Olímpicos de París". Diario de Pontevedra (en castelán). 25 de agosto de 2023. Consultado o 1 de xaneiro de 2024. 
16. "Tercera plata mundialista para Antía Jácome y plaza para París en el C2 500 con María Corbera". Pontevedra Viva. 26 de agosto de 2023. Consultado o 1 de xaneiro de 2024. 
17. "Antía Jácome, plata en el C1 200 de los campeonatos de Europa". Marca (en castelán). 16 de xuño de 2024. Consultado o 28 de xuño de 2024. 
18. Carrazoni Mier, Yuri (9 de agosto de 2024). "Cando dalo todo non é abondo: crónica dunha xornada regular no piragüismo na que escaparon os metais". Nós Diario. Consultado o 10 de agosto de 2024. 
19. Carrazoni Mier, Yuri (10 de agosto de 2024). "Novo diploma para Antía Jácome, cuarta na final do C1 200 a só 66 centésimas do ouro (e o récord olímpico)". Nós Diario. Consultado o 10 de agosto de 2024. 

Véxase tamén

Outros artigos

• Piragüismo en augas tranquilas
• Galegos nos Xogos Olímpicos de 2020

Ligazóns externas

• Datos da piragüista no sitio web da Federación Internacional de Piragüismo (en inglés).
• Datos da piragüista Arquivado 31 de xullo de 2021 en Wayback Machine. no sitio web do Comité Olímpico Internacional (en inglés).