Եվա Բոուրինգ
| Եվա Բոուրինգ | |
| |
| Կուսակցություն՝ | ԱՄՆ Հանրապետական կուսակցություն |
|---|---|
| Մասնագիտություն՝ | քաղաքական գործիչ |
| Ծննդյան օր | հունվարի 9, 1892 |
| Ծննդավայր | Նևադա, Միսսուրի, ԱՄՆ |
| Վախճանի օր | հունվարի 8, 1985 (92 տարեկան) |
| Վախճանի վայր | Գորդոն, Շերիդան շրջան, Նեբրասկա, ԱՄՆ |
| Քաղաքացիություն |  ԱՄՆ
|
| Ամուսին | Arthur Bowring? |
Եվա Բոուրինգ (անգլ.՝ Eva Kelly Bowring, հունվարի 9, 1892, Նևադա, Միսսուրի, ԱՄՆ - հունվարի 8, 1985, Գորդոն, Շերիդան շրջան, Նեբրասկա, ԱՄՆ), ամերիկացի քաղաքական և պետական գործիչ, 1954 թվականի ապրիլի 16-ից մինչև նոյեմբերի 7-ը Նեբրասկայից եղել է ԱՄՆ սենատոր։
Կենսագրություն
[խմբագրել | խմբագրել կոդը]1928 թվականին ամուսնացել է Արթուր Բոուրինգի հետ և տեղափոխվել Նեբրասկա նահանգի Չերի շրջանում գտնվող Բոուրինգ ռանչոյի նրա տուն։ Իր ապագա ամուսնու հետ Եվան պատահաբար հանդիպել է, երբ վերջինս օգնել է նրան, երբ իր մեքենան փչացել էր Բոուրինգ ռանչոյի մոտակայքում։ Արթուրն ու Եվան միասին ապրել են 16 տարի։ Սրտի կաթված ստանալուց հետո 1944 թվականին Արթուրը մահացել է Չադրոն քաղաքի հիվանդանոցում[1]։
Բոուրինգ ամուսիններն ակտիվ գործունեություն են ծավալել Նեբրասկա նահանգի հանրապետական կուսակցությունում։ Արթուրը ծառայել է որպես շրջանային լիազոր` մասնակցելով շրջանի կառավարմանը, 1927-1929 թվականներին հանրապետականների կուսակցությունից եղել է Նեբրասկա նահանգի Ներկայացուցիչների պալատի անդամ, 1930-1933 թվականներին՝ նահանգի Սենատի անդամ[2][3]։
Ամուսնու մահից հետո Եվան շարունակել է ինքնուրույն զբաղվել ռանչոյով՝ չմոռանալով քաղաքականության մասին։ 1954 թվականին Բոուրինգին նահանգապետ Ռոբերտ Բ. Քրոսբին նշանակել է ԱՄՆ Սենատի կազմում Դուայթ Գրիզուոլդի մահից հետո թափուր մնացած տեղը զբաղեցնելու համար։ Եվա Բոուրինգը Սենատում Նեբրասկան ներկայացնող առաջին կինն է եղել։ Նրա ծառայությունը Սենատում շարունակվել է 1954 թվականի ապրիլի 16-ից նոյեմբերի 7-ը։ Նեբրասկայում տասնհինգերորդ Սենատի ժամկետը, որը տևել է 1949 թվականի հունվարի 3-ից մինչև 1955 թվականի հունվարի 3-ը, անսովոր էր այն բանում, որ այդ ընթացքում փոխվել է վեց սենատոր։ Բոուրինգը նրանցից չորրորդն էր։
Սենատում ծառայելուց հետո Եվա Բոուրինգը վերադարձել է ռանչո։ 1956-1964 թվականներին միաժամանակ ոչ լրիվ դրույքով աշխատել է ԱՄՆ արդարադատության նախարարության պայմանական վաղաժամկետ ազատման խորհրդում։ Բոուրինգը մահացել է 1985 թվականին Ներբասկայում՝ իր 93-րդ ծննդյան օրվանից ընդամենը մեկ օր առաջ։ Անհանգստանալով ռանչոյի ճակատագրի համար՝ նախկին սենատորը 132 հեկտար մակերեսով Բոուրինգ ռանչոն կտակել է Նեբրասկա նահանգին՝ ի հիշատակ իր ամուսնու[4]։ Նեբրասկայի խաղերի ու այգիների հանձնաժողովն այն վերածել է պատմական այգու (անգլ.՝ Bowring Ranch State Historical Park): Ռանչոն նախկինի պես շահագործվում է որպես աշխատող անասնաբուծական տնտեսություն, որտեղ աճեցվում են հերեֆորդի ցեղատեսակի կովեր։ Ռանչոյի տունը և շինությունները պահպանվել են, այնտեղ է գտնվում նաև այցելուների համար նախատեսված Մեծ կենտրոն, որտեղ կարելի է ծանոթանալ Բոուրինգների կյանքին վերաբերվող փաստաթղթերին։
Տես նաև
[խմբագրել | խմբագրել կոդը]Ծանոթագրություններ
[խմբագրել | խմբագրել կոդը]- ↑ 'Arthur Bowring, former state legislator, dies,' Nebraska State Journal, March 20, 1944, pg. 1
- ↑ 'Nebraska Blue Book 1932,' Biographical Sketch of Arthur Bowring, pg. 270
- ↑ «Early History of Cherry County, Nebraska». Արխիվացված է օրիգինալից 2018 թ․ հունիսի 12-ին. Վերցված է 2020 թ․ ապրիլի 25-ին.
- ↑ Emanuel, Mary Ethel A Love Story at Bowring Ranch (und) // Nebraska Life. — Т. 9. — № 4. — С. 83—84.
Արտաքին հղումներ
[խմբագրել | խմբագրել կոդը] | Վիքիպահեստն ունի նյութեր, որոնք վերաբերում են «Եվա Բոուրինգ» հոդվածին։ |
| ||||||
