Margot Benacerraf, direktrisa de sinema venezuelana de orijin djudio marrokano, nasió en la sivdad de Caracas el 14 de agosto del anyo 1926, ma ambeza sinema en la sivdad de Paris, enel IDHEC (Institut des hautes études cinématographiques, Instituto de Altos Estudios de Sinema). Los sus dos filmos mas konosidos son filmos dokumentalos: Reverón, filmo ke amostra la vida del pintor venezuelano Armando Reverón, i Araya, filmo ke amostra el lavoro echo por los lavorantes de las salinas de Araya, rejión ke se topa al Oryente de Venezuela.
Margot Benacerraf es konosida por sus eshuérsos por el dezvelopamyénto del sinema de Venezuela, yegando afilu a ser la fondadora de la Sinemateka Nasyonala enel anyo 1966 i su direktrisa por tres anyos sigidos. Endemas, izo parte de la Junta Direktiva del Ateneo de Karakas i enel anyo 1991, kon el ayudo del eskritor kolombiano Gabriel García Márquez, krió Fundavisual Latina, una fondasion ke nasió kon el buto de dezvelopar el sinema en Venezuela i Amerika Latina.
En fevrero del anyo 1987, el Ateneo de Karakas apertura una kamareta de sinema kon el su nombre, la kual apresenta endemas de filmos, ovras de arte i ensayos. Oy endiya, la kamareta aze parte del Circuito Gran Cine. En Oktubre de 2011, enel Festival Internasional de Sinema Djudio de Karakas, es rekonosida la su karriera enel sinema de Venezuela[1].