ჩიჩეკ ხათუნი

ჩიჩეკ ხათუნი
მშობლიური სახელი Çiçek Hatun
დაბადების თარიღი 1443
გარდაცვალების თარიღი მაისი, 1498
კაირო, ეგვიპტე
მეუღლე(ები) მეჰმედ II
შვილ(ებ)ი ჯემი

ჩიჩეკ ხათუნი (თურქ. Çiçek Hatun) — ოსმალეთის იმპერიის სულთნის, მეჰმედ II-ის მე-4 ცოლი და ჯემ სულთანის დედა.[1]

ბიოგრაფია

[რედაქტირება | წყაროს რედაქტირება]

ჩიჩეკ ხათუნი დაიბადა თურქმენული წარმოშობის ანატოლიელი ბეგის ოჯახში 1443 წელს.[2][3] ასევე, მას ჰყავდა ძმა ალი-ბეი. 1458 წელს, თხუთმეტი წლის ასაკში მოხვდა სულთნის ჰარამხანაში და გახდა მისი რჩეული. 1459 წლის 22 დეკემბერს მას ერთადერთი ვაჟი — ჯემი შეეძინა.[4]

ოსმალური ტრადიციის მიხედვით, ყველა შეჰზადეს უნდა ემართა ანატოლიაში მდებარე ერთ-ერთი სანჯაყი. 1469 წელს, ძმა მუსტაფას გარდაცვალების შემდეგ, ჯემი კასთამონუს სანჯაყ-ბეიდ დაინიშნა და ჩიჩეკ ხათუნიც მასთან ერთად წავიდა კასთამონუში. 1474 წელს ჯემი ქარამანის მმართველად დაინიშნა.

1481 წელს, სულთან მეჰმედის გარდაცვალების შემდეგ ტახტი ბაიაზიდ II-მ დაიკავა. ჯემი იძულებული გახდა თავი ეგვიპტისათვის შეეფარებინა და თან წაიყვანა ჩიჩეკ ხათუნიც.

ჯემი 14 წლის განმავლობაში ცდილობდა როგორმე ძმისთვის ტახტი წაერთმია და ამ ყველაფერს ეგვიპტის დახმარებით აკეთებდა. 1495 წელს ჯემი ბაიაზიდის ბრძანებით მოწამლეს და მოკლეს.

ჩიჩეკ ხათუნმა შვილის გარდაცვალების შემდეგ სამი წელი იცოცხლა და 1498 წლის მაისში, კაიროში გარდაიცვალა.

სქოლიო

[რედაქტირება | წყაროს რედაქტირება]
  1. ↑ Ahmed Akgündüz, Said Öztürk (2011). Ottoman History: Misperceptions and Truths. Oxford University Press. ISBN 978-9-090-26108-9. 
  2. ↑ Muhammad Syaari Abdul Rahman, Berfikir Gaya Al-Fateh
  3. ↑ Franz Babinger, Mehmed the Conqueror and His Time, pg.173
  4. ↑ Leslie P. Peirce (1993). The Imperial Harem: Women and Sovereignty in the Ottoman Empire. Oxford University Press, გვ. 106–107. ISBN 978-0-195-08677-5.