Saving Iceland
Saving Iceland er alþjóðlegur hópur umhverfisverndarsinna sem berst fyrir verndun á náttúru Íslands. Í hópnum eru bæði Íslendingar og útlendingar og aðhyllast félagarnir að stórum hluta hugmyndir stjórnleysis, beinna aðgerða og borgaralegrar óhlýðni. Hefur hann einkum beint spjótum sínum gegn stóriðjustefnu íslenskra stjórnvalda, meðal annars með andspyrnutjaldbúðum við Kárahnjúka sumurin 2005 og 2006 (undir Snæfelli), í Mosfellssveit sumarið 2007 (í landi eyðibýlisins Gullbringu) og á Hellisheiði sumarið 2008. Einnig hefur hópurinn haldið fundi og vakið athygli á málstað sínum með ýmiss konar mótmælum, bæði á Íslandi og erlendis, og rekið heimasíðu.
Aðgerðir Saving Iceland hafa stundum hlotið mikla fjölmiðlaathygli og hefur sitt sýnst hverjum um gagnsemi og réttmæti aðgerðanna. Óhætt er því að segja að hópurinn sé umdeildur. Hefur lögregla oft haft afskipti af mótmælum hans, og nokkrir félaganna verið dregnir fyrir dómstóla vegna þeirra.
Aðgerðir
[breyta | breyta frumkóða]Mótmæli við Iðnaðarráðuneytið 7. ágúst 2009
[breyta | breyta frumkóða]Um 20 mótmælendur tóku sér stöðu fyrir utan iðnaðarráðuneytið á vegum samtakanna. Grænu skyri eða málningu var slett á húsið og á bifreið Katrínar Júlíusdóttur iðnaðarráðherra. Mótmælin snerust gegn undirritun fjárfestingasamnings vegna álvers Norðuráls í Helguvík, sem fram fór í ráðuneytinu á sama tíma. Sparkað var í höfuð lögreglumanns og annar var sleginn með fötu. Fimm voru handteknir, tvær konur og þrír karlar.[1] Síðar um daginn söfnuðust um 20 mótmælendur saman við lögreglustöðina við Hlemm og kröfðust þess að hinum handteknu yrði sleppt úr haldi.[2]
Mótmæli í Helguvík 24. ágúst 2009
[breyta | breyta frumkóða]Mótmælendur söfnuðust saman á Helguvíkursvæðinu í Reykjanesbæ vegna fyrirhugaðra álversframkvæmda Norðuráls á svæðinu. Alls var um átta mótmælendur að ræða og hlekkjuðu þeir sig meðal annars við grindverk á svæðinu.[3]
