Henning Wehn
| Henning Wehn | ||
| ||
| Profesiono: | komediisto | |
| Lando: |  Germania
| |
| Naskodato: | 10 di aprilo 1974 | |
| Nasko-loko: | Hagen, Nordrheno-Vestfalia, West-Germania | |
| Retoloko: | https://henningwehn.de/ | |
Henning Wehn, n. ye la 10ma di aprilo 1974, esas germana "stand-up"-komediisto e voyajero ilqua habitas London, Anglia.
Wehn studiis komerco-administro en Münster, Germania e laboris pri kliento-relati. En 2002, il translojis a Britania por laborar che la futbalo-klubo Wycombe Wanderers. Unvespere, il spektis amatorala komedio-spektaklo e decidis probar komedio. Pri sua decido restar en Britania, Wehn pose skribis:
Me unesme projetis restar en Britania dum nur 12 monati por plubonigar mea Angla, ma pro la bona vetero, la saporoza nutrivo e la alta-klasa mulieri, me restis. Por fitar kun la lokani, me decidis divenar extreme ociera, spensar pekunio quan me ne havas e, maxim importante, fanfaronar pri mea bonega humuro. Pro to me decidis, 1646 dii, non hori e 42 minuti ante nun, probar komedio e divenar la Germana Komedio-Ambasadisto.
Rezulte, depos oktobro 2003, Wehn esas la su-stiliziita "Germana Komedio-Ambasadisto en London". Pos komencar sua kariero kom "pre-akto" por diversa komediisti en London, il nun havas sua propra spektaklo che la britaniana komedio-cirkuito.
En 2014, Wehn ed altra komediisto, Mark Watson, prizentis voyajo-programo en Brazil titulizita The Road to Rio (La Voyo a Rio) por la TV-kanalo Dave. En la programo, li exploris la sporto-kulturo di ta lando. Henning ofte turis e pleis kun la germana komediisto Otto Kuhnle.
En mayo 2015, Wehn prizentis An Immigrant's Guide to Britain che Kanalo 4, segun lu: "Yen to quon me vere prizas pri la programo: ol mixas lejera temi (la employeso-merkato) a plu serioza temi (la trublo havar du aquo-robineti vice nur un) ed a le ultre-serioza (la britaniana klaso-sistemo)". En oktobro tayare, Wehn prizentis radio-dokumentalo Wall in the Head (Muro en la Kapo) che BBC World Service en qua il exploris "la nevidebla kultural e psikologial divido" inter estala e westala germani, duadek-e-kin yari pos la riuniono di Germania pos la falo dil Murego di Berlin.