Calocedrus

Calocedrus
Calocedrus decurrens San Jacinto Mountains, sur de California
Clasificación científica
Reino: Plantae División: Pinophyta Clase: Pinopsida Orde: Pinales Familia: Cupressaceae Subfamilia: Cupressoideae Xénero: Calocedrus Kurz, 1873
Especies
Véxase o texto

Calocedrus é un xénero de coníferas da familia das cupresáceas, subfamilia das cupresoideas, que comprende catro especies admitidas actualmente, unha propia de Norteamérica e as outras tres de Asia oriental.

Características

As principais características das especies deste xénero son:^[1]

• Son árbores perennifolios de gran porte, coa copa cónica, estreita, ramaxe densa, con numerosas pólas sinuosas coas ramiñas separadas en abano.
• A follaxe está composta por follas escamentas bastante longas, decorrentes na base, de cor verde, que desprenden un olor resinoso bastante forte cando se fregan.
• Son especies monoicas.
• As flores masculinas son duns 3 mm de lonxitude, globulares e douradas, e as femininas, primeiramente, dunha cor verde intensa, que se transforman, despois da fecundación e maduración, en pequenos conos ovoides, estreitos e rematados en punta.
• As piñas son pardas ao maduraren (despois dun ano, aproximadamente), liberando entón pequenas sementes aladas.
• Os ramallos son parecidos aos das tuias e os camecíparis, dos que se diferencian polas súas escamas máis alongadas, e de dous a tres veces máis longas ca largas.

Taxonomía

Descrición

A especie foi descrita en 1873 polo botánico alemán Wilhelm Sulpiz Kurz nun traballo publicado en J. Bot. 11: 196, t. 133.^[2][3]

Etimoloxía

O nome científico Calocedrus está formado pola unión dos elementos do latín científico calo- e -cedrus. O primeiro deriva do grego antigo καλός kalós, "fermoso", e o segundo do latín cedrus, tirado do grego antigo κέδρος kédros, "cedro". Literalmente: "cedros fermosos".

Sinónimo

• Librocedrus decurrens Torrey ^{[4] [5]}
• Heyderia K.Koch (homónimo ilexítimo) ^[6]

Especies

Na actualidade recoñécense dentro do xénero as seguintes catro especies:^[2][7]

• Calocedrus decurrens (Torr.) Florin
• Calocedrus formosana (Florin) Florin
• Calocedrus macrolepis Kurz
• Calocedrus rupestris Aver., T.H.Nguyên & P.K.Lôc

En Galicia

Destas catro especies, en Galicia a única cultivada en parques e xardíns é a C. decurrens, o cedro de California,^[4] que, a pesar da súa elegancia, só se encontra no parque de Padrón (tres exemplares moi antigos), no paseo da da Ferradura de Santiago,^[4] e no xardín do Pazo de Torrecedeira en Redondela, que figura no catálogo de árbores senlleiras de Galicia elaborado pola Xunta de Galicia.

Notas

1. Calocedrus en The gymnosperm Database.
2. Calocedrus en Tropicos.
3. Calocedrus no IPNI.
4. Castro, Freire & Prunell 1989, p. 70.
5. Mitchell 1979, p. 74.
6. "Kew World Checklist of Selected Plant Families, Calocedrus". Arquivado dende o orixinal o 18 de outubro de 2019. Consultado o 12 de xaneiro de 2018. 
7. Calocedrus na The Plants List.

Véxase tamén

Wikimedia Commons ten máis contidos multimedia na categoría:  Calocedrus

Wikispecies posúe unha páxina sobre:  Calocedrus

Bibliografía

• Castro, Marisa, Luís Freire e Antonio Prunell (1989): Guía das Árbores de Galicia. Autóctonas e ornamentais. Vigo: Edicións Xerais de Galicia. ISBN 84-7507-406-5.
• Christenhusz, M. J. M., J. L. Reveal, A. K. Farjon, M. F. Gardner, R. R. Mill & M. W. Chase (2011): "A new classification and linear sequence of extant gymnosperms". Phytotaxa 19: 55–70.
• Farjon, A. (1998): World Checklist and Bibliography of Conifers. Royal Botanic Gardens, Kew. 300 p. ISBN 1-900347-54-7.
• Farjon, A. (2005): Monograph of Cupressaceae and Sciadopitys. Royal Botanic Gardens, Kew. ISBN 1-84246-068-4.
• Gadek, Paul A.; Deryn L. Alpers, Margaret M. Heslewood & Christopher J. Quinn (2000): "Relationships within Cupresaceae senus lato: A combined morphological and molecular approach" (Ler o texto completo). American Journal of Botany 87 (7): 1044–1057.
• Mitchell, Alan (1979): Guía de campo de los árboles de Europa. Barcelona: Ediciones Omega, S. A. ISBN 84-2820-549-3.
• Rushforth, Keith D. (1987): Conifers. Cidade de Nova York, Nova York, USA: Facts on File. ISBN 978-0-8160-1735-5.

Outros artigos

• Cupresáceas
• Cupresoideas

Ligazóns externas

• Calocedrus en The gymnosperm Database (en inglés).
• Calocedrus Kurz en Flora of North America (en inglés).
• Calocedrus na EOL (en inglés).