Վիլեմ Ադիքս

Վիլեմ Ադիքս
Քաղաքացիությունը	Նիդերլանդների Թագավորություն
Ծննդյան ամսաթիվ	օգոստոսի 28, 1896(1896-08-28)[1]
Ծննդավայր	Ամստերդամ, Նիդերլանդներ
Մահվան ամսաթիվ	հուլիսի 8, 1985(1985-07-08) (88 տարեկան)
Մահվան վայր	Ամստերդամ, Նիդերլանդներ
Դիրք	հարձակվող

Վիլեմ (Վիմ) Ադիքս (հոլ.՝ Willem "Wim" Addicks, օգոստոսի 28, 1896(1896-08-28)^[1], Ամստերդամ, Նիդերլանդներ - հուլիսի 8, 1985(1985-07-08), Ամստերդամ, Նիդերլանդներ), հոլանդացի ֆուտբոլիստ, խաղացել է Ամստերդամի «De Meuen», Ամստերդամի ֆուտբոլային ակումբ (ԱՖԱ) և «Այաքս» ակումբների կազմում։ Նիդերլանդների ազգային հավաքականի կազմում անցկացրել է 3 խաղ, խփել 2 գոլ։

Վաղ տարիներ

Վիլեմը ծնվել է 1896 թվականի օգոստոսի 28-ին Ամստերդամ քաղաքում, Արի Թենիս Ադիքսի և Լինկա Հանսյումի ընտանիքում։ Նրա հայրը Հարդինկսվելդ քաղաքից էր, իսկ մայրը` Հիսենդամից։ Նրանք ամուսնացել են 1880 թվականի ապրիլին և երկար ժամանակ ապրել են Ամերսֆորթում։

Վիմը, հավանաբար, իր անունն ստացել է ավագ եղբոր պատվին, որը մահացել է մինչև իր ծնվելը` ապրելով ընդամենը 26 օր<sup>[2]</sup>։ Սա ընտանիքի միակ կորուստը չէր, 1886 թվականի մարտին մահացել է նրանց ավագ որդին` Մարտինյուս Կասիմիրը, որը ապրել է 22 ամիս։

Ադիքսն ունեցել է ավագ քույրեր` Լենա Գոսերինան (1880) և Աննա Հենդրիկան (1882) և եղբայրներ` Ադրիանը (1885), Մարտինյուս Կասիմիրը (1887) և Դիրք Նիկոլասը (1889)։

Ֆուտբոյալին կարիերա

Ակումբային կարիերա

Հայտնի է, որ մոտ 1915 թվականից Ադիքսը խաղացել է «De Meuen» ֆուտբոլային թիմում, միևնույն ժամանակ հրավիրվել է Ամստերդամի^[3] ազգային հավաքական, իսկ 1917 թվականից սկսել է խաղալ ԱՖԱ ակումբի կազմում^[4]։

1922 թվականի օգոստոսին Վիմ Ադիքսը և Էդի Համելը տեղափոխվել են «Այաքս»^[5], որը գլխավորում էր անգլիացի մարզիչ Ջեք Ռեյնոլդսը։ Երկու խաղացողներն էլ ակումբի կազմում իրենց դեբյուտը նշել են սեպտեմբերի 3-ին` խաղալով ավստրիական «Ֆյորստ»-ի<sup>[6]</sup> դեմ ընկերական հանդիպմանը։ Խաղն ավարտվել է «Այաքսի» պարտությամբ` 1:3 հաշվով։

«Այաքսի» կազմում առաջնությունում առաջին խաղը Վիմն անց է կացրել սեպտեմբերի 17-ին` «Բլաու Վիտա»-ի դեմ խաղում (4։ 0) և անմիջապես դարձել է դուբլի հեղինակ<sup>[7][8]</sup>։ 1922/23 դեբյուտային մրցաշրջանում Ադիքսը դարձել է 14 գոլի հեղինակ` մրցաշրջանում խաղալով 22 խաղում և դառնալով թիմի լավագույն ռմբարկու։ «Այաքս»-ը մրցաշրջանի արդյունքում զբաղեցրել է ընդամենը 5-րդ տեղը։

Հաջորդ մրցաշրջաններին Վիմը չի ընդգրկվել Ամստերդամի ֆուտբոլային ակումբի հիմնական կազմում, այլ եղել է պահեստայինների կազմում։ Ակումբում խաղալու 9 տարիների ընթացքում Ադիքսը հիմնական կազմում հանդես է եկել 28 խաղերում և խփել է 15 գնդակ։ «Այաքսի» կազմում վերջին խաղն անց է կացրել 1931 թվականի ապրիլի 19-ին, «Հերմես» ակումբի դեմ հանդիպմանը։ Նույն տարում Վիմը որոշել է ավարտել ֆուտբոլիստի իր կարիերան։

