Հնարավոր տեղափոխությունների սկզբունք

Հնարավոր տեղափոխությունների սկզբունք, մեխանիկայի վարիացիոն սկզբունքներից, ըստ որի նյութական մարմինների մեխանիկական համակարգի հավասարակշռության համար անհրաժեշտ է և բավարար, որ ցանկացած հնարավոր տեղափոխության դեպքում համակարգին կիրառված բոլոր ակտիվ ուժերի կատարած ${\displaystyle \delta A_{i}}$ աշխատանքների գումարը հավասար լինի զրոյի։ Մաթեմատիկորեն հնարավոր տեղափոխությունների սկզբունքը արտահայտվում է ${\displaystyle \sum \delta A_{i}\equiv \sum F_{i}\delta s_{i}\cdot cos\alpha _{i}=0}$ բանաձևով, որտեղ ${\displaystyle F_{i}}$-երը ազդող ակտիվ ուժերն են, ${\displaystyle \delta s_{i}}$–երը՝ այդ ուժերի կիրառման կետերի հնարավոր տեղափոխությունների մեծությունները, ${\displaystyle \alpha _{i}}$-երը՝ ուժերի և հնարավոր տեղափոխությունների ուղղություններով կազմված անկյունները։ Հնարավոր տեղափոխությունների սկզբունքը թույլ է տալիս, առանց կապերի անհայտ հակազդումները մտցնելու, գտնել համակարգի հավասարակշռության պայմանները, որն էապես պարզեցնում է լուծումը և ընդարձակում լուծելի խնդիրների դասը։

Այս հոդվածի կամ նրա բաժնի որոշակի հատվածի սկզբնական կամ ներկայիս տարբերակը վերցված է Քրիեյթիվ Քոմմոնս Նշում–Համանման տարածում 3.0 (Creative Commons BY-SA 3.0) ազատ թույլատրագրով թողարկված Հայկական սովետական հանրագիտարանից  (հ․ 6, էջ 463)։