Chacolí

Acios de uva para a elaboración do chacolí, nun camiño entre Getaria e Zarautz

O chacolí ^[1] (do éuscaro txakolin) é unha bebida alcohólica producida a partir de uvas verdes, o que provoca unha certa acidez. As variedades cultivadas son a Hondarribi zuri e a Hondarribi beltza (esta última moito menos estendida). Lixeiramente carbonatado, cunha gradación alcohólica duns 10'5-12º vol. A maior produción céntrase no País Vasco, especialmente nas adegas das localidades costeiras de Getaria e Zarautz, ambas as pertencentes á Denominación de Orixe Getariako Txakolina.

Produción

A produción é principalmente de viño branco, aínda que en menor cantidade tamén se producen rosados e tintos. A cor do viño branco é amarelo pálido; en nariz denota intensos aromas a cítricos, herbas e flores; en boca é fresco, lixeiramente acedo e fácil de beber, ten que servirse fresco.

Outrora o chacolí era producido en casaríos ou casas de campo de xeito artesanal, antes de consumilo escanciábase como se lle fai á sidra natural actualmente, isto é debido a que antigamente non se filtraba nin clarificaba. Nos últimos anos varias adegas empezaron a estudar e mellorar a súa elaboración para conseguir mellor gusto e aromas, obtendo viños cun sabor moi satisfactorio.

A súa produción non é moi ampla e é consumido principalmente no País Vasco, A Rioxa, Navarra e Miranda de Ebro estendéndose aos poucos a outras zonas grazas á restauración, aínda que antigamente tamén era producido en zonas de Cantabria e Burgos.

Denominacións

• Bizkaiko Txakolina: Denominación de Biscaia. Principalmente en Bakio e Balmaseda.
• Getariako Txakolina: Denominación de Getaria (Guipúscoa). Principalmente en Getaria, Zarautz e Aia.
• Arabako Txakolina: Denominación de Álava. No Vale de Ayala.
• Costa de Cantabria: Indicación Xeográfica onde o chacolí de Cantabria está incluído.
• Val de Mena: Produtor de chacolí desde hai séculos pero aínda sen Denominación de Orixe Cualificada

Notas

1. Definicións no Dicionario da Real Academia Galega e no Portal das Palabras para Chacolí.

Véxase tamén

Ligazóns externas

• Chacolí de Álava (en castelán)
• Chacolí de Biscaia (en castelán)
• Chacolí do Getaria (en castelán)
• Tenda oficial das DOs de Euskadi (en castelán)