Ազգային հավաքական

Նիդերլանդների ազգային հավաքականում Վիմ Ադիքսն իր դեբյուտը նշել է 1923 թվականի ապրիլի 2-ին` խաղալով Ֆրանսիայի դեմ խաղում։ Հենց առաջին խաղում Վիմը դարձել է երկու գոլի հեղինակ, իսկ իր թիմը հաղթել է 8:1 հաշվով^[9]։ Ընդհանուր առմամբ, հավաքականի կազմում Վիմն անցկացրել է երեք խաղ և խփել է 2 գոլ։ Հավաքականի կազմում իր վերջին խաղն Ադիքսն անցկացրել է 1923 թվականի մայիսի 10-ին, Գերմանիայի ազգային հավաքականի դեմ հանդիպմանը, որն ավարտվել է 0:0 հաշվով^[10]։

Անձնական կյանք

Ադիքսն ամուսնացել է ադամանդագործի դուստր, 28-ամյա Գերտրուդ Հոլլանդսի հետ։ Նրանց ամուսնությունը գրանցվել է 1928 թվականի հոկտեմբերի 11-ին, Ամստերդամում։

Երկրորդ համաշխարհային պատերազմի ընթացքում Վիմի ավագ եղբայրը, Մարտինյուս Կասիմիրը, միացել է գերմանացի օկուպանտների դեմ ծավալվող շարժմանը։ Նրա որդին` Արի Ադդիսը, ևս դիմադրության անդամ էր։ 1941 թվականի սեպտեմբերի 6-ին Մարտինյուս Կասիմիրը գնդակահարվել է գերմանացիների կողմից, ովքեր ներխուժել էին նրա տուն` նրա որդուն ձերբակալելու նպատակով։ Սեպտեմբերի 27-ին Արին այնուամենայնիվ ձերբակալվել է, իսկ հոկտեմբերի 8-ին` գնդակահարվել։

Ուշ տարիներ

Իր կյանքի վերջին տարիներին Վիմը շարունակում էր մասնակցել իր նախկին ակումբի հասարակական գործունեությանը, այսպես, 1982 թվականի նոյեմբերի 20-ին հավաքվում են Այաքս ակումբի բազմաթիվ վետերաններ, ինչպիսիք են Տոն Բրանստեդերը, Գեր Ֆիշերը, Յան Փոթհարստը և Յոն դը Սթերքենը, Լուի Քոփենը և Ռիկյուս դը Վիտը, ինչպես նաև` «Այաքսի» տարբեր սերունդների խաղացողներ։

Վիմ Ադիքսը մահացել է 1985 թվականի հուլիսի 8-ին, Ամստերդամում, 88 տարեկան հասակում։

Ծանոթագրություններ

1. Transfermarkt.com(բազմ․) — 2000.
2. Вим Аддикс (29.12.1890—26.01.1891)
3. «Sportnieuws» (հոլանդերեն). kranten.kb.nl. Արխիվացված է օրիգինալից 2012 թ․ հունիսի 27-ին. Վերցված է 13.6.2012-ին.
4. «Periode 1895 — 1920» (հոլանդերեն). afc-amsterdam.nl. Արխիվացված է օրիգինալից 2012 թ․ հունիսի 27-ին. Վերցված է 13.6.2012-ին.
5. «Sportnieuws. Voetbal» (հոլանդերեն). kranten.kb.nl. Արխիվացված է օրիգինալից 2012 թ․ հունիսի 27-ին. Վերցված է 13.6.2012-ին.
6. «Ajax — First Vienna 1:3» (հոլանդերեն). kranten.kb.nl. Արխիվացված է օրիգինալից 2012 թ․ հունիսի 27-ին. Վերցված է 13.6.2012-ին.
7. «Ajax — Blaiw Wit 4:0» (հոլանդերեն). kranten.kb.nl. Արխիվացված է օրիգինալից 2012 թ․ հունիսի 27-ին. Վերցված է 13.6.2012-ին.
8. «Ajax — Blaiw Wit 4:0» (հոլանդերեն). kranten.kb.nl. Արխիվացված է օրիգինալից 2012 թ․ հունիսի 27-ին. Վերցված է 13.6.2012-ին.
9. Nederland — Frankrijk 8:1 Արխիվացված 2009-09-14 Wayback Machine
10. Duitsland — Nederland 0:0 Արխիվացված 2008-04-08 Wayback Machine

Վիքիպահեստն ունի նյութեր, որոնք վերաբերում են «Վիլեմ Ադիքս» հոդվածին։