Tifis

Tifis e Argos construíndo a nave, baixo a dirección de Atenea (relevo romano, c. s. I, Museo Británico)

Na mitoloxía grega, Tifis foi o temoneiro que gobernaba o Argo, a nave na que se embarcaron os argonautas para tomar o vélaro de ouro. Era fillo de Hagnias ^[1], se ben outros autores fano fillo de Forbante e Hirmine ^[2] ou de Tife (ou Sife). Pausanias escribiu que había unha pequena cidade chamada Tifa (ou Sifas), na Beocia, da que procedía Tifis; os habitantes facían gala de ser os mellores navegantes da rexión ^[3].

Coñecía abondo os ventos e o movemento dos astros, habilidades que lle proporcionara Atenea, se ben non participou nunca nas batallas desenvolvidas en terra firme polos seus compañeiros os argonautas. Grazas a un cunco máxico que lle regalara Medea, e que a ela llo dera Tritón, soubo o camiño a seguir para saír do lago Tritonis, en Libia, e volver ó mar.

Tifis morreu dunha enfermidade súbita estando os argonautas no palacio do rei Lico, no país dos mariandinos, na beira sur do Ponto Euxino (denominación clásica do Mar Negro), e foi substituído como temoneiro do Argo por Anceo, fillo de Poseidón, que continuou a viaxe ata a Cólquida ^[4].

"Tifis pereceu dunha enfermidade no país dos mariandinos, na Propóntide, xunto ó rei Lico. No seu lugar, Anceo, fillo de Neptuno, gobernou a nave ata a Cólquide".

(Hixino: Fábulas 14, 26)

Notas

1. Pseudo-Apolodoro I, 9, 16; Grimal, s.v. Tifis.
2. Hixino: Fábulas 14, 9.
3. Pausanias: Geografía de Grecia IX, 32, 4.
4. Hixino 18, 1; Pseudo-Apolodoro I, 9, 23.

Véxase tamén

Bibliografía

• Grimal, Pierre (1981). Diccionario de mitología griega y romana. Paidós. ISBN 9788449324574.  (en castelán)
• Hixino (2009). Fábulas mitológicas. Alianza Editorial. ISBN 9788420650722.  (en castelán)
• Pausanias (2002). Descripción de Grecia (libros VII-X). Gredos. ISBN 8424926595. 
• Pseudo-Apolodoro (2016). Biblioteca mitológica. Alianza Editorial. ISBN 9788491044277.  (en castelán)