Opérculo (peixes)

Para outras páxinas con títulos homónimos véxase: Opérculo.

Campanologies hectoris
1. Opérculo.
2. Liña lateral.
3. Aleta dorsal.
4. Aleta adiposa.
5. Pedúnculo caudal.
6. Aleta caudal.
7. Aleta anal.
8. Fotóforos.
9. Aletas pelvianas.
10. Aletas pectorais.

O opérculo dos peixes óseos é unha peza dura, de natureza ósea, que cobre e protexe as branquias. Na maioría dos peixes, o límite posterior do opérculo marca o límite entre a cabeza e o tronco.

O opérculo está composto por catro ósos fusionados:

• opérculo (propiamente dito)
• preopérculo
• interopérculo
• subopérculo

A morfoloxía desta característica anatómica ten grandes variacións entre especies. Por exemplo, no Lepomis macrochirus ten unha extensión arredondada orientada posterior e dorsalmente cunha pequena mancha negra. Nalgunhas especies o opérculo pode empuxar auga desde a cavidade bucal a través das branquias.

Para algúns peixes o opérculo é vital para a obtención de oxíxeno. Ábrese cando a boca pecha, causando presión negativa no lado externo das branquias para que a auga flúa cara a menor presión a través destas, permitindo o intercambio de oxíxeno nas lamelas (lamellae) das branquias.

Os peixes cartilaxinosos non teñen opérculo. Posúen outros métodos para o paso da auga polas branquias.