Dowrgleudh Lanngollen
Dowrgleudh a dreus an or yntra Pow Sows ha Kembra yw an Dowrgleudh Lanngollen (Kembrek: Camlas Llangollen; Sowsnek: Llangollen Canal). An hyns-dowr a jun Lanngollen yn Pow Dinbygh, Kembra north, ha Hurleston yn Pow Ker soth, dre drev Ellesmere yn Pow Amothik. An hanow a veu gwrys y'n 1980ow avel klassans arnowyth rag rannow a'n Dowrgleudh Ellesmere istorek ha dowrgleudh-bosa gorholadow Lanngollen, an dhew a dheuth rann a Dhowrgleudh Kesunyans Pow Amothik yn 1846.
An dowrgleudh a der Ellesmere ha Whitchurch war y fordh a Langollen dhe Dhibarthva Hurleston, le may jun orth an Dowrgleudh Kesunyans Pow Amothik. Y feu byldyes y'n 19ves kansvledhen gans Thomas Telford hag yth yw 44 mildir (70.8 km) a-hys gans 21 lok. Dibarthva Trefrank Kembrek yw junyans gans an Dowrgleudh Trevaldwyn re beu dasygerys yn rann. Yma tri skorr le: kwarton mildir (0.4 km) dhe Ellesmere (ygor); tri mildir ha hanter (5.6 km) dhe Prees (mildir ha hanter ygor); ha mildir (1.6 km) dhe Egloswynn (kwarton mildir re beu dasygerys).
Porpas an dowrgleudh o karya glow, bryckys, kalgh ha horn a-dhyworth arenebedh diwysyansek Trerew Mabon dhe'n glannow ha citas yn Pow Sows. An dowrgleudh a gar dowr yntra Bolgh Dowrlamm an Nans Yeyn ha Dowrgleudh Kesunyans Pow Amothik, ow karya 50 milvil liter dhe Bow Ker keniver jorna.
Yma dowrbons dowrgleudh a-dreus dhe Nans Dowrdhuw ryb Keyn Meur henwys Dowrbons Ponskesellte (Traphont Pontcysyllte yn Kembrek). Yn 2009, y teuth 11 mildir (17.7 km) a'n dowrgleudh, yntra Pons Glesris ha Dowrlamm Bolgh an Nans Oor, dhe Ertachva an Bys.