Paulette Cooper

Este artikolo uza la grafia de Aki Yerushalayim para la lingua judeo-espanyola. Mersi muncho por mantener el artikolo uzando este estil.
Paulette Cooper en 2008.

Paulette Marcia Cooper (Anvers, 26 de Djulio de 1942) es una eskritora Amerikana la kuala eskrivio en kontro de la Kilisia de la Sensiolojiya, ke kavzo malkerensia de los sientologos, los kualos la atadjizaron.

Biografiya

[trocar | trocar el manadero]

Cooper nasio komo Paula Bucholc en Anvers, Beljika. Los sus padres eran Chaim Bucholc i Ruchla Minkowski, djudios de Polonia ke arivaron a Anvers en las anyadas de 1920. Paula nasio el 26 de Djulio de 1942, kuando la Armada Nazi tenia okupada Beljika. Chaim, ke era kunduriero, era yevado ala prizion katro diyas antes ke eya nasiera; Ruchla era yevada ala prizion en Oktobre. Los dos eran amortados en Auschwitz. Alkunos amigos de la famiya eskondieron a Paula i la su ermana bohora, Sarah, ma la armada Nazi las topo. Unos amigos de la famiya dieron paras a los Nazis kon el buto de salvarlas. [1]Diskues de la Dosena Gerra Mondiala, bivio en varias kazas para guerfanos de Beljika, fina ke era adoptada por la famiya Cooper. Kuando eya era de edad de 6 anyos, la famiya Cooper dechidio irse a bivir en los Estados Unidos. Ya de edad de 8 anyadas, era sitizena amerikana.[2]

Kariera

[trocar | trocar el manadero]

Anke solo avlava franzes kuando yego a los Estados Unidos, ambezo presto la lingua inglesa. Ambezo psikolojiya en la Universita Brandeis en 1964. Prinsipio la su kariera komo eskritora en 1968, diskues de aresivir el su Master en psikolojiya en la Universita Harvard. Kuando abediguava relijiones komparadas en la Universita de Harvard un enverano, topo entereso en los muevos movimentos relijiozos i dechidio estudiar la Kilisia de la Sensiolojiya en 1968 i eskrivir ensima de eya.

Konflikto kon la Sensiolojiya

[trocar | trocar el manadero]

El konflikto de Cooper kon la Sensiolojiya prinspio en la anyada de 1970, kuando la Kilisia de la Sensiolojiya la yevo a un djuzgo enel Reino Unido por modre de un artikolo ke eya eskrivio i ke era publikado en la revista Queen de Londra. El su livro de 1971, "El Kepazelik de la Sensiolojiya" kontinuo lo ke eya tenia eskrito enel artikolo. El livro le krio mas dushmanes en la Kilisia de la Sensiolojiya, i en la anyada de 1971, la Kilisia la yevo al Djuzgo Supremo de la sivdad de Los Anjeles.[3] En las anyadas seguintes, la Kilia de la Sensiolojiya avrio 19 kavzos en kontro de eya por todo el mundo; eya avrio 3 kazos en kontro de eyos.[4]

Mientres ke eya abediguava ala Kilisia de la Sensiolojiya, Cooper aresivio munchos tentativas de atadjizamiento, entre eyos una operasion yamada Operation PC Freakout, kon la kuala kerian parar las kritikas de Cooper ala kilisia, tentando "yevarla a una timarana, o meterla en la prizion, o aharvarla kon huersa kon el modre de ke deshara los sus atakos en kontro de la kilisia".[5] En otra operasion yamada Operation Dynamite,[6] la Kilisia de la Sientolojiya mando letras kalb kon amenazas de bombas al buro de la Kilisa, aziendo kreyer ke eran eskritas por Cooper, uzando ojas kon las markas de los dedos de eya en un klasor; la Kilisia endemas tento mandar letras kalb kon amenazas de bombas a Henry Kissinger i una para una ambasada de un payis arabo, en protestasion por la Gerra ke aze en Mundo Arabo en kontro de Israel. La operasion era fayada kuando el FBI tomo por surpreza el buro de la Kilisia de la Sensiolojiya en 1977 i topo dokumentos en los kualos se avlava de la operasion.[7] En 1977, la kilisa tenia el plano de amortar a Cooper, ma no es shubesiz si tento azerlo.[8] Finalmente, la Kilisia de la Sensiolojiya aksepto un akodro ekstra-djuzgo kon Cooper en 1985.[9]

Cooper eskrivio en 1987 un monolog ensima de la su vida kuando era atadjizada por la Kilisia de la Sensiolojiya yamado "The Perils of Paulette".[1]

Famiya

[trocar | trocar el manadero]

Esta espozada kon el produktor de television amerikano Paul Noble desde 1988. Biven en la sivdad de Palm Beach, Florida. Endjuntos tienen eskritos sesh livros i una ija, Suzy.[10]

Premios

[trocar | trocar el manadero]

En 1992, Cooper aresivio de la Sosyete Amerikana de Djurnalistos i Otores el premio Conscience-in-Media Award.[1] El su monolog The Perils of Paulette aresivio un Chicago Dramatist Award en 1997.[1]

Ovras

[trocar | trocar el manadero]
  • The Scandal of Scientology. Tower Publications, 1971. OCLC 921001
  • Growing Puerto-Rican. Signet, 1973. ISBN 0-451-61233-7
  • The Medical Detectives. D. McKay Co., 1973. ISBN 0-679-50382-X
  • Let's Find Out About Halloween. Reader's Digest Services, 1977.
  • Reward! (eskrito kon Paul Noble). Pocket Books, 1994. ISBN 0-671-87020-3
  • The 100 Top Psychics in America (eskrito kon Paul Noble). Pocket Books, 1996. ISBN 0-671-53401-7
  • 277 Secrets Your Cat Wants You to Know (eskrito kon Paul Noble). Ten Speed Press, 1997. ISBN 0-89815-952-0
  • 277 Secrets Your Dog Wants You to Know (eskrito kon Paul Noble). Ten Speed Press, 1998. ISBN 1-58008-014-6
  • 277 Secrets Your Snake and Lizard Wants You to Know. Ten Speed Press, 1998. ISBN 1-58008-035-9
  • The Most Romantic Resorts for Destination Weddings, Marriage Renewals & Honeymoons (eskrito kon Paul Noble). S.P.I. Books, 2002. ISBN 1-56171-914-5
  • Was Elvis Jewish?: Plus Hundreds of Amazing & Amusing Anecdotes No Rabbi Ever Told You. 2017. ISBN 9780991401369
  • My first 83 years (eskrito kon Paul Noble). 2018. ISBN 1728827337
  • Battlefield Scientology: Exposing L. Ron Hubbard's dangerous "religion" (eskrito kon Tony Ortega) Polo Publishing of Palm Beach, 2018. ISBN 1727131568

Referensias

[trocar | trocar el manadero]
  1. ↑ a b c d Ortega, tony. The Unbreakable Miss Lovely. London: Silvertail Books. ISBN 9781511639378.
  2. ↑ Harassment Diary. Paulette Cooper, 1982
  3. ↑ Church of Scientology of California vs. Paulette Cooper, et al., Los Angeles Superior Court, Docket No. C18558
  4. ↑ How the Church of Scientology tried to bring down journalist Paulette Cooper, aka Miss Lovely. [Australian Broadcasting Corporation]]. ABC News. 17 de Djulio de 2015.
  5. ↑ Teksto de la Operasion PC Freakout
  6. ↑ The Scandal behind "The Scandal of Scientology"
  7. ↑ Hubbard still gave orders, records show. Toronto Globe and Mail. 24 de Djenero de 1980
  8. ↑ Affidavit of Margery Wakefield (13 April 1990)
  9. ↑ The Scandal of Scientology
  10. ↑ ABOUT PAUL NOBLE