Ndabaningi Sithole

Ndabaningi Sithole

Biografía
Nacemento	31 de xullo de 1920 Cimbabue
Morte	12 de decembro de 2000 (80 anos) Filadelfia, Estados Unidos de América
Member of the National Assembly of Zimbabwe ^(en)
Datos persoais
Relixión	Metodismo
Educación	Achimota School ^(en) Andover Newton Theological School ^(en)
Actividade
Ocupación	político, pastor
Partido político	União Nacional Africana do Zimbábue ^(pt) União do Povo Africano do Zimbábue ^(pt)
Outro
Condenado por	traizón
Descrito pola fonte	Africa: An Encyclopedic Reference ^(en) , (vol:2)

Ndabaningi Sithole, nado en Nyamandhovu o 31 de xullo de 1920 e finado en Filadelfia o 12 de decembro de 2000, foi un escritor, pastor congregacionalista e político cimbaués, foi un dos fundadores o 1 de xullo de 1963 da Unión Nacional Africana de Cimbaue(ZANU), organización que se opuxo ao goberno de Rodesia^[1] e pasou en prisión dez anos tras o goberno prohibir o ZANU.

Traxectoria

Educouse en misións cristiáns e grazas a unha bolsa estudou maxisterio no Waddilove Training Institute (1939-1941) e traballou como profesor en escolas e institutos de Rodesia. En 1948 realizou estudos bíblicos na Tegwani Training Institution, converténdose en predicador metodista, primeiro da Igrexa Metodista de Gran Bretaña e a partir de 1950 da Igrexa Metodista Unida e profesor na Misión Americana Metodista, que o enviou aos Estados Unidos para estudar teoloxía entre 1955 e 1958^[2] en Newton Theological College e ordenouse ministro da Igrexa Unida de Cristo^[3] á súa volta a Rodesia en 1958 ^[4] . A publicación do seu libro African Nationalism e a súa prohibición inmediata polo goberno de minoría branca motivou a súa entrada na política, primeiro na organización de Joshua Nkomo, o Partido Demócrata Nacional.

ZANU

Fundou a Unión Nacional Africana de Cimbabue en agosto de 1963 canda Herbert Chitepo, Robert Mugabe e Edgar Tekere. O congreso do partido que se celebrou en Gwelo en 1964 elixiu a Sithole como o seu presidente e a Robert Mugabe o seu secretario xeral. Ao pouco o goberno de Ian Smith prohibiu o ZANU e logo do seu arresto o 22 de xuño de 1964, Sithole pasou dez anos en prisión xunto con Mugabe, Tekere, Nyagumbo e Takawira polas súas actividades políticas.^[5] Mentres estivo na cadea autorizou especificamente a Chitepo para continuar a loita no estranxeiro como representante da ZANU. A condena de Sithole foi por tramar o asasinato de Ian Smith e saíu do cárcere en 1974 e marchou ao exilio en Tanzania.

O 18 de marzo de 1975 asasinaron a Chitepo en Lusaca cun coche bomba. En Mozambique, Mugabe asumiu unilateralmente o control do ZANU. A finais dese ano procuciuse unha escisión no ZANU, unha facción, principalmente formada polos ndebele, seguía a Joshua Nkomo. Sithole fundou o moderado ZANU-Ndonga que renunciou á loita armada mentres o ZANU dirixido por Mugabe, denominado agora ZANU PF e controlado principalmente por shonas, seguía unha axenda máis militante.^[6]

Sithole uniuse a un goberno de transición de brancos e negros o 31 de xullo de 1979.^[7] Máis tarde en setembro de 1979 estivo presente no acordo de Lancaster House, presidido por Lord Carrington, que abría o camiño para a celebración de eleccións, mais os guerrilleiros do ZANLA de Mugabe atacaron a zona de influencia do ZANU-Ndonga e non logrou deputado ningún nesas eleccións.

Exilio e regreso

Declarando que a súa vida estaba en perigo por motivos políticos, Sithole autoexiliouse ao Reino Unido en 1980 e logo en Silver Spring nos Estados Unidos en 1984. Volveu a Cimbaue en 1992.^[8] Nas eleccións de 1995 saíu elixido pola circunscrición de Chipinge e presentou a súa candidatura ás eleccóns presidenciais de 1996 así e todo retirouna pouco antes da votación afirmando que o ZANU PF de Mugabe lle impedía facer campaña.^[9] En decembro de 1997 un tribunal condenouno por conspiración para asasinar a Mugabe e o goberno inhabilitouno para acudir ao parlamento. Non obstante Sithole volveu gañar o escano nas eleccións en Chipinge nas eleccións de xuño de 2000

Obra

Sithole é autor da primeira novela en nbedele^[10] Umvukela WamaNdebele publicada en 1956 pola Oficina de Literatura de Rodesia do Sur co título de Amandebele kaMzilikazi. Tamén o autor The Polygamist, unha novela publicada en 1972 por The Third Press/Joseph Okpaku Publishing en Nova York.

Notas

1. Veenhoven, Willem Adriaan, Ewing e Winifred Crum. Case Studies on Human Rights and Fundamental Freedoms: A World Survey, 1975, p. 326
2. "Ndabaningi Sithole". Encyclopedia Britannica (en inglés). Consultado o 2020-04-06. 
3. Vesta Sithole (2006) My Life With An Unsung Hero, p. 8
4. Necrolóxica The Guradian, 15 de decembro de 2000
5. "Rhodesia Seizes a Foe of Regime - Sithole, Rival of Nkomo, to Face Charges Soon - Article - NYTimes.com", 23 de xuño de 1964
6. "R.W. Johnson · How Mugabe came to power: Wilfred Mhanda · LRB 22 de febreiro de 2001".
7. "Black Opposition Leader in Rhodesia Ends Boycott" New York Times, 1 de agosto de 1979.
8. Michael Cowen e Liisa Laakso. Multi-party Elections in Africa, 2002, p. 339
9. "Zimbabwe President's Last Rival Withdraws From Election", New York Times, 16 de marzo de 1996
10. Emmanuel Chiwome e Zifikile Mguni(2012) Zimbabwean Literature in African Languages: Crossing Language Boundarie. African Books Collective, p. 40