Píleo (ornitoloxía)

Para outras páxinas con títulos homónimos véxase: Píleo.

Píleo de cor vermella dun exemplar xuvenil de peto real (Dendrocopos major).

Cabeza de grúa xaponesa (Grus japonensis), co seu píleo vermello.

O píleo, en ornitoloxía, é o termo técnico para referirse á parte superior da cabeza das aves,^[1] tamén denominado curuto por algúns ornitólogos galegos.^[2][3] O píleo comenza tras da fronte e prolóngase até a caluga.

O píleo de moitas aves destaca por ter a plumaxe de distinta cor, ou por ter plumas de lonxitude diferente ao resto das outras da cabeza. Algunhas aves presentan patróns listados nesta parte da cabeza; se a franxa percorre o píleo lonxitudinalmente na súa parte central denomínase lista pileal media, e se o fai polos laterais desígnase lista pileal lateral.^[4]

A cor, a forma e outras características da plumaxe do píleo son útiles para a identificación dalgunhas aves, tanto para diferenciar individuos de especies de aspecto semellante como para distinguir a membros da mesma especie de diferentes sexos e idades. A cor da plumaxe do píleo pode variar entre os distintos sexos dunha mesma especie; por exemplo, os machos da papuxa das amoras (Sylvia atricapilla) teñen o píleo negro e as femias de cor parda avermellada.^[5] Tamén pode ser diferente a cor do píleo dos adultos e os inmaturos da mesma especie; por exemplo, nos adultos do peto real (Dendrocopos major) é negro e nos individuos xuvenís é vermello.^[6]

Nalgunhas especies a coloración do píleo é variábel segundo a estación do ano. En moitos membros da familia dos estérnidos (Sternidae) —a familia dos carráns— cuxo píleo é negro durante a estación reprodutiva, vólvese parcial ou totalmente branco fóra dela.^[7] O mesmo ocorre con certas gaivotas —familia dos láridos (Laridae)—.

Galería de imaxes

• 
  A cor do píleo de moitos carráns varía ao longo do ano. Na foto, o carrán Thalasseus bergii.
• 
  As papuxas das amoras (Sylvia atricapilla) teñen o píleo e a fronte da mesma cor: os machos, negra, e as femias, avermellada.
• 
  As plumas do píleo do ampelis europeo (Bombycilla garrulus) prolónganse por riba da caluga.
• 
  A estreliña común (Regulus ignicapilla) presenta bandas no seu píleo.

Notas

1. Definición de píleo no dicionario da RAG [1] Arquivado 22 de xullo de 2013 en Wayback Machine.
2. Penas Patiño (1980), p. 23.
3. Penas Patiño (1991), p. 11.
4. Juana, de e Varela (2000). Contraportada.
5. Beaman e Madge (1988), p. 677.
6. Beaman e Madge (1988), p. 534.
7. Beaman e Madge (1988), p. 449.

Véxase tamén

Bibliografía

• Beaman, Mark e Steve Madge (1998): Guía de identificación. Aves de Europa, norte de África y Próximo Oriente. Barcelona: Ed. Omega. ISBN 84-282-0946-4.
• Juana, Eduardo de e Juan M. Varela (2000): Guía de las aves de España, península, Baleares y Canarias. Lynx Edicions SEO/Birdlife. ISBN 84-87334-26-1.
• Penas Patiño, Xosé M. et al. (1980): Guía das aves de Galicia. Vigo: Ed. Galaxia. ISBN 84-7154-379-6.
• Penas Patiño, Xosé M. et al. (1991): Guía das aves de Galicia. A Coruña: Baía Edicións. ISBN 84-87674-06-2.
• Peterson, Roger et al. (1973): Guía de campo de las aves de España y demás países de Europa. Barcelona: Ed. Omega. ISBN 84-282-0334-2.

Outros artigos

• Penacho
• Crista