In informatica, servicio de directorio o servicio de nomine associa le nomines de ressources reticular al lor adresses reticular respective. Illo es un infrastructura de information in commun pro trovar, administrar e organisar ressources de retes, le quales pote includer volumines, directorios, files, imprimitores, usatores, gruppos, apparatos, numeros de telephono e altere objectos. Un servicio de directorio es un componente critic de un systema de operation reticular. Un servitor de directorio es un servitor le qual provide un tal servicio. Cata ressource super le rete es considerate un objecto per le servitor de directorio. Le information super un ressource particular es immagazinate como un collection de attributos associate con iste ressource o objecto.
Un servicio de directorio defini un spatio de nomine pro le rete. Le spatio de nomine es usate pro assignar un "nomine" (identificator unic) a cata del objectos. Le directorios ha typicalmente un collection de regulas determinante como ressources reticular es nominate e identificate, le quales include normalmente un exigentia que le identificatores sia unic e non ambigue. Quando on usa un servicio de directorio, un usator non ha a rememorar se le adresse physic de un ressource reticular; provider un nomine situa le ressource. Alcun servicios de directorio include provisiones de controlo de accesso, limitante le disponibilitate del information de directorio al usatores autorisate